Read KO E TOH TAPU KATOA TONGA KO ‘AISEA 64 Bible Online

KO ‘AISEA 64 - KO E TOH TAPU KATOA TONGA bible

KO ‘AISEA 64

¹TAUMAIĀ ke ke hae ua ‘a e ngaahi langi, ke ke hā‘ele hifo, ke ngalaku ‘a e ngaahi mo‘unga ‘i ho‘o fotu mai! —

²hangē ko e tutu ‘e he afi ha hulu, fakalili ‘a e vai ‘e he afi — ke faka‘ilo ho huafa ki ho ngaahi fili, ke tete ‘a e ngaahi pule‘anga ‘i ho ‘ao ‘i ho‘o fai me‘a fakailifia na‘e ‘ikai te mau ‘amanaki ki ai!

³taumaiā ke ke hā‘ele hifo, ke ngalaku ‘a e ngaahi mo‘unga ‘i ho‘o fotu mai!

⁴He talu mei tuai kuo te‘eki ke tala mai, kuo te‘eki ke ‘ilo ‘e he telinga, te‘eki sio ‘e he mata, ha ‘Otua ‘oku ngāue pehē ma‘ana ‘oku ‘amanaki kiate ia, ko e ‘Afiona pē.

⁵‘Oku ke fetaulaki mo ia ‘oku fai fiefia ‘a e totonu, ‘a kinautolu ‘oku manatu kiate koe ‘i ho ngaahi founga: vakai, na‘a mo koe na‘e houhau mai, pea na‘e mahino ‘emau angahala: kuo mau pehē fuoloa, pea ‘e fakamo‘ui kimautolu?[143]

⁶Pea kuo mau hoko ‘o hangē ha taha ta‘ema‘a, homau kotoa; pea ko ‘emau ngaahi ngāue totonu ‘oku hangē ia ko e kofu pani toto: pea ‘oku mau mae kotoa hangē ha lou‘akau; pea ko ‘emau ngaahi kovi ‘oku ‘ave kimautolu hangē ha matangi.

⁷Pea ‘oku ‘ikai ha taha na‘e tāpafua ho huafa, na‘e o‘io‘i ke puke ma‘u kiate koe: he kuo ke fufū ho fofonga meiate kimautolu, pea ke tuku ke mau ‘auhia ‘i he ngāue ‘a ‘emau ngaahi kovi.

⁸Pea ko eni, ‘e Sihova, ko ‘emau tamai koe; ko kimautolu ko e ‘umea, pea ko koe ko ‘emau tufunga; pea ko e ngāue ‘a ho nima ‘a kimautolu kotoa pē.

⁹‘E Sihova, ‘oua te ke ha‘aki houhau mai, pea ‘oua te ke fakamanatu kovi ‘o ta‘engata: sio ange, vakai mu‘a, ko ho kakai ‘a kimautolu kotoa.

¹⁰Ko ho ngaahi kolo tapu kuo hoko ko e toafa, ko Saione kuo hoko ko e toafa, ko Selusalema ko e lala.

¹¹Ko homau fale tāpuhā, ko e lāngilangi ‘omautolu, ‘a ia na‘e fai ai ‘e he‘emau ngaahi kui ‘a e fakamālō ‘o e ‘Afiona, ko e me‘akai ia ‘a e afi; pea ko ‘emau ngaahi me‘a faka‘ofo‘ofa kotoa ko e koto ka‘anga pē.

¹²Pea te ke kei fakama‘uma‘u, ‘e Sihova, neongo e ngaahi me‘a pehē? te ke fakalongo pē, ‘o tuku homau fakavaivai‘i ke a‘u?