Read KO E TOH TAPU KATOA TONGA KO ‘AISEA 39 Bible Online

KO ‘AISEA 39 - KO E TOH TAPU KATOA TONGA bible

KO ‘AISEA 39

¹‘I HE kuonga ko ia na‘e ‘omi kia Hesekaia ha ngaahi tohi, mo ha me‘a‘ofa meia Melotaki-Palatani foha ‘o Palatani, ko e Tu‘i Pāpilone: he kuo ne fanongo kuo ne toka, ka kuo mo‘ui.

²Pea fiefia ‘a Hesekaia ‘i he‘enau ha‘u, ‘o ne tuku ke nau mamata ki hono fale koloa, ‘a e siliva, mo e koula, mo e me‘a namu kakala, mo e lolo mahu‘inga, mo e fale kotoa ‘o ‘ene nāunau, mo e me‘a kotoa na‘e ma‘u ‘i hono ngaahi tukunga koloa: na‘e ‘ikai ha me‘a ‘e ta‘efakahā ‘e Hesekaia kiate kinautolu ‘i hono fale, pea ‘i hono pule‘anga kotoa.

³Pea toki ha‘u ‘a e palōfita ko ‘Aisea kia Kingi Hesekaia, ‘o ne pehē ange, Ko e hā ‘a e lau ‘a e tu‘unga me‘a na? pea ko ‘enau ha‘u mei fē kiate koe? Pea tali ‘e Hesekaia, Ko ‘enau ha‘u kiate au mei ha fonua mama‘o, mei Pāpilone.

⁴Pea ne pehē, Ko e hā ‘a e me‘a kuo nau mamata ki ai ‘i ho fale? Pea tali ‘e Hesekaia Ko hono kotoa ‘o hoku fale kuo nau mamata ki ai: ‘oku ‘ikai ha me‘a ‘i hoku ngaahi tukunga koloa te u ta‘efakahā kiate kinautolu.

⁵Pea pehē ‘e ‘Aisea kia Hesekaia, Fanongo ki he folofola ‘a Sihova Sāpaoti.

⁶Vakai, ‘oku ha‘u ‘a e taimi, ‘e ‘ave ki Pāpilone ‘a e me‘a kotoa ‘i ho fale na, mo e me‘a kuo tānaki ‘e ho‘o ngaahi kui ‘o a‘u mai ki he taimi ni: ‘e ‘ikai ha me‘a ‘e toe — ko Sihova ia.

⁷Pea te nau ‘ave ha ni‘ihi mei ho hako ‘a ia ‘e ‘alu atu mei ho manava, ‘o ke fakatupu: pea te nau nofo ‘iunoke ‘i he palasi ‘o e Tu‘i Pāpilone.

⁸Pea tali ‘e Hesekaia kia ‘Aisea, ‘Oku lelei pē ‘a e folofola ‘a Sihova kuo ke tala. Na‘a ne pehē foki, ‘E fai ha tu‘umālie mo ha tu‘u ma‘u ‘i hoku kuonga ‘o‘oku.