Read KO E TOH TAPU KATOA TONGA KO ‘AISEA 52 Bible Online

KO ‘AISEA 52 - KO E TOH TAPU KATOA TONGA bible

KO ‘AISEA 52

¹OFO hake, ofo hake, ‘ai ho mālohinga Saione; ‘ai ho vala tō‘onga, si‘i Selusalema, ‘a e kolo tapu: he tala‘ehai ‘e toe hū atu ‘a e ta‘ekamu mo ta‘ema‘a.

²Tupe‘i ‘a e efu meiate koe; tu‘u, Selusalema, ‘o nofo lelei: hu‘i ‘a e ngaahi seini mei ho kia, si‘i ta‘ahine pōpula ko Saione.

³He ko eni ‘a e folofola ‘a Sihova, Ne fakatau kimoutolu ka hono te ma‘u ai ha me‘a?

⁴Ko ia ‘e fai homou huhu‘i ta‘eha pa‘anga. ‘Io, ko eni ‘a e folofola ‘a ‘Ātonai Sihova, Na‘e ‘alu hifo hoku kakai ki ‘Isipite ‘i he kamata‘anga ke ‘āunofo pē ki ai: pea na‘e fakamālohia kinautolu ‘e he ‘Āsilia tu‘unga‘a pē.

⁵Pea ko eni, ko e hā ‘oku ou ‘i heni ai? — ko Sihova ia mei he Ta‘ehāmai — he ‘oku ‘ave hoku kakai ka hono te ma‘u ai ha me‘a? Pea ko e fa‘ahinga ‘oku pule kiate kinautolu ‘oku nau fākaulu — ko Sihova ia mei he Ta‘ehāmai — pea kuo talakaa‘i tu‘u hoku hingoa ‘i he ‘aho kotoa pē.

⁶Ko hono ō ia ‘e ‘ilo hoku hingoa ‘e hoku kakai: ko hono ō ia te nau ‘ilo ‘i he ‘aho ko ē ko au ia ‘oku lea ni; ko au eni.

⁷Hono ‘ikai faka‘ofo‘ofa ‘i he ngaahi mo‘unga si‘i va‘e ‘o e tala ongoongolelei, ‘o ia ‘oku fakahā ‘a e melino, ‘o ia ‘oku ongoongo mai ‘a e lelei, ‘o ia ‘oku fakahā ‘a e mo‘ui; ‘o ia ‘oku fanongonongo ki Saione, Kuo toe tu‘i ho ‘Otua!

⁸Sī, ‘a e kau taulama na! ‘oku nau ha‘aki honau le‘o, ‘oku nau mavava fakataha; he hangē ha femātaaki ‘enau sio ‘i he fakafoki ‘e Sihova ‘a Saione.

⁹Ha‘aki mai, mavava fakataha, ‘a e ngaahi potu lala ‘o Selusalema: he kuo fakalelu ‘e Sihova hono kakai, kuo ne huhu‘i ‘a Selusalema.

¹⁰Kuo mulu ‘e Sihova hono nima tāpuhā kae sio ‘a e ngaahi kakai; pea ‘e mamata ‘e he ngaahi ngata‘anga ‘o māmani ki he fai fakamo‘ui ‘a hotau ‘Otua.

¹¹Mahu‘i mai, mahu‘i mai; hū atu mei hena, ‘oua ‘e ala ki he me‘a ta‘ema‘a;[116] hū atu mei hono lotolotonga; ‘ai ke mou ma‘a, ‘a kimoutolu ‘oku fua ‘a e nāunau ‘a e ‘Eiki.

¹²He tala‘ehai te mou hū kitu‘a ‘i he fakavave, pea tala‘ehai te mou laka atu hangē ha hola: he ko Sihova te ne hā‘ele atu ko e takitau; pea ‘e tukutau ‘a e ‘Otua ‘o ‘Isileli.

¹³Vakai, ‘e fai fakapotopoto ‘a ‘eku sevāniti; te ne fotu, pea te ne mahiki hake, pea te ne mā‘olunga ‘aupito[117] hangē ā na‘e ofongi koe ‘e he tokolahi,

¹⁴(kae fēfē, hono ta‘inga hono fakapalakuu‘i; na‘e ‘ikai mei hā ko e maama, pea ko hono fōtunga na‘e ‘ikai mei hangē ko e hako‘i tangata!)

¹⁵pehē te ne faka‘ohovale‘i ha ngaahi kakai lahi; ‘e kū ngutu ha ngaahi tu‘i ‘i hono ‘ao: koe‘uhi te nau mamata ki ha ngaahi me‘a na‘e ‘ikai tala; pea te nau ‘ilo ‘a e me‘a na‘e ‘ikai te nau fanongo ki ai.