Read KO E TOH TAPU KATOA TONGA KO ‘AISEA 65 Bible Online

KO ‘AISEA 65 - KO E TOH TAPU KATOA TONGA bible

KO ‘AISEA 65

¹NA‘A KU nofo ke tali huhū ki he kakai na‘e ‘ikai te nau ‘eke ha me‘a; na‘a ku humaki au ki ha kakai na‘e ‘ikai ke kumi mai: na‘a ku pehē, Ko au eni, ko au eni, ki ha pule‘anga na‘e ‘ikai ke tāpafua hoku hingoa.

²‘Oku ‘osi atu ‘a e ‘aho mo e ta‘alo hoku nima ni ki ha kakai talangata‘a, ko e fa‘ahinga na‘e fou ‘i ha hala na‘e ‘ikai lelei, he muimui ki he ngaahi fakakaukau ‘anautolu;

³ko e fa‘ahinga na‘e faka‘ī‘ī ma‘u pē kiate au, ‘o mātu‘aki fai ki hoku mata, ‘enau fai feilaulau ‘i he ngaahi ngouetapu,[144] mo tutu ‘inisēnisi ‘i he ngaahi funga maka ‘umea;

⁴‘a e fa‘ahinga ‘oku nofo ‘i he ngaahi fa‘itoka, pea mohe ‘i he ngaahi potu ‘oku punupunu; ‘oku kai ‘a e kakano ‘o e puaka, pea ko e vaihū, ko e koto me‘a fakalielia, ‘oku ‘i he‘enau ngaahi ipu.

⁵Ko e fa‘ahinga ‘oku nau pehē, Tu‘u atu pē hena, ‘oua te ke ofi mai kiate au, he ‘oku ou tapu kiate koe. Ko e fa‘ahinga ko ia ko e ‘ahu ‘i hoku ihu, ko e afi ‘oku ulo ma‘u pē.

⁶Vakai, kuo tohi ia ‘i hoku ‘ao: ‘e ‘ikai te u fakalongo pē, kae‘oua ke u totongi, ‘io, te u totongi pē ki honau fatafata,

⁷‘a ho‘omou ngaahi kovi, mo e ngaahi kovi ‘a ho‘omou ngaahi kui fakataha — ko e folofola ia ‘a Sihova — ‘a ‘enau tutu ‘inisēnisi ‘i he ngaahi funga mo‘unga, mo ‘enau talakaa‘i au ‘i he ngaahi funga sia: pea te u tomu‘a fua ‘a e totongi ‘o ‘enau ngāue ki honau fatafata ‘onautolu.

⁸Ko eni ‘a e folofola ‘a Sihova, Hangē ka ‘ilo ha kālepi ni‘ihi ‘i ha fuhinga, pea ‘oku lau leva ke ‘oua ‘e faka‘auha ia, he ‘oku ai ha tāpuaki ‘i ai: ‘e pehē ‘eku fai telia ‘eku kau tamaio‘eiki, ‘o ‘oua na‘a ku faka‘auha hono kotoa.

⁹Pea te u fakatupu ha hako meia Sēkope, mo ha taha meia Siuta ke ne ma‘u hoku ngaahi mo‘unga: pea ‘e tofi‘a ‘aki ia ‘e he‘eku fanga pele, pea ‘e nofo‘i ia ‘e he‘eku kau tamaio‘eiki.

¹⁰Pea ‘e hoko ‘a Sāloni ko e kaikai‘anga ‘o e fanga sipi, mo e tele‘a ko ‘Ākoli ko e potu ke tākoto ai ‘a e fanga pulu, ma‘a hoku kakai ‘oku kumi kiate au.

¹¹Pea ko e me‘a kiate kimoutolu kuo mou li‘aki ‘a Sihova, ‘a e fa‘ahinga ‘oku fakangalongalo‘i hoku mo‘unga tapu,[145] ‘a e fa‘ahinga ‘oku teu ‘a e tēpile kia Monū, mo fakatau ‘a e kava kia Pau —

¹²‘io, kuo u tuku pau kimoutolu ki he heletā, pea te mou punou kotoa ki he tāmate‘i: koe‘uhiā na‘a ku ui, pea na‘e ‘ikai te mou tali; na‘a ku lea, pea na‘e ‘ikai te mou fanongo; pea na‘a mou fai ‘a e me‘a na‘e hā kovi kiate au, pea ko e me‘a na‘e ‘ikai te u manako ki ai ‘a ia na‘a mou fili ki ai.

