Read KO E TOH TAPU KATOA TONGA KO ‘AISEA 66 Bible Online

KO ‘AISEA 66 - KO E TOH TAPU KATOA TONGA bible

KO ‘AISEA 66

¹KO eni ‘a e folofola ‘a Sihova, Ko e langi ‘a hoku taloni, pea ko māmani ‘a hoku tu‘ungava‘e; ko e hā tū ‘a e fale ‘oku mou lau ke langa mo‘oku?

²pea ko e hā ‘a e anga ‘o e potu te u toka ai? He ko e ngaahi me‘a kotoa ko ē na‘e ngaohi ‘e hoku nima, ko ia na‘e hoko mei ai ‘a e me‘a ko ena kotoa — ko Sihova ia mei he Ta‘ehāmai: ka ko e fa‘ahinga ‘oku ou sio ki ai, ‘a kinautolu ‘oku ongo‘i masiva, pea ‘oku loto mafesi, pea ‘oku tete ‘i he‘eku lea.

³Ko ia ‘oku tāmate‘i ha pulu ko e fakapō tangata ia; ko ia ‘oku feilaulau ‘aki ha sipi, ko e taha ia ‘oku fesi‘i ‘a e kia ‘o ha kulī; ko ia ‘oku ne ‘atu ha feilaulau-me‘akai, ko e toto ‘o e puaka ia; ko ia ‘oku ne ‘atu ha laipeno fakamanatu, ‘oku ne tāpuaki‘i ha ‘aitoli.

⁴Kuo fili koā ‘e he fa‘ahinga ko ia honau founga, pea ‘oku manako ‘e honau loto ki he‘enau ngaahi fakalielia? Lelei, te u fili ‘e au foki hanau ngaahi tu‘utāmaki, pea te u ‘omi kiate kinautolu ‘a e ngaahi me‘a ‘oku nau ilifia ki ai: koe‘uhiā na‘a ku ui, ka na‘e ‘ikai ha taha ‘e tali; na‘a ku lea, ka na‘e ‘ikai te nau fanongo: pea na‘a nau fai ‘a e me‘a na‘e hā kovi kiate au, pea ko e me‘a na‘e ‘ikai te u manako ki ai ‘a ia na‘a nau fili ki ai.

⁵Fanongo ki he folofola ‘a Sihova, ‘a kimoutolu ‘oku tete ‘i he‘ene lea. Ko homou kāinga ‘oku fehi‘a kiate kimoutolu, ‘oku nau kapusi kimoutolu koe‘uhi ko hoku hingoa, ‘oku lau ‘e kinautolu ‘o pehē, Tuku ke fakalāngilangi‘i ia ‘e Sihova, ka mau sio ki ho‘omou fiefia. ‘Ā, ko e fa‘ahinga ko ia ‘e mā.

⁶Tū ‘oku longoa‘a mai ‘a e kolo, Tū ‘oku longoa‘a mai ‘a e temipale, Ko e longoa‘a ‘o e faitotongi ‘e Sihova Ki hono ngaahi fili.

⁷Te‘eki ke langā ‘a e fefine ko ē, na‘a ne fā‘ele; Te‘eki ke kamata ‘ene mamahi, kuo ‘i tu‘a ‘a e tamasi‘i tangata.

⁸Ko hai kuo ne fanongo ki ha me‘a pehē? Ko hai kuo mamata ki ha ngaahi me‘a hangē ko ena? ‘Oku fā‘ele‘i koā ha fonua kotoa ‘i ha ‘aho pē taha? ‘Io, ‘oku fanau‘i ha pule‘anga ‘i ha feinga pē taha? He kuo langā ‘a Saione? Kuo ne fā‘ele‘i foki ‘ene fānau.

⁹He ko e taha au ke kamata ‘a e fānau, ‘o ‘ikai fakahao ki tu‘a? — ko e folofola ia ‘a Sihova — ‘io, ko e taha au ke fakafā‘ele, pea toki ta‘ofi? — ko e folofola ia ‘a ho ‘Otua.

¹⁰Mou kaungā fiefia mo Selusalema, mo tome‘e ‘iate ia, ‘a kimoutolu kotoa ‘oku ‘ofa ki ai: mou mātu‘aki kaungā fiefia mo ia, ‘a kimoutolu kotoa ‘oku tangi koe‘uhi ko ia:

¹¹koe‘uhi ke mou huhu ke topono mei he mata‘i huhu ‘o hono fakafiemālie, koe‘uhi ke mou komo he fu‘u fiefia, ‘a e puhi mai hono lāngilangi.

¹²He ko eni ‘a e folofola ‘a Sihova, Ko au eni ‘oku ou tolo atu kiate ia ‘a e fiemālie hangē ha vaitafe, pea ko e ouau ‘o e ngaahi pule‘anga hangē ha vaifā, pea te mou komo ai; ‘e fafa fakavakavaka kimoutolu, pea ‘e alaala ‘ofa kiate kimoutolu ‘i he funga tui.

