Read KO E TOH TAPU KATOA TONGA KO ‘AISEA 44 Bible Online

KO ‘AISEA 44 - KO E TOH TAPU KATOA TONGA bible

KO ‘AISEA 44

¹KA ko eni, fanongo mai, ‘e Sēkope ko ‘eku sevāniti, mo ‘Isileli ko ‘eku pele.

²Ko e folofola eni ‘a Sihova na‘e ngaohi mo fa‘u koe talu ho fanau‘i, ‘a e taha ‘oku ‘alu atu ke tokoni: ‘Oua te ke manavahē, si‘eku sevāniti ko Sēkope; si‘i Sesuluni kuo u fili ki ai.

³He te u lilingi vai ki he fie inua, pea te u ‘uha lolo ki he kelekele mōmoa: te u lilingi hoku laumālie ki ho hako, mo ‘eku tāpuaki ki ho pikilau:

⁴pea te nau huluni ‘i he musie, hangē ko e ngaahi uilou ‘i he ve‘e tafenga vai.

⁵Ko Me‘a te ne pehē, ‘Oku ou kau kia Sihova, pea ko Me‘a te ne takua ‘a e hingoa ‘o Sēkope; pea ko Me‘a te ne tā ‘i hono nima[94] ‘a e lea, “‘A Sihova,” pea te ne hingoa-fo‘ou-‘aki ‘a ‘Isileli.

⁶Ko e folofola eni ‘a Sihova, ko e Tu‘i ‘o ‘Isileli, ‘io, ‘a hono Koeli ko Sihova Sāpaoti: Ko e ‘Uluaki au, pea ko au ‘a e Kimui; pea ka tuku au, ‘oku ‘ikai ha ‘Otua.

⁷Pea ko hai ‘oku tala hangē ko au? — ka pehē, pea ke ne fakamatala, mo hokohoko lelei mai — talu ‘eku ‘ai ‘a e mu‘aki kakai? ‘io, ke nau hanga ‘o fakahā ‘a e ngaahi me‘a ‘o e ‘amui, mo ia ‘oku panaki mai.[95]

⁸‘Oua ‘e mo‘utāfu‘ua, pea ‘oua ‘e tetetete: ‘ikai na‘a ku ongoongo ia kiate koe talu fuoloa, ‘o u fakahaa‘i? pea ko kimoutolu ‘eku kau fakamo‘oni. ‘Oku ai koā ha ‘Otua ‘oka tuku au? ‘io, ‘oku ‘ikai ha makatu‘u.

⁹‘io, ‘oku ‘ikai te u ‘ilo ‘e au ha taha. Ko e kau ngaohi ‘īmisi ko e koto lusa kotoa pē; pea ko e ngaahi me‘a ‘oku nau loto‘aki ‘oku ‘ikai ‘aonga: ‘io, ko ‘enau kau fakamo‘oni na ko e fa‘ahinga ‘oku ‘ikai ke sio, pea ‘oku ‘ikai te nau ‘ilo ha me‘a; ko hono ‘ātunga ē honau fakamaa‘i.

¹⁰Ko hai ‘oku fa‘u ha ‘Otua,[96] mo haka ‘īmisi? — ko e fai ha me‘a ‘oku ‘ikai hano ‘aonga.

¹¹Vakai, ‘e mā ‘a e ngaahi kaume‘a ‘o ē; pea ko kinautolu na‘e ngāue ‘i hono ngaohi, ko e hako‘i tangata pē. Ke nau fakataha mai kotoa pē, ke nau tu‘u mai, ke nau mo‘utāfu‘ua, ke nau mā fakataha.

¹²Ko e tufunga ‘aione ‘oku ne to‘o ha tutu‘u, pea ‘oku ne ngāue‘aki ‘a e malala vela, pea te ne fakaangaanga ‘aki ha ngaahi hāmala, pea ‘oku ne ngaohi ia ‘aki hono nima mālohi. Faifai ‘oku ne fiekaia, pea ‘oku mole ai hono ivi; ka ‘ikai te ne ma‘u ha vai ke inu, te ne ongosia.

¹³Ko e tufunga ‘akau ‘oku ne falō ha kafa; ‘oku ne faka‘ilonga‘i ‘aki ha sioka; ‘oku ne ngaohi ‘aki ha ngaahi tele, ‘oku ne ango ‘aki ha kāpasa, ‘oku ne ngaohi ia ‘i he tatau ‘o e kakai, pea ‘oku ne ngaohi ia ‘o hangē ko e fōtunga ‘o ha tangata, hangē ha taha faka‘ofo‘ofa, ko e ‘ai ke nofo fale.

¹⁴Ko Me‘a ‘oku teu ha ta‘anga sita, pea ‘oku ne to‘o ha ‘akau fefeka, pe ko e ‘oke; ‘io, ‘oku ne fili ha‘ane me‘a ‘i he ngaahi ‘akau ‘o e vao: ‘oku ne tō ha fiki, pea ‘oku fakatupu ia ‘e he ‘uha.

