Read KO E TOH TAPU KATOA TONGA LEVITIKO 11 Bible Online

LEVITIKO 11 - KO E TOH TAPU KATOA TONGA bible

LEVITIKO 11

¹PEA folofola ‘a e ‘Eiki kia Mōsese mo ‘Ēlone, ‘o ne pehē kiate kinaua,

²Lea ki ha‘a ‘Isileli, ‘o pehē, Ko eni ia ‘a e me‘a mo‘ui te mou kai, ‘i he ngaahi fa‘ahinga manu ‘oku ‘i he fonua.

³‘Ilonga ha manu ve‘efā ‘oku mavaeua ‘a e pesipesi, ‘o mafahi ‘aupito, mo kai fakahake, te mou kai ia.

⁴Ka ko e ni‘ihi eni ‘e ‘ikai te mou kai ‘i he fa‘ahinga ‘oku kai fakahake, mo e fa‘ahinga ‘oku mavaeua ‘a e pesipesi: ko e kāmeli; he neongo ‘oku ne kai fakahake, ka ‘oku ‘ikai ke mavaeua hono pesipesi: ‘oku ta‘ema‘a ia kiate kimoutolu.

⁵Ko e safana foki; he neongo ‘oku ne kai fakahake, ka ‘oku ‘ikai ke mavaeua ‘a e pesipesi: ‘oku ta‘ema‘a ia kiate kimoutolu.

⁶Pea mo e hea, he neongo ‘oku ne kai fakahake, ka ‘oku ‘ikai ke mavaeua ‘a e pesipesi; ‘oku ta‘ema‘a ia kiate kimoutolu.

⁷Pea ko e puaka, neongo ‘oku mavaeua ‘a e pesipesi, ‘o mafahi ‘aupito, ka ‘oku ‘ikai ke kai fakahake: ‘oku ta‘ema‘a ia kiate kimoutolu.

⁸Ko honau kakano ‘e ‘ikai te mou kai, pea ko honau ‘anga‘anga ‘e ‘ikai te mou lave ki ai: ko e fa‘ahinga ta‘ema‘a ia kiate kimoutolu.

⁹Ko eni ia ‘a e me‘a te mou kai ‘i he fa‘ahinga ‘oku ‘i he vai; ‘ilonga ha me‘a ‘i he ngaahi vai mo e ngaahi tahi mo e ngaahi vaitafe, ‘a ia ‘oku kaponga mo ‘uno, te mou kai ia.

¹⁰Ka ka ‘ilonga ha me‘a ‘i he ngaahi tahi mo e ngaahi vaitafe, ‘a e ngaahi fa‘ahinga ‘oku ngaue ‘i he vai, ‘a e me‘a mo‘ui kehekehe ‘oku ‘i he ngaahi vai, ka ‘ikai ke kaponga mo ‘uno ko e me‘a fakalielia ia kiate kimoutolu.

¹¹‘Io, te mou fakalielia‘ia ai: ‘e ‘ikai te mou kai hono kakano, pea te mou fakalili‘a ki honau ‘anga‘anga.

¹²‘Ilonga ha me‘a ‘i he vai ‘oku ‘ikai ke kaponga mo ‘uno, ko e me‘a fakalielia ia kiate kimoutolu.

¹³Pea ‘i he fa‘ahinga manu kapakau ko eni ia te mou fakalielia‘ia ai; ‘e ‘ikai kai: ko e fa‘ahinga fakalielia; ko e ‘īkale, mo e fesifesihui.

¹⁴Mo e ‘osipalei; mo e kaite mo e ha‘a fao kona:

¹⁵ko e fa‘ahinga lēveni kotoa pē;

¹⁶pea mo e ‘ositalesi mo e ta‘amasi mo e tala mo e ha‘a haoke;

¹⁷mo e lulu, mo e komolani, mo e lulu lahi.

¹⁸Pea mo e ipisi mo e pelikani, mo e vulitua;

¹⁹pea mo e sitoaki mo e ha‘a motuku mo e hupo, pea mo e peka.[5]

²⁰‘Ilonga ‘a e fa‘ahinga totolo ‘oku kapakau, mo ‘alu hangē ha ve‘efā, ko e me‘a fakalielia ia kiate kimoutolu.

