Read KO E TOH TAPU KATOA TONGA KO ‘AISEA 5 Bible Online

KO ‘AISEA 5 - KO E TOH TAPU KATOA TONGA bible

KO ‘AISEA 5

¹KA U fai ha hiva ‘oku kau ki hoku ‘ofa‘anga, ‘inē? ko e hiva ‘a hoku mamana ‘oku kau ki he‘ene ngoue vaine, Tokua na‘e ma‘u ‘e hoku ‘ofa‘anga ha ngoue vaine ‘I ha fo‘i tumutumu na‘e kelekele mahu:

²Pea ne huo fakamolū ia, ‘O ne tufi ‘a e maka, ‘o fetuku, ‘O ne tō ai ‘a e vaine fungani, ‘O ne langa ‘i loto ha fale le‘o; ‘Io, na‘a ne tā ‘i he maka foki ha tata‘o‘anga uaine: ‘O ne ‘amanaki ko hono fua ko e kālepi huofaki — Ka tā ko hono fua ko e kālepi vao.

³Pea ko eni, ‘a e nofo Selusalema mo e tangata Siuta, mou fakamaau mu‘a ‘iate kimaua mo ‘eku ngoue vaine.

⁴Ko e hā na‘e toe ke fai ki he‘eku ngoue vaine ‘a ia na‘e ‘ikai te u fai? Ko e hā na‘e pehē ai? ‘Amanaki au ki he fua kālepi huofaki, kae fua ‘e ia ko e kālepi vao.

⁵Pea ko eni, ka u tala mu‘a kiate kimoutolu ‘a e me‘a ‘oku ou teu fai ki he‘eku ngoue vaine: ‘ave hono ‘ā, ‘o tuku ke kaikai ai ‘a e fanga manu: holoki hono ‘ā maka, ‘o tuku ke malakekina.

⁶Pea te u tuku ke lala: ‘e ‘ikai ‘auhani, pea ‘e ‘ikai ke keli; pea ‘e ‘alu hake ‘a e ‘akau talatala mo e ‘akau veli! pea te u fekau ki he ngaahi ‘ao ke ‘oua te nau toe tuku hifo ha ‘uha ki ai.

⁷He ko e ngoue vaine ‘a Sihova Sāpaoti ko e fale ‘o ‘Isileli ia, pea ko e tangata Siuta ko ‘ene ma‘ala mamana: pea ‘i he‘ene ‘amanaki ki he fakalao, uoi! ko e faluku pē; na‘a ne ‘amanaki ki he faitotonu, kae uoke! Ko e tangi kaila ē.

⁸‘Oiauē ‘a kinautolu ‘Oku fakahoko fale atu, Mo fakahoko konga vao mai; ‘Oku nau nga‘unu atu kae‘oua ke ‘ikai toe ha potu, Pea ‘Oku mou nofo fakaekimoutolu he loto fonua!

⁹Ongo ki hoku telinga meia Sihova Sāpaoti, ‘Ilo ‘e au ‘o kapau ‘e ‘ikai hoko ‘ani fale lahi ko e koto ‘āngoa; ko e ngaahi fale lahi mo lelei kae ta‘eha taha ‘oku nofo ai.

¹⁰He ko e fua ‘o e ngoue vaine ‘oku hongofulu ‘eka ko e pate pē taha, pea ko e homa pulopula ‘e utu mei ai ha efa pē.

¹¹‘Oiauē ‘a kinautolu ‘Oku tu‘u hengihengi hake Ko e fakakī kava mālohi; ‘Oku nau lavaki nofo efiafi, ‘O fakamāfana ‘aki kinautolu ‘a e uaine!

¹²Pea ko honau sō ko e ha‘ape pē mo e helefilo, Ko e nafa fāngongo pē mo e fangufangu mo e uaine; Ka ‘oku ‘ikai te nau tokanga‘i ‘a e me‘a ‘oku fai ‘e Sihova, Pea ko e ngāue ‘a hono nima ‘oku ‘ikai te nau sio ki ai.

¹³Ko hono ō ia ‘e ‘ave pōpula ‘a hoku kakai ta‘e te nau ‘ilo;[9] pea ‘e hoko honau kau lāngilangi ko e kau ‘alefa, pea ko hono uōuōtu‘u ‘e hoko ko e kau pakukā he fie inu.

¹⁴Ko hono ō ia kuo mafa‘a ‘e Lolofonua ‘ene havala, mo fakaava hono ngutu ta‘ehano fakangatangata: pea ‘oku ‘alu hifo ki ai hono kau lāngilangi, mo hono uōuōtu‘u, mo hono ongoonga‘a, mo ia fua pē ‘oku fiefia ‘i he kolo.

¹⁵Pea ko lāuvale ‘e mapelu, pea ‘e fakamo‘ulaloa ‘a hou‘eiki, pea ko e mata ‘o e hīkisia ‘e laea.