¹⁵Pea ‘oku ‘aonga ki he tangata ke fefie ‘aki; pea ‘oku ne to‘o hano me‘a, ‘o fai‘aki ‘ene talikula; ‘io, ‘oku ne faka‘afu ‘aki ha ‘umu, ‘o ta‘o mā: ‘io, ‘oku ne ngaohi ‘aki ha ‘Otua, ‘o hū ki ai; ‘oku ne ngaohi ‘aki ha ‘īmisi, ‘o ne fo‘ohifo ki ai.

¹⁶Ko e vaeua ‘oku ne tafu ‘aki ‘a e afi; ‘io, ‘i he funga ‘o e vaeua ko ē ‘oku ne kai kakano; ‘oku ne ta‘o me‘akai, ‘o ne kai ke mākona; ‘oku ne talikula ai foki, ‘o ne pehē, Uoi, kuo u kamata māfana, kuo u ongo‘i ‘a e maama.

¹⁷Pea ko hono toe ‘oku ne ngaohi ke ‘otua, ha‘ane ‘aitoli; ‘oku ne fo‘ohifo ki ai, ‘o ne hū, ‘io, ‘oku ne lotu ki ai, ‘o ne pehē, Fakahaofi au; he ko hoku ‘otua koe.

¹⁸‘Oku ‘ikai te nau ‘ilo, pea ‘oku ‘ikai hanau ‘atamai: seuke, kuo pulusi honau mata ke ‘oua te nau sio; mo honau loto ke ‘oua te nau poto.

¹⁹Pea ‘oku ‘ikai te nau fakakaukau, pea ‘oku ‘ikai ha poto pe ‘atamai ke nau pehē ai, Ko hono vaeua na‘a ku tafu ‘aki ‘a e afi; ‘o u ta‘o mā ‘i he funga malala; ‘o u ta‘o kakano ai ‘o kai; pea ko e pehē koā te u ngaohi ‘aki hono toe ha ‘aitoli?[97] ‘o u fo‘ohifo ki ha potupotu‘i ‘akau?

²⁰Ko ia ‘oku tauhi ha koto efuefu ‘oku takihee‘i ia ‘e ha loto kuo kākaa‘i, pea ‘oku ‘ikai te ne fakahaofi hono laumālie, pea ‘oku ‘ikai te ne pehē, ‘Ikai ko e loi ia ‘oku ou tōivi hono puke?[98]

²¹Manatu ki he me‘a ko ia, ‘e Sēkope mo ‘Isileli; he ko ‘eku sevāniti koe: ne u fa‘u koe; ‘oku ke tamaio‘eiki kiate au: ‘e ‘Isileli, ‘e ‘ikai te ke ngalo ‘iate au.

²²Kuo u tāmate‘i ho‘o ngaahi angahala hangē ha ‘ao, mo ho‘o ngaahi hia hangē ha loa: foki kiate au: he kuo u huhu‘i koe.

²³Mavava, ‘a e ngaahi langi, He kuo lava ia ‘e Sihova; Hiki tuē ‘a lolofonua; Ha‘aki mai, ‘a e ngaahi mo‘unga, ho‘omou fiefia; ‘A e vao, mo e ‘akau kātoa ‘oku ‘i ai: He kuo huhu‘i ‘e Sihova ‘a Sēkope, Pea ‘oku ne fakalāngilangi‘i ia ‘ia ‘Isileli,

²⁴Ko e folofola eni ‘a Sihova ko ho Koeli, mo ia na‘a ne fa‘u koe talu ho fanau‘i: Ko au Sihova ia ‘oku fai ‘a e me‘a kotoa: na‘e folahi ‘a e langi toko taha pē; ha‘ane lula folahi ‘a māmani ta‘ekau ai ha taha;

²⁵‘oku fakaiku noa ‘a e ngaahi faka‘ilonga ‘a e fa‘ahinga launoa, mo ‘ai ke faha ‘a e kau tongafisi; ‘oku fakafoki ‘a e kau poto, ke tu‘u mei mui, ‘o ngaohi ‘a e me‘a kuo nau ‘ilo ki ai ke hā ko e sesele;

²⁶‘oku ne ‘ai ke tu‘u ‘a e lea ‘a ‘ene sevāniti, mo fakaai ‘a e fale‘i ‘a ‘ene kau talafekau; ‘oku ne folofola ki Selusalema, ‘E toe nofo‘ia; pea ki he ngaahi kolo ‘o Siuta, ‘E toe langa, pea ko ‘enau fu‘u holo te u toe fokotu‘u:

²⁷‘oku ne folofola ki he vai‘oho, Mātu‘u, pea te u fakamōmoa ho ngaahi manga:

²⁸‘oku folofola kia Kōlesi, Ko ‘eku tauhi sipi ia, pea te ne fakaai kotoa ‘a e me‘a ‘oku ou loto ki ai; ‘io, he‘ene pehē ki Selusalema, ‘E toe langa ia; pea ki he temipale, ‘E toe tanupou.