Read KO E TOH TAPU KATOA TONGA LEVITIKO 1 Bible Online

LEVITIKO 1 - KO E TOH TAPU KATOA TONGA bible

LEVITIKO 1

¹PEA ui ange ‘a Mōsese ‘e he ‘Eiki, ‘o ne folofola ki ai mei he Tēniti Fe‘iloaki‘anga, ‘o pehē,

²Lea ki ha‘a ‘Isileli, mo ke pehē kiate kinautolu, Ka ‘i ai ha tangata ‘iate kimoutolu te ne ‘oatu ha kōpano[1] ki he ‘Eiki, te ne fai ‘ene kōpano mei he‘ene fanga manu, mei he fanga pulu, pe mei he fanga sipi.

³Kapau ko e feilaulau-mōifua ‘a ‘ene kōpano, ko ha pulu, te ne ‘atu ha manu tangata ‘oku ‘ikai hano mele! te ne ‘atu ia ‘i he matapā ‘o e Tēniti Fe‘iloaki‘anga, ke hōifua ai ‘a e finangalo ‘o e ‘Eiki.

⁴Pea te ne hilifaki hono nima ki he ‘ulu ‘o e feilaulau; pea ‘e tali ia koe‘uhi ko e tangata, ko e fakalelei ma‘ana.

⁵Pea te ne tāmate‘i ‘a e pulu ‘i he ‘ao ‘o Sihova: pea ko e ngaahi foha ‘o ‘Ēlone ‘a ia ‘oku taula‘eiki, te nau ‘atu ‘a e toto, ‘o luluku ‘aki ia ‘a e ‘ōlita takatakai, ‘a ia ‘oku ‘i he mata Tēniti Fe‘iloaki‘anga.

⁶Pea te ne fohi ‘a e feilaulau, ‘o tafa ia.

⁷Pea ko e ngaahi foha ‘o ‘Ēlone ko e Taula‘eiki te nau ‘esiafi ki he ‘ōlita, mo fakamā‘opo‘opo ‘a e fefie ki he afi;

⁸pea ko e ngaahi foha ‘o ‘Ēlone, ‘a ia ‘oku taula‘eiki, te nau fakamā‘opo‘opo ‘a e ngaahi konga manu, ‘a e ‘ulu, mo e ngako, ki he fefie ‘oku ‘i he afi ‘i he ‘ōlita:

⁹ka ko hono to‘oto‘onga mo hono ngaahi alanga te ne fufulu vai: pea ‘e toki tutu ‘e he taula‘eiki hono kotoa ‘i he ‘ōlita, ko e feilaulau-mōifua fai‘aki ‘a e afi, ko e ngangatu fakahōifua kia Sihova.

¹⁰Pea kapau ko ‘ene kōpano ko e me‘a mei he‘ene fanga manu iiki, ko ha sipi pe kosi, ka ko ha feilaulau-mōifua; te ne ‘atu ha manu tangata ‘oku ‘ikai hano mele.

¹¹Pea te ne tāmate‘i ia ‘i he tafa‘aki ‘ōlita ki he tokelau, ‘i he ‘ao ‘o Sihova: pea ko e ngaahi foha ‘o ‘Ēlone, ‘a ia ‘oku taula‘eiki, te nau luluku ‘aki ‘a e ‘ōlita hono toto takatakai.

¹²Pea te ne tafa ia, ‘o tuku hono ngaahi konga mo hono ‘ulu mo hono ngako: pea ko e taula‘eiki te ne fakamā‘opo‘opo ia ‘i he funga fefie, ‘a ia ‘oku ‘i he afi ‘i he ‘ōlita:

¹³ka ko hono to‘oto‘onga mo hono ngaahi alanga te ne fufulu vai: pea ‘e ‘atu ‘e he taula‘eiki hono kotoa, ‘o tutu ‘i he ‘ōlita: ko e feilaulau-mōifua ia, fai‘aki ‘a e afi, ko e ngangatu fakahōifua kia Sihova.

¹⁴Pea kapau ko ‘ene kōpano ‘oku fai mei he manupuna, ka ko e feilaulau-mōifua, te ne fai‘aki ‘a e kulukulu, pe ha lupe mui.

¹⁵Pea ‘e ‘omi ‘e he taula‘eiki ki he ‘ōlita, pea te ne motuhi fakalouhi‘imofisi hono ‘ulu, ‘o tutu ‘i he ‘ōlita, pea te ne tatau hono toto ‘i he holisi ‘o e ‘ōlita:

¹⁶pea te ne fakangākau ia, ‘o lī ki he tafa‘aki ‘ōlita ki hahake, ki he potu ‘o e efuefu.

¹⁷Pea te ne hele hono kapakau, kae ‘ikai fahi ua; pea ‘e tutu ia ‘e he taula‘eiki ‘i he ‘ōlita ‘i he funga fefie ‘oku ‘i he afi: ko e feilaulau-mōifua ia, fai‘aki ‘a e afi, ko e ngangatu fakahōifua kia Sihova.