Read KO E TOH TAPU KATOA TONGA KO ‘AISEA 50 Bible Online

KO ‘AISEA 50 - KO E TOH TAPU KATOA TONGA bible

KO ‘AISEA 50

¹KO eni ‘a e folofola ‘a Sihova, Ko fē fua ‘a e tohi vete ‘a ho‘omou fa‘ē, ‘a ia na‘a ku tukuange ‘aki ia tokua? pea ko hai ha taha ‘i he kakai ‘oku ou mo‘ua ki ai, ‘o fakatau kimoutolu ki ai tokua? ‘Ā, ko ho‘omou ngaahi kovi pē na‘e fakatau ai kimoutolu, pea ko e ngaahi angahala ‘amoutolu na‘e tukuange ai ho‘omou fa‘ē.

²Ko e hā ‘oku pehē ai? kuo u ha‘u, ka ‘oku ‘ikai ha taha; kuo u ui, ka ‘oku ‘ikai ha tali? ‘Oku nounou koā hoku nima ke fakamo‘ui? pe ‘oku ou ta‘eha ivi ke fakahaofi? Vakai, ka u ka fakamana, ‘oku mātu‘u ai ‘a e tahi; ‘oku ou liliu ‘a e potu vaitafe‘ia ko e fonua maha hu‘a; ‘oku veia ‘enau ika ko e ‘ikai ha vai, pea nau mate he fie inua.

³‘Oku ou lava ke fakalālāfua‘a ‘a e langi, pea ke ‘ai tauanga‘a ki ai mōno ‘ufi‘ufi.

⁴Ko ‘Ātonai Sihova kuo ne ‘omi kiate ‘au ‘a e ‘elelo ‘o e tama ako, ke u ‘ilo ‘a e ngaahi lea ke tokoni ‘aki ‘a e ongosia; ‘oku ne fafangu au ‘i he pongipongi kotoa pē, ‘oku ne ue‘i hoku telinga ke fanongo hangē ha tama ako.

⁵Ko ‘Ātonai Sihova kuo fakaava hoku telinga; pea ko au na‘e ‘ikai te u talangata‘a, na‘e ‘ikai te u foki ki tu‘a.

⁶Na‘a ku tuku hoku tu‘a ki he kau tā, mo hoku kou‘ahe ki he kau fusi kava: na‘e ‘ikai te u fufū hoku mata mei he fakamā fua pē mo e ‘anuhia.

⁷Ka ko ‘Ātonai Sihova te ne tokoni‘i au; ‘a ē ā na‘e ‘ikai te u tuku ke lava‘i au ‘e hoku fakamaa‘i; ko ia ai na‘a ku ngaohi hoku mata ke hangē ha makahunu, ‘o u ‘ilo ‘e ‘ikai lava hoku fakamā.

⁸‘Oku ofi ‘a ia ‘oku ne fakatonuhia au; ko hai ‘e fakamaau mo au? Ta tu‘u leva: ko hai ia ‘oku ma hopo? Ke ne ‘unu‘unu mai kiate au.

⁹Vakai, ko ‘Ātonai Sihova te ne tokoni kiate au; ko hai ha taha te ne lava hoku fakalaea? ‘Ā, te nau ngangana kotoa pē hangē ha motu‘i kofu; ‘e keina kinautolu ‘e he ane.

¹⁰Ko hai ‘iate kimoutolu ‘oku ‘apasia kia Sihova, pea ‘oku fakaongo ki he lea ‘a ‘ene sevāniti; ka ‘oku ne ha‘ele ‘i he fu‘u po‘uli, pea ‘oku ‘ikai ha‘ane momo‘i maama? Ke falala ia ki he huafa ‘o Sihova, mo faaki ki hono ‘Otua.

¹¹Sī, ‘a kimoutolu kotoa ‘oku tafu ‘a e afi, ‘oku teu kimoutolu ‘aki ‘a e ngaahi tao vela: ‘alu ki he ulo ‘a homou afi, pea ki he ngaahi tao vela kuo mou tutu. Ko e me‘a ko eni ‘oku hoko atu kiate kimoutolu mei hoku nima, te mou tokoto pē ‘i he mamahi.