Read KO E TOH TAPU KATOA TONGA LEVITIKO 10 Bible Online

LEVITIKO 10 - KO E TOH TAPU KATOA TONGA bible

LEVITIKO 10

¹KA ko e ongo foha ‘o ‘Ēlone, ‘a Nātapi mo e ‘Āpiu, na‘a na to‘o takitaha ‘ene ‘ainga malala, ‘o ‘ai ki ai ha afi, ‘o tuku ki ai ha ‘inisēnisi, ‘o na ‘oatu ki he ‘ao ‘o Sihova ha afi kehe, ko e me‘a na‘e ‘ikai te ne tu‘utu‘uni kiate kinautolu.

²Pea na‘e pā atu ha afi mei he ‘ao ‘o Sihova, ‘o keina kinaua, ‘o na pekia ‘i he ‘ao ‘o Sihova.

³Pea lea ai ‘a Mōsese kia ‘Ēlone, ko eni ia na‘e folofola‘aki ‘e Sihova, ‘o pehē, Te u tāpuhā‘ia ‘iate kinautolu ‘oku taka ofi mai, pea te u lāngilangi‘ia ‘i he ‘ao ‘o e kakai kotoa.[4] Pea na‘e longo pē ‘a ‘Ēlone.

⁴Pea na‘e ui ange ‘e Mōsese ‘a Misaeli mo ‘Elisafani, ko e ongo foha ‘o ‘Osieli, ko e tu‘asina ‘o ‘Ēlone, ‘o ne pehē kiate kinaua, ‘Unu‘unu mai: ‘ave homou kāinga mei he mata Fale Tapu ki he tu‘a ‘apitanga.

⁵Ko ia na‘a na ‘unu‘unu atu, ‘o na ‘ave ai pē kinaua mo hona sote ki he tu‘a ‘apitanga, hangē ko e me‘a ‘a Mōsese.

⁶Pea lea ‘a Mōsese kia ‘Ēlone, pea kia ‘Eliesa mo ‘Ītama ko hono ongo foha, ‘Oua ‘e tuku mafue homou ‘ulu, pea ‘oua ‘e hae homou kofu; koe‘uhi ke ‘oua te mou mate, pea ke ‘oua ‘e tō ha houhau ki he fakataha kotoa: kae tuku ki homou kāinga, ‘a ha‘a ‘Isileli kātoa, ke tēngihia ‘a e faka‘auha kuo fai ‘e Sihova.

⁷Pea ‘e ‘ikai te mou hū mai mei he matapā ‘o e Tēniti Fe‘iloaki‘anga, na‘a mou mate, he ko e lolo pani ‘a Sihova ‘oku ‘iate kimoutolu. Pea na‘a nau fai hangē ko e lea ‘a Mōsese.

⁸Pea folofola ‘a Sihova kia ‘Ēlone, ‘o pehē,

⁹‘Oua ‘e inu ha uaine pe ha kava mālohi, ‘a koe pe ko ho ngaahi foha, ‘oka mou ka hū ki he Tēniti Fe‘iloaki‘anga, telia na‘a mou mate (ko e tapu ta‘engata ia ki homou ngaahi to‘utangata):

¹⁰pea koe‘uhi ke mou ‘ilo ‘a e faikehekehe ‘o e me‘a ‘oku tapu mo e me‘a ‘oku palahi, mo e me‘a ‘oku ta‘ema‘a mo e me‘a ‘oku ma‘a;

¹¹pea ke mou ako ki ha‘a ‘Isileli ‘a e ngaahi tu‘utu‘uni ‘a ia kuo folofola‘aki ‘e Sihova kiate kinautolu ‘ia Mōsese.

¹²Pea lea ‘a Mōsese kia ‘Ēlone, pea kia ‘Eliesa mo ‘Ītama ko hono ongo foha na‘e toe, ‘o pehē, To‘o ‘a e feilaulau-me‘akai, ‘a e me‘a ‘oku toe ‘i he ngaahi feilaulau ‘a Sihova fai‘aki ‘a e afi, pea mou kai ia ta‘eha lēvani ‘i he tafa‘aki ‘o e ‘ōlita: he ko e me‘a toputapu ia.

¹³Pea te mau kai ia ‘i ha potu ‘oku tapu; he ko ho ‘inasi, mo e ‘inasi ‘o ho ngaahi foha ‘i he ngaahi feilaulau ‘a Sihova ‘oku feia ‘aki ‘a e afi: he na‘e pehē hoku fekau.

¹⁴Pea ko e fatafata tākalo mo e tefito alanga hapai te mou kai ‘i ha potu ‘oku ma‘a; ‘a koe, mo ho‘o fānau tangata, mo ho‘o fānau fefine, fakataha: he kuo foaki ia ko ho ‘inasi, mo e ‘inasi ‘o ho ngaahi foha, mei he ngaahi feilaulau-‘ofa ‘a ha‘a ‘Isileli,

¹⁵te nau ‘omi ‘a e tefito alanga ‘oku hapai ‘aki, mo e fatafata ‘oku tākalo ‘aki, fakataha mo e ngaahi ngako ‘oku tutu, ke feia ‘aki ha feilaulau-tākalo ‘i he ‘ao ‘o Sihova; pea ‘e ‘a‘au ia mo ho ngaahi foha foki, ko e ‘inasi ta‘engata; ‘o hangē ko e tu‘utu‘uni ‘a e ‘Eiki.

¹⁶Pea fiu‘a kumi ‘e Mōsese ‘a e kosi tangata feilaulau-angahala, pea tā kuo faka‘auha ia ‘aki ‘a e afi: pea na‘a ne ‘ita kia ‘Eliesa mo ‘Ītama, ko e ongo foha ‘o ‘Ēlone na‘e toe, ‘o ne pehē,

¹⁷Ko e hā na‘e ‘ikai te mou kai ‘a e feilaulau-angahala ‘i ha potu tapu; he ko ha me‘a toputapu ia, pea kuo ne ‘atu ia kiate kimoutolu ke ‘ave ‘a e kovi ‘o e fakataha, ke fai ha fakalelei ma‘anautolu ‘i he ‘ao ‘o Sihova?

¹⁸Tā na‘e ‘ikai ‘omi hono toto ki he loto Potu Tapu: na‘e totonu ke mou kai ia ‘i he Potu Tapu, ‘o hangē ko ‘eku fekau.

¹⁹Pea lea ‘a ‘Ēlone kia Mōsese; Vakai, ko e ‘aho eni ia na‘a nau ‘atu ‘enau feilaulau-angahala ‘i he ‘ao ‘o Sihova, mo ‘enau feilaulau-mōifua; pea kuo hoko kiate au ‘a e ngaahi me‘a pehē mo pehē: pea ka ne u kai ‘a e feilaulau-angahala he ‘aho ni, ‘e hōifua ai koā ‘a e finangalo ‘o Sihova?

²⁰Pea ‘i he fanongo ‘a Mōsese ki ai, na‘e hā lelei kiate ia.