¹⁶Kae mahiki ‘a Sihova Sāpaoti ‘i he fai fakamaau, pea ko ‘Ela ko e Tāpuhā te ne fakatāpuhaa‘i ia ‘e ia ‘i he faitotonu.

¹⁷Toki kaikai ai ‘a e fanga lami hangē ‘oku nau ‘i honau toafa ‘onautolu, pea ko e ngaahi ‘api ‘o e fa‘ahinga nge‘enge‘e, ‘a ia kuo lala, ‘oku fanga sipi ai ‘a e kakai hē fano.[10]

¹⁸‘Oiauē ‘a kinautolu ‘Oku nau toho ‘a e kovi ‘aki ‘a e ngaahi maea muna, Mo toho ‘a e angahala hangē ko e fai‘aki ‘a e leta ‘o e sāliote!

¹⁹‘A kinautolu ‘oku nau pehē, “Ke ne fai to‘oto‘o mu‘a, Ke ne fakavave ‘ene ngāue Koe‘uhi ke mau sio ki ai; ‘Io, ke nga‘unu mai mo ha‘u ‘a e me‘a kuo fakakaukau ki ai ‘a e Tāpuhā ‘o ‘Isileli, Ke mau ‘ilo ia!”

²⁰‘Oiauē ‘a kinautolu ‘Oku lau ‘a e kovi ko e lelei, Pea ‘oku lau ‘a e lelei ko e kovi; ‘Oku nau tuku ‘a e po‘uli ko e maama, Mo e maama ko e po‘uli; ‘Oku nau tuku ‘a e kona ko e melie, Mo e melie ko e kona!

²¹‘Oiauē ‘a kinautolu ‘Oku poto ‘i he vakai ‘anautolu, Pea ‘oku fe‘ao ma‘u pē mo kinautolu ‘enau fakapotopoto!

²²‘Oiauē ‘a kinautolu Ko e kau mafi he inu uaine, Mo e kakai fita he hu‘i kava:

²³‘a e fa‘ahinga ‘oku nau fakatonuhia ‘a e pau‘u koe‘uhi ko ha koloa, ‘O fa‘ao mei he faitotonu ‘ene tonuhia!

²⁴Ko ia, hangē ‘oku keina ‘a e veve ‘e he ‘elelo ‘o e afi, ‘o koto ‘a e musie tauaki ‘e he ulo, pehē ‘e hoko honau aka ko e koto popo, pea ‘e ‘oho hake honau fisi hangē ko e efu; koe‘uhi kuo nau fakatale‘i ‘a e lao ‘a Sihova Sāpaoti, pea ko e folofola ‘a e Tāpuhā ‘a ‘Isileli kuo nau manuki ki ai.

²⁵Ko hono ō ia kuo tafunaki ‘a e houhau ‘o Sihova ki hono kakai, pea kuo ne mafao atu hono nima ke tautea ia, pea kuo ne taa‘i ia, pea ‘oku tete ‘a e ngaahi mo‘unga, pea ‘oku tu‘utu‘u holo honau ‘anga‘anga ‘i he ngaahi hala, ‘o hangē ko e ngaahi fokotu‘unga veve ‘i he tafi. Ka neongo ia kotoa, Ka ‘oku ‘ikai lolou hono houhau, Pea ‘oku kei mafao atu hono nima!

²⁶Pea ‘oku ne fokotu‘u ha fuka ki he ngaahi pule‘anga[11] mama‘o atu, Pea ‘oku ne tupulū ki ai ke ha‘u mei he ngaahi ngata‘anga ‘o māmani. Pea vakai ‘oku ve‘ekimokimo ‘ene ha‘u.

²⁷Koloto ke ‘i ai ha taha ‘oku ongosia, pe ‘oku humu; ‘Oku ‘ikai te nau mohe, pea ‘oku ‘ikai te nau tule; Pea ‘oku ‘ikai ke kōkō honau no‘o, Pea ‘oku ‘ikai ke motu ‘a e me‘a tau sū.

²⁸Ko e fa‘ahinga ‘oku māsila ‘enau ngahau, Pea ko ‘enau kaufana kuo ‘ai uka kotoa; Pea ko e nge‘esi va‘e ‘o ‘enau fanga hoosi tā ko e makahunu tofu pē, Pea ko e va‘e ‘o ‘enau sāliote ‘oku hangē ko e ‘ahiohio.

²⁹‘Oku ō mo ia ha ‘u‘ulu hangē ha laione toutama; ‘Oku kālou hangē ni manu hau: ‘Io, ‘oku ne ngulungulu, ‘o ne puke ‘ene ‘a‘alu, ‘O ne ‘ave noa, ‘o ‘ikai ha fakahaofi.

³⁰‘Io, ‘oku ne ngulungulu ki ai ‘i he taimi ko ia ‘O hangē ko e ‘u‘ulu ‘o e tahi: Pea ka vakai si‘i me‘a ki hono fonua, pea tā ko e po‘uli fakamamahi, Pea hoko hono maama ko e po‘uli ‘i he ‘ao‘aofia hono langi.[12]