¹³Ko ia, ko eni ‘a e folofola ‘a ‘Ātonai Sihova: Vakai, ko ‘eku kau sevāniti te nau kai, kae honge ‘a kimoutolu: vakai ko ‘eku kau sevāniti ‘e inu, kae fie inua kimoutolu: vakai ko ‘eku kau sevāniti te nau fiefia, ka ko kimoutolu ‘e mā:

¹⁴vakai ko ‘eku kau sevāniti te nau mavava ‘i he fiefia honau loto, ka ko kimoutolu te mou tangi ko e mamahi homou loto, pea te mou ‘oiauē ‘i he fasi homou laumālie.

¹⁵Pea te mou tuku homou hingoa ko e me‘a ke fai ai ha tuki ‘e hoku kakai fili, pea ‘e tāmate‘i koe ‘e ‘Ātonai Sihova. Ka ko ‘ene kau sevāniti, te ne ui‘aki ha hingoa kehe:

¹⁶ko ia ‘ilonga ha taha ‘i he fonua ‘oku ne fai ha talamonū ‘o‘ona, te ne talamonū ‘i he huafa ‘o e ‘Otua ‘o ‘Ēmeni; pea ko ia ‘i he fonua ‘oku fai ‘ene fuakava, te ne fai ‘i he huafa ‘o e ‘Otua ‘o ‘Ēmeni; koe‘uhi kuo ngalo ‘a e ngaahi faingata‘a mu‘a, pea koe‘uhi kuo nau puli mei hoku mata.

¹⁷He vakai, ‘oku ou fakatupu ha ngaahi langi fo‘ou mo ha fonua fo‘ou: pea ‘e ‘ikai manatua ‘a e ‘uluaki, pea ‘e ‘ikai te nau hake ‘i he loto ‘o ha taha.

¹⁸‘Ikai, ka mou fiefia mo tome‘e ‘o ta‘engata, ‘i he me‘a ‘oku ou fakatupu: he ko au eni ‘oku ou fakatupu fo‘ou ‘a Selusalema ko e koto tome‘e, pea ko hono kakai ko e koto fiefia.

¹⁹Pea te u tome‘e mo au ‘i Selusalema, pea te u fiefia ‘i hoku kakai: pea ‘e ‘ikai toe ongo‘i ai ‘a e tangi mo e ‘oiauē.

²⁰‘E ‘ikai toe tupu mei ai ha valevale ‘oku lau ‘aho pē, mo ha motu‘a ‘oku te‘eki fakakakato hono taimi: he ko ia ‘oku ne pekia talavou ‘oku ne teau ta‘u, pea ko e angahala te ne teau ta‘u pea toki ma‘u ‘e he mala.

²¹Pea te nau langa fale, ‘o nofo ai; pea te nau tō ngoue vaine, pea kai hono fua.

²²‘E ‘ikai te nau langa, kae nofo ai ha taha kehe; ‘e ‘ikai te nau tō, kae kai ‘e ha taha kehe: he hangē ko e fuoloa ‘o ha ‘akau ‘e pehē ‘a e fuoloa ‘a hoku kakai; pea ko ‘eku fanga pele te nau ‘osiki ‘a e ngāue ‘a honau nima.

²³‘E ‘ikai te nau fakaongosia noa, pea ‘e ‘ikai te nau fakatupu fānau ke fakapoongi; he ko e hako kinautolu ‘o e kau tāpuekina meia Sihova, pea ‘e fe‘ao mo kinautolu ‘a honau pikilau.

²⁴Pea ‘i he taimi ko ia, kuo te‘eki te nau kamata ui, kuo u tali; ‘oku nau kei lea, kuo u ongo‘i.

²⁵Ko e ulofi mo e lami te na kaikai fakataha, pea ko e laione te ne kai kau‘i koane hangē ko e pulu: pea ko e ngata — ko e efu ‘ene me‘akai ‘a‘ana. ‘E ‘ikai te nau fai ha maumau, pea ‘e ‘ikai te nau fai ha faka‘auha ‘i he kotoa ‘o ‘eku mo‘unga tapu[146] — ko e folofola ia ‘a Sihova.