Read KO E TOH TAPU KATOA TONGA KO ‘AISEA 7 Bible Online

KO ‘AISEA 7 - KO E TOH TAPU KATOA TONGA bible

KO ‘AISEA 7

¹PEA na‘e hoko ‘i he taimi ‘o ‘Āhasi foha ‘o Siotame foha ‘o ‘Ūsaia ko e Tu‘i Siuta, na‘e ‘alu hake ‘a Lēsini ko e Tu‘i Sīlia, mo Peka foha ‘o Lemalaia ko e Tu‘i ‘Isileli, ki Selusalema ke fai tau ki ai; ka na‘e ‘ikai te ne lava ke ikuna ia.

²Pea na‘e fakahā ki he Fale ‘o Tēvita, ‘o pehē, Kuo tālolo ‘a Sīlia, ‘o kau mo ‘Ifalemi, Toki ngaue hono loto, mo e loto ‘o hono kakai, ‘o hangē ko e ngaue ‘a e ‘akau ‘o e vao ‘i he falala mai ha matangi.

³Pea folofola ‘a Sihova kia ‘Aisea, Eni, hū ki tua‘ā, ‘a koe mo ho foha ko Sea-sisupi,[14] ke fakafetaulaki kia ‘Āhasi, ki he ngata‘anga ‘o e takinga vai ‘o e lepa ‘olunga, ki he hala tanu ‘o e fō kofu.

⁴Pea ke lea kiate ia ‘o pehē, Tokanga ke nofo nonga; ‘oua te ke manavahē, pea ‘oua na‘a vai ho loto telia ‘a e ongo potu‘i ngau‘aafi kohu na; telia ‘a e ‘ita kakaha ‘a Lēsini mo Sīlia, pea mo e foha ‘o Lemalaia.

⁵Ko e me‘a ‘i he puleaki‘i koe ‘e Sīlia, ‘Ifalemi, mo e foha ‘o Lemalaia, ‘o pehē,

⁶“Tau ‘alu hake ki Siuta, ‘o fakahoha‘asi ia; Pea tau hae atu ma‘atautolu, Pea tau fokotu‘u ha tu‘i ke tefito ki ai, ‘Io, ‘a e foha ‘o Tapeale.”

⁷Ko e folofola eni ‘a ‘Ātonai Sihova ‘E ‘ikai tu‘u ia, pea ‘e ‘ikai hoko.

⁸He ko e ‘ulu ‘o Sīlia ko Tāmasikusi, Pea ko e ‘ulu ‘o Tāmasikusi ko Lēsini: pea ‘oku kei toe ha ta‘u ‘e onongofulu mā nima, pea laiki ‘a ‘Ifalemi ‘ene nofo ko e kakai:

⁹Pea ko e ‘ulu ‘o ‘Ifalemi ko Samēlia, Pea ko e ‘ulu ‘o Samēlia ko e foha ‘o Lemalaia. Kapau ‘e ‘ikai te mou tui ‘e kimoutolu, tala atu ‘e ‘ikai te mou tu‘u kimoutolu.

¹⁰Pea fai atu ‘e Sihova ‘ene folofola kia ‘Āhasi, ‘o pehē,

¹¹Kole ma‘au ha faka‘ilonga meia Sihova ko ho ‘Otua: ‘o fai hifo ki lolofonua, pe fai hake ki he taukakapa.

¹²Pea tali ‘e ‘Āhasi, ‘E ‘ikai te u kole, he ‘ikai te u fie ala‘aki kia Sihova.

¹³Pea pehē ‘e ia, Eni, fanongo mai, Fale ‘o Tēvita; lau ‘e au kuo mou topono he fakakina‘i ‘a e kakai, ka te mou fakakina‘i hoku ‘Otua foki?

¹⁴Ko ia ‘e ‘atu hamou faka‘ilonga ‘e ‘Ātonai ‘e ia. Vakai, ‘e feitama ‘a e tāupo‘ou,[15] pea te ne ‘alo‘i ha tama, pea te ne fakahingoa ko ‘Imānuela.[16]

¹⁵Ko e pota[17] mo e honi[18] ‘ene me‘akai, fe‘unga mo ‘ene poto ke teke‘i ‘a e kovi mo fili ‘a e lelei.

¹⁶He te‘eki ke poto ‘a e tamasi‘i ke teke‘i ‘a e kovi mo fili ‘a e lelei, kuo li‘aki ‘a e kelekele ko ē, ‘a ia ‘oku ke mate teki ki hono ongo tu‘i.

¹⁷He ‘omi kiate koe ‘e Sihova, pea ki ho kakai, pea ki he fale ‘o ho tupu‘anga, ha fa‘ahinga ‘aho kuo te‘eki ke hoko talu ‘a e taimi na‘e mavahe ai ‘a ‘Ifalemi meia Siuta — ‘io, ‘a e Tu‘i ‘Āsilia.

¹⁸Pea ‘e hoko ‘i he taimi ko ia, ‘e tupulū ‘e Sihova ki he lango ‘oku ‘i he ngata‘anga ‘o e ngaahi vaitafe ‘o ‘Isipite, pea ki he pī ‘oku ‘i he fonua ‘o ‘Āsilia.

¹⁹Pea te nau omi, ‘o tālolo kotoa ‘i he ngaahi tele‘a fevanuvanu‘i, mo e ngaahi mafahifahi ‘o e makatu‘u, pea ‘i he ngaahi ‘a talatala kotoa pē, pea ‘i he ngaahi kaikai‘anga kotoa pē.

²⁰‘I he taimi ko ia ‘e fai ‘a e fafai ‘e ‘Ātonai ‘aki ‘a e tele ‘oku tuku ke nō ‘i he ongo kauvai ‘o e Vaitafe, ‘io, ko e Tu‘i ‘Āsilia: ‘io, te ne fafai ‘a e ‘ulu mo e fulufulu ‘o e va‘e: pea na‘a mo e kava ‘e tele.

²¹Pea ‘e hoko ‘i he taimi ko ia ‘e pusiaki ‘e ha tangata ha pulu mui mo ha ongo sipi fefine; ka neongo ia ‘e hulu ‘a e hu‘akau te nau ‘atu, ‘o ne kai pota[19] ai:

²²he ko e pota[20] mo e honi ko e me‘akai ia ‘a e toenga kotoa ‘oku nofo ‘i he fonua.

²³Pea ‘e hoko ‘i he taimi ko ia, ‘ilonga pē ha potu na‘e ‘i ai ha afe‘i vaine fe‘unga mo e afe‘i pa‘anga siliva, te u tuku ia ki he talatala mo e ‘akau veli.

²⁴Pea ko e ‘alu ki ai ‘e fai‘aki ‘a e ngahau mo e kaufana: he ko e fonua kotoa ko e koto talatala mo e ‘akau veli.

²⁵Pea ko e ngaahi mo‘unga kotoa na‘e keli ‘aki ‘a e huo, ‘e ‘ikai te ke a‘u ki ai ko e manavahē ki he talatala mo e ‘akau veli; kae hoko ia ko e potu ke tuku atu ki ai ‘a e fanga pulu, pea ke malamalaki ‘e he fanga sipi.