Read KO E TOH TAPU KATOA TONGA KO ‘AISEA 51 Bible Online

KO ‘AISEA 51 - KO E TOH TAPU KATOA TONGA bible

KO ‘AISEA 51

¹FANONGO kiate au, ‘a e kau tuli ki he mā‘oni‘oni, ha‘a vivili kia Sihova: hanga ki he makatu‘u ne tā kimoutolu mei ai, mo e ava ‘o e luo na‘e mei ai homou keli.

²Hanga kia ‘Epalahame ko ho‘omou kui, pea kia Sela na‘a ne langā ‘iate kimoutolu: si‘ene toko taha pē, ka u ui ia, mo tāpuaki‘i, mo fakatokolahi.

³He kuo fakamānava hake ‘e Sihova ‘a Saione: kuo ne fakamānava hake hono ngaahi potu maumau, pea kuo ne liliu hono ngaahi potu maha hu‘a ke hangē ko ‘Īteni, mo hono ngaahi potu mamate ke hangē ko e ngoue tapu ‘a Sihova; ‘e ‘ilo ‘i ai ‘a e fiefia mo e nēkeneka, ‘a e fakafeta‘i mo e hiva mālie.

⁴Fanongo kiate au, ‘a hoku kakai; pea fokotu‘u telinga mai, ‘a e fa‘ahi ‘a‘aku; he ‘e ‘alu atu ha lao ‘iate au, pea te u ‘ai ‘a e tu‘unga ki he‘eku konisitūtone, ke hoko ko e maama ‘o e ngaahi kakai.

⁵Kuo ofi ‘eku fakatonutonu, kuo ‘alu atu ‘eku fakamo‘ui, pea ‘e fakamaau ‘e hoku nima ‘a e ngaahi kakai; ‘oku sio kiate au ‘a e ngaahi motu, ‘io, ‘oku nau tatali ki hoku nima.

⁶Tāngaki hake homou mata ki he langi, pea hanga ki he fonua ‘i lalo: he ‘e mole ‘a e ngaahi langi hangē ha kohu, pea mokulu ‘a māmani hangē ha kofu, pea ‘e mate hono kakai hangē ko e namu:[113] ka ko ‘eku fakamo‘ui ‘e ta‘engata, pea ko ‘eku fakatonuhia ‘e ‘ikai liliu.

⁷Fanongo kiate au ‘a kimoutolu ‘oku ‘ilo ‘a e fakatonuhia, ‘a e kakai ‘oku ma‘u ‘eku lao ‘i honau loto; ‘oua te mou manavahē ki he manuki ‘a e tangata me‘a vaivai, pea ‘oua te mou laea ‘i he‘enau fa‘a tūvangia kimoutolu.

⁸He ‘e kai kinautolu ‘e he ane, hangē ko e kofu; ‘e keina kinautolu ‘e he mū, ‘o hangē ko e fulufulu‘i sipi: ka ko ‘eku fakatonuhia ‘e tolonga ‘o ta‘engata, pea ko ‘eku fakamo‘ui ki he to‘utangata mo e to‘utangata.

⁹Ofo hake, ofo hake, si‘i nima ‘o Sihova, Kofu ‘aki ha mālohi; Ofo hake hangē ko e taimi mu‘a, ‘A e ngaahi to‘utangata ‘o ono ‘aho. ‘Ikai ko koe ‘a e me‘a na‘e hae ‘a Lēhapi,[114] Na‘e veloi ‘a e Tanini?

¹⁰‘Ikai ko koe ‘a e me‘a na‘e fakamātu‘u ‘a e tahi, ‘A e vai ‘o e moana lahi; Na‘e ngaohi ‘a e kilisitahi Ko e hala ke fou ai ‘a e kakai kuo huhu‘i?

¹¹Pea ko e kau veteange ‘a Sihova Te nau foki, ‘o a‘u ki Saione mo e mavava, Pea ko e fiefia ta‘engata ko e pale ‘i honau ‘ulu: Te nau a‘usia ‘a e fiefia mo e nēkeneka, Ko e mamahi mo e māpuhoi ‘e moulu atu.

¹²Ko au, ko au ai pē ko homou fakalelu: ko hai tū koe ke ke manavahē ki ha tangata me‘a vaivai, ‘a ia te ne mate, ‘io, ki ha hako‘i tangata, ‘a ia ‘oku tuku ko e musie pē?

¹³Kae ngalo ‘iate koe ‘a Sihova na‘e ngaohi koe, ‘a ia na‘a ne falō ‘a e ngaahi langi, mo tanupou ‘a māmani. Ko e pehē koā ke ke manavahē tu‘u he ‘aho kotoa pe ki he tafue ‘a e fakamālohi hangē ko ‘ene teu ke faka‘auha? pea ko e tafue ‘a e fakamālohi — ko e fē ia?

¹⁴‘Oku vave ‘a e veteange ‘o si‘i ngaope; pea ‘e ‘ikai te ne mate, ‘o tō ki he luo, pea ‘e ‘ikai te ne hala he me‘akai.

¹⁵He ko au Sihova ko ho ‘Otua, ‘a Au ‘oku ou ue‘i ‘a e tahi ke ‘u‘ulu hono peau; ko Sihova Sāpaoti hono hingoa.

¹⁶Pea ‘oku ou ‘ai ‘eku lea ki ho ngutu, pea kuo u ‘ufi‘ufi koe ‘aki ‘a e malu ‘o hoku nima, koe‘uhi ke hunuki,[115] ‘a e ngaahi langi, pea ke pea ke tanupou ‘a māmani, pea ke lea ki Saione, Ko hoku kakai koe.

¹⁷Fei mo ofo, fei mo ofo, tu‘u hake, Selusalema, ‘A ia kuo ke inu ‘a e ipu houhau na‘e ‘atu ‘e Sihova, Kuo ke inumia ‘a e fu‘u linganga ‘o e uaine fakaninimo.

¹⁸‘I he fānau kotoa kuo ne fā‘ele‘i Na‘e ‘ikai ha taha ‘e lava ke taki ia; ‘Io, ‘i he kau tama kuo ne tauhi Na‘e ‘ikai ha taha ‘e lava ke puke hono nima.

¹⁹Tā ‘oku ua ‘a e me‘a kuo hoko kiate koe — Ko hai te ne hohoi atu? Ko e maumau mo e faka‘auha, Pea ko e honge mo e heletā: Ko e hā ha fakalelu te u feia atu?

²⁰Kuo pongia ho‘o kau tama, ‘Oku nau tākoto ‘i he tuliki ‘o e ngaahi hala, Hangē ha ‘anitelope kuo kafai: Si‘enau konā ‘i he houhau ‘a Sihova, ‘I he valoki ‘a ho ‘Otua.

²¹Ko ia, fanongo mu‘a ki he me‘a ni, si‘i tu‘utāmaki, ‘io, si‘i konā kae ‘ikai ‘aki ‘a e uaine:

²²Ko e folofola eni ‘a ho ‘Eiki ko Sihova, ‘io, ‘a ho ‘Otua ko e taukapo ‘o hono kakai: Vakai, ‘oku ou to‘o mei ho nima ‘a e ipu fakaninimo, ‘a e fu‘u linganga ‘o hoku houhau; ‘e ‘ikai te ke toe inu ia:

²³pea ‘oku ou ‘ai ia ki he nima ‘o ho kau fakamamahi; ‘a ia na‘a nau pehē ki ho laumālie, Fo‘ohifo, ka mau laka atu ‘iate koe: pea na‘a ke ngaohi ho tu‘a ko e kelekele, ‘io, ko e hala kiate kinautolu na‘e laka atu.