Read KO E TOH TAPU KATOA TONGA KO ‘AISEA 47 Bible Online

KO ‘AISEA 47 - KO E TOH TAPU KATOA TONGA bible

KO ‘AISEA 47

¹‘ALU hifo, ‘o nofo ‘i he efu, ta‘ahine Pāpilone, ‘o taau mo e tangata kei tāupo‘ou; Nofo ‘i he kelekele ta‘eha taloni, ‘ōfefine ‘o e kau Kalitia: He ‘e ‘ikai toe ui koe ko e pelepelengesi mo e fakananivi.

²To‘o ‘a e ongo maka, ‘o momosi mahoa‘a; Tatala ho veili, hu‘i ho fakapatoho; Huke ho kofu ke hā ho tenga, a‘a he ngaahi vaitafe;[104]

³Tatala ‘a e potu ‘oku vala‘i, Ke mātu‘aki hā ho mā‘anga. Ko e sauni ‘oku ou fai ‘E ‘ikai te u fakafetaulaki atu hangē ha tangata.

⁴Ko hotau Koeli ia, ko hono huafa ko Sihova Sāpaoti, Ko e Tāpuhā ‘o ‘Isileli,

⁵Nofo fakalongo pē, ‘o hū ki he po‘uli, si‘i ‘ōfefine ‘o e kau Kalitia: ‘e ‘ikai toe ui koe ko e ma‘itaki ‘o e ngaahi pule‘anga.

⁶Na‘a ku ‘ita ki hoku kakai, na‘a ku va‘inga‘aki hoku tofi‘a, na‘a ku tuku kinautolu ki ho nima: na‘e ‘ikai te ke fai ha ‘ofa kiate kinautolu; na‘a mo e mātu‘a na‘a ke ‘ai mamafa ki ai ho‘o ‘ioke.

⁷Pea na‘a ke pehē, Te u nofo ko e ma‘itaki ‘o ta‘engata: ko ia, na‘e ‘ikai te ke ‘ai ki ho loto ‘a e ngaahi me‘a ko ia, na‘e ‘ikai te ke manatu ki he me‘a ‘e iku ki ai.

⁸Pea ko eni, fanongo ki he me‘a ni, ‘a koe ‘oku ke nofo ki he ngaahi mālie — si‘ene nofo falala noa, si‘i pehē ‘i hono loto, Ko au pē, pea ‘oku ‘ikai mo ha taha; tala‘ehai te u nofo uitou, pea tala‘ehai te u ‘ilo ‘a e mole ‘a e fānau.

⁹‘Ā, ‘e hoko kiate koe ‘a e ongo me‘a ko ia fakatou‘osi ‘i ha fo‘i kemo, ‘i ha ‘aho pē taha, ‘a e mole ‘a e fānau mo e nofo uitou: te na hoko kiate koe (ko e hoko pe hoko!) neongo e lahi ho‘o fai tuki, neongo e hulu fau ho‘o fiemana.

¹⁰He na‘a ke fiemālie ‘i ho‘o faikovi; na‘a ke pehē, ‘Oku ‘ikai sio kiate au ha taha; ko ho‘o poto, mo ‘ilo, ko ia na‘e takihee‘i ai koe: ‘a ē ā na‘a ke pehē ai ‘i ho loto, Ko au ia, pea ‘oku ‘ikai mo ha taha.

¹¹Pea ‘oku hoko kiate koe ha kovi; ‘oku ‘ikai te ke ‘ilo ki hano fakalanu: pea ‘oku tō kiate koe ha tu‘utāmaki ‘oku ‘ikai te ke lava ha holo ki ai: ‘io, ‘e hoko kiate koe ha faka‘auha fakafokifā, ta‘e te ke ‘ilo ki ai.

¹²Taukave pē mu‘a ho‘o ngaahi fiemana, mo ho‘o fu‘u fai tuki, ‘a ia kuo ke fakaongosia ai talu ho‘o talavou; hei‘ilo te ke lava ha me‘a ke ‘aonga, hei‘ilo te ke lava ke fakamana‘i.

¹³Kuo ke hela ‘i he lahi ho fale‘i: ke tu‘u mai mu‘a ‘a e fa‘ahinga ko ē, ‘o fakamo‘ui koe — ‘a e kau vahevahe langi, ‘a e kau sio fetu‘u, ‘a kinautolu ‘oku faka‘ilo he māhina fo‘ou kotoa pē ha me‘a[105] ni‘ihi ‘e hoko kiate koe.

¹⁴Vakai, kuo nau hoko hangē ko e veve; kuo keina kinautolu ‘e he afi; ‘oku ‘ikai te nau mafakahaofi ‘enau mo‘ui mei he puke ‘a e ulo: tala‘ehai ko e afi malala ke fai ai ha talikula, ko ha maama fākavao.

¹⁵‘Oku pehē ‘a e tō‘onga kiate koe ‘a e fa‘ahinga kuo ke fakaongosia ai: ‘a e kakai kuo fai fakatau mo koe talu ho‘o talavou, ‘oku nau hola takitaha ‘i hono hala, ta‘eha taha ke ‘omi ha fakamo‘ui kiate koe.