¹³Hangē ha siana ‘oku fakalelu‘i ‘e he‘ene fa‘ē, ‘e pehē ‘eku fakalelu‘i kimoutolu: ‘io, ‘e fakalelu‘i kimoutolu ‘i Selusalema.

¹⁴Pea te mou sio ki ai, pea ‘e fonu fiefia homou loto, pea ‘e tupu homou ngaahi hui ‘o hangē ha mohuku mui: ‘io, ‘e mahino ‘a e nima ‘o Sihova ki he‘ene kau sevāniti; ka te ne ‘itangi hono ngaahi fili.

¹⁵He vakai, ‘e hā‘ele mai ‘a Sihova mo e afi, pea ko ‘ene ngaahi sāliote ‘e hangē ha ‘ahiohio; ke fakaai hono houhau ‘aki ‘a e vela, mo ‘ene fakamana ‘aki ‘a e ngaahi ulo ‘o e afi.

¹⁶‘E fai fakamaau ‘a Sihova ‘aki ‘a e afi; ‘io, ‘oku ne fai‘aki ‘ene heletā ki he kakano kotoa: pea ‘e tokolahi ‘a e tō ‘a Sihova.

¹⁷Ko e fa‘ahinga ‘oku fakatāpui kinautolu, mo fakama‘a kinautolu, ke ‘alu ki he ngaahi ngouetapu[147] he muimui ki ha taha ‘oku tu‘u loto; ‘a e fa‘ahinga ‘oku kai ‘a e kakano ‘o e puaka, mo e ngaahi fakalielia, kae‘uma‘ā ‘a e kumā; ‘e tu‘usi kinautolu fakataha — ko Sihova ia mei he Ta‘ehāmai.

¹⁸Ka ko au, ko[148] ‘enau ngaahi ngāue mo ‘enau ngaahi fakakaukau[149] ke tānaki ‘a e ngaahi pule‘anga kotoa mo ‘enau ngaahi fa‘ahinga lea ke nau ha‘u ‘o sio ki hoku lāngilangi.

¹⁹Pea te u ‘ai kiate kinautolu ha faka‘ilonga, pea te u tuku atu ha hao meiate kinautolu, ke ‘alu ki he ngaahi pule‘anga, ki Tāsisi,[150] Puli,[151] mo Luti, ‘a kinautolu ‘oku teke ‘a e kaufana, ki Tūpale mo ‘Iavana,[152] ki he ngaahi motu mama‘o, ‘a ia kuo te‘eki ke nau fanongo ki hoku ongoongo, pea te‘eki ke nau mamata ki hoku lāngilangi; pea ‘e faka‘ilo ‘e he fa‘ahinga ko ia hoku lāngilangi ki he ngaahi pule‘anga.

²⁰Pea te nau ‘omi homou kāinga kotoa mei he pule‘anga kehekehe, ko e me‘a‘ofa kia Sihova, kuo nau heka hoosi mo e sāliote mo e ngaahi fale ha‘amo, pea kuo heka ki he fanga miuli mo e kāmeli fefine, ke a‘usia hoku mo‘unga tapu,[153] ‘a Selusalema — ko e folofola ‘a Sihova ia-‘o hangē ko e fa‘a ‘omi ‘e ha‘a ‘Isileli ‘a e feilaulau-me‘akai ‘i ha ipu ma‘a ki he fale ‘o Sihova.

²¹Pea te u to‘o foki meiate kinautolu hanau ni‘ihi, ke fakalahi ‘aki ‘a e kau taula‘eiki mo e kau Līvai — ko e folofola ia ‘a Sihova.

²²He hangē ‘oku fe‘ao ma‘u pē mo au ‘a e ngaahi langi fo‘ou mo e fonua fo‘ou ‘a ia ‘oku ou ngaohi — ko Sihova ia mei he Ta‘ehāmai — ‘e pehē ‘a e fe‘ao mo au homou hako mo homou hingoa.

²³Pea ‘i he taimi ko ia, mei he māhina fo‘ou ki he māhina fo‘ou, pea mei he Sāpate ki he Sāpate, ‘e ha‘u ‘a e kakano kotoa ke lotu ‘i hoku ‘ao — ko e folofola ia ‘a Sihova.

²⁴Pea te nau hū ki tu‘a ke siofi ‘a e ngaahi ‘anga‘anga ‘o e kakai na‘e talangata‘a kiate au: he ko honau ‘uanga ‘e ‘ikai mate, pea ko honau afi ‘e ‘ikai fu‘ifu‘i; pea te nau hoko ko e me‘a ke fakalili‘a ki ai ‘a e kakano kotoa.