Read KO E TOH TAPU KATOA TONGA KO ‘AISEA 40 Bible Online

KO ‘AISEA 40 - KO E TOH TAPU KATOA TONGA bible

KO ‘AISEA 40

¹MOU fakamānava, fakamānava hake hoku kakai — ko e folofola ē ‘a homou ‘Otua.

²Mou lea fakalelu ki Selusalema, ‘o fanongonongo ki ai kuo ‘osi hono fatongia, kuo totongi hono mo‘ua:[82] kuo ne ma‘u lōua mei he nima ‘o Sihova koe‘uhi ko ‘ene ngaahi hia.

³Ko e le‘o ē ‘oku kalanga, Teuteu ‘i he toafa ‘a e hā‘ele‘anga ‘o Sihova, fakatonutonu ‘i he fonua mamate ha hala tanu ma‘a hotau ‘Otua.

⁴‘Ilonga ha tele‘a pea ‘e tanu, pea ko e mo‘unga mo e tafungofunga ‘e holoki: pea ‘e liliu ‘a e hangatāmaki ke tokamālie, mo e koto makatu‘u ke lautoka:

⁵pea ‘e fakapū mai ‘a e kolōlia ‘o e ‘Eiki, pea ‘e sio fakataha ki ai ‘a e kakano kotoa: he kuo folofola ki ai ‘a e fofonga ‘o Sihova.

⁶Ko e le‘o ē ‘oku lea, Fanongonongo. Pea na‘e pehē hake, Ko e hā te u fanongonongo? Ko e kakano kotoa ko e mohuku, pea ko hono faka‘ofo‘ofa kotoa ‘oku hangē ko e fisi ‘o e vao:

⁷‘oku mae ‘a e mohuku, ‘oku maheikau ‘a e fisi; koe‘uhi ‘oku ifi ki ai ‘a e mānava ‘o Sihova: tā ko e mo‘oni ko e mohuku ‘a e kakai.

⁸‘Oku mae ‘a e mohuku, ‘oku maheikau ‘a e fisi: ka ko e folofola ‘a hotau ‘Otua ‘e tu‘u ‘o ta‘engata.

⁹‘E Saione, Tala-ongoongolelei, fei mo ‘alu hake ki he mo‘unga lahi; ‘e Selusalema, Tala-ongoongolelei,[83] ‘ai atu ho le‘o ke lahi; ‘ai atu pē, ‘oua te ke manavahē: tala ki he ngaahi kolo ‘o Siuta, Ko homou ‘Otua ē!

¹⁰Vakai, ‘e hā‘ele mai ‘a ‘Ātonai Sihova ko e mafi, pea ‘e puke hono hau ‘e hono nima ‘o‘ona:

¹¹‘e ha‘u mo ia hono totongi,[84] pea ‘oku tāimu‘a ‘a e fua ‘o ‘ene ngāue. Te ne fafanga ‘ene tākanga hangē ha tauhi sipi: te ne faluku ‘ene fanga lami ‘i hono kona, ‘o fua ‘i hono fatafata, ko e toutama te ne takitakimālie.

¹²Ko hai tū kuo fua ‘a e ngaahi vai ‘aki hono ‘aofi nima, mo hanga ‘a e langi, mo fa‘o kotoa ‘a e efu ‘o māmani ki ha ipu, mo fua ‘a e ngaahi mo‘unga ‘i ha me‘a tautau, mo e ngaahi mā‘olunga ‘i ha me‘afua lafalafa?

¹³Ko hai na‘a ne ‘atu ha fua ki he laumālie ‘o Sihova, pe fakahinohino ki ai ko hono tangata fale‘i?

¹⁴Na‘a na talanoa mo hai ke ne fale‘i ia, mo ako mai ‘a e founga totonu, mo ako mai ‘a e poto, mo fakahinohino ‘a e hala ‘oku na fe‘unga mālie?

¹⁵Vakai, ‘oku lau ha koto pule‘anga ‘o tatau pē mo ha tulutā ‘oku tāupe ‘i ha pōkete, ‘io, hangē ha momoiki‘i ‘one‘one ‘i ha me‘a fua: vakai, ko e ngaahi motu ‘oku hangē ha efu valevale ‘oku malanga noa.

¹⁶Pea ‘oku si‘i ‘a Lepanoni ke fefie‘aki, pea si‘i hono fanga manu ke feilaulau ‘aki.

¹⁷Na‘a mo e kotoa ‘o e ngaahi pule‘anga ko e me‘a noa kiate ia: ‘oku ne lau kinautolu ko e koto ‘āngoa mo nge‘esi.

¹⁸Pea te mou fakatatau kia hai ‘a ‘Ela? Pea ko e ‘īmisi fē te mou ‘omi ke tu‘u pau mo ia?

¹⁹Ko e ‘aitoli koā — na‘e haka ia ‘e ha tangata haka, pea ‘ufi‘ufi ‘e ha tufunga ‘aki ‘a e koula mo haka seini siliva.

²⁰Ko ia ‘oku masiva me‘a ke ‘atu[85] ‘oku ne fili ha ‘akau ‘e ‘ikai popo: ‘oku ne kumi mai ha tufunga poto te ne lava ha ‘aitoli ‘e ve‘e ma‘u.

²¹‘Ikai kuo mou ‘ilo? ‘ikai kuo mou fanongo? ‘ikai kuo tala kiate kimoutolu mei he kamata‘anga? ‘ikai kuo mou lave‘i ‘a e pou ‘o māmani?

²²Ko ia ‘oku ‘afio ē mei he aku ‘o māmani, pea ko hono kakai ko e fanga he‘e tofu pē: ko ia ‘oku ne folahi ‘a e ngaahi langi hangē ha veili, ‘o ne falō hangē ha tēniti ke nofo‘anga:

²³ko ia ‘oku ne tuku atu ‘a hou‘eiki ke iku ki he noa: ko e kau fakamaau ‘o māmani ‘oku ne ngaohi ko e koto nge‘esi pē.

²⁴Te‘eki ke fuoloa honau hunuki; te‘eki ke fuoloa honau tō; te‘eki ke meimei aka honau tefito ‘i he kelekele; mo ‘ene hō pē ki ai, pea kuo nau mae, pea ‘ave kinautolu ‘e he matangi hangē ha veve.

²⁵Pea te mou fakatatau au kia hai ke ma vakavakatatau? — ko e folofola ē ‘a e Tāpuhā. Tāngaki ki ‘olunga homou mata, ‘o vakai.

²⁶Ko hai kuo ne fakatupu ‘a e ngaahi me‘a ko ē? Ko ia ‘oku taki mai mo lau honau kongakau: ‘oku ne ui honau hingoa tāutaha; ko e me‘a ‘i he lahi hono ngaahi ivi, mo e tu‘u kaukaua hono ngū, ‘oku ‘ikai ha taha ‘e tō.

²⁷Ko e hā ‘oku ke lea pehē ai, ‘e Sēkope? mo koe, ‘Isileli, ‘oku ke lau, ‘Oku puli hoku hala meia Sihova, pea ko hoku ‘Otua kuo ne mo‘utukua ke mole ‘eku totonu?

²⁸‘Ikai kuo ke ‘ilo? kehe, ‘ikai kuo ke fanongo? Ko e ‘Otua ta‘engata ‘a Sihova, ‘a e Fakatupu ‘o e ngaahi ngata‘anga ‘o māmani; ‘oku ‘ikai ke vaivai ia, pea ‘oku ‘ikai ke ongosia, ‘oku ta‘emahakulea ‘ene fakakaukau.

²⁹‘Oku ne ‘atu ngū ki he vaivai; pea ko ia ‘oku ‘ikai hano ivi ‘oku ne fakalahi hono mālohi.

³⁰Na‘a mo e to‘utupu ‘oku me‘a mo vaivai pea ongosia, pea ko e kau talavou te nau mātu‘aki humu;

³¹ka ko ha‘a matatali kia Sihova te nau fakafo‘ou honau ngū: te nau puna ki ‘olunga hangē ko e ‘īkale; te nau lele ‘o ‘ikai ongosia; te nau ha‘ele ‘o ‘ikai vaivai.