²¹Ka te mou kai eni ‘i he fa‘ahinga totolo ‘oku kapakau ‘o ‘alu hangē ha ve‘efā, ‘a ia ‘oku ‘i ai ha ongo alanga ‘oku ‘i ‘olunga ‘i he kau va‘e ke hopo ‘aki ‘i he funga kelekele;

²²‘io, ko eni ‘a e fa‘ahinga te mou kai; ‘a e ha‘a kakalu, mo e ha‘a sōlani; ‘a e ha‘a kakoli, mo e ha‘a he‘e.

²³Ka ko e fa‘ahinga totolo kotoa ‘oku kapakau, pea ai hanau va‘e ‘e fā, ko e me‘a fakalielia ia kiate kimoutolu.

²⁴Pea ko eni ia ‘a e me‘a te mou ta‘ema‘a ai: ‘io, ko ia te ne lave ki honau ‘anga‘anga te ne ta‘ema‘a ai ‘o a‘u ki he po‘uli;

²⁵pea ko ia ‘oku ne fua ha konga ‘o honau ‘anga‘anga te ne fō hono kofu, pea te ne ta‘ema‘a ‘o a‘u ki he po‘uli.

²⁶Ko e manu ve‘efā kotoa pē ‘oku vaeua hono pesipesi, ka ‘oku ‘ikai ke mafahi ‘aupito pea ‘oku ‘ikai ke kai fakahake; ‘oku ta‘ema‘a ‘a e fa‘ahinga ko ia: ka ai ha taha ‘e lave ki ai, te ne ta‘ema‘a leva.

²⁷Pea ‘ilonga ha taha ‘i he me‘a mo‘ui fakave‘efā, ‘a ia ‘oku ‘alu ‘aki hono ‘aofiva‘e, ‘oku ta‘ema‘a ia kiate kimoutolu; ka lave ha taha ki hono ‘anga‘anga, te ne ta‘ema‘a ‘o a‘u ki he po‘uli.

²⁸Pea ko ia te ne fua ‘a e ‘anga‘anga ‘o ha taha ‘i he fa‘ahinga ko ia, te ne fō hono kofu, pea te ne ta‘ema‘a ‘o a‘u ki he po‘uli; ko e me‘a ta‘ema‘a kiate kimoutolu ‘a e fa‘ahinga ko ia.

²⁹Pea ko eni ia ‘oku ta‘ema‘a kiate kimoutolu ‘i he fa‘ahinga ‘oku totolo ‘i he kelekele: ko e viseli, mo e kumā,

³⁰mo e ha‘a moko mo e ‘ānaka mo e koaka, mo e lēta‘a, mo e kōmeta, pea mo e fōkai.

³¹Ko ia ia ‘oku ta‘ema‘a kiate kimoutolu ‘i he fa‘ahinga ‘oku totolo; ka lave ha taha ki ha manu pehē ‘oku mate, te ne ta‘ema‘a ‘o a‘u ki he po‘uli.

³²Pea ka ai ha me‘a ‘e tō ki ai ha manu pehē kuo mate, ‘e ta‘ema‘a ‘a e me‘a ko ia: pe ko ha ipu ‘akau, pe ko ha kofu pe ha kili‘imanu, pe ha tangai, pe ko e hā fua ha nāunau ‘oku fai‘aki ha ngāue, ‘e tuku ia ki ha vai, pea ‘e ta‘ema‘a ‘o a‘u ki he po‘uli: pea ‘e toki ma‘a.

³³Pea ka tō ha me‘a pehē ki ha ipu ‘umea, ‘e ta‘ema‘a leva ‘a e me‘a kotoa ‘oku ‘i ai; pea te mou laiki ‘a e ipu.

³⁴‘Ilonga ha me‘akai na‘e mei kai, kuo teu ‘aki ha vai, ka ‘e ta‘ema‘a pē; pea ‘ilonga ha me‘a inu na‘e mei inu, ka ‘e ta‘ema‘a pē ‘i ha ipu pehē.

³⁵Pea ‘ilonga ha me‘a ‘e tō ki ai ha konga ‘o e ‘anga‘anga ‘o ha manu pehē, ‘e ta‘ema‘a pē: pe ko ha ‘ōvani, pe sitou, ka ‘e laiki pē; ‘oku nau ta‘ema‘a, pea te nau ta‘ema‘a kiate kimoutolu.

³⁶Ka ‘o kapau ko ha fauniteni, pe lepa, ‘a ia ‘oku tānaki ai ha vai, ‘e ma‘a pē ia; ka ko ia te ne ala ki he ‘anga‘anga te ne ta‘ema‘a.

³⁷Pea ka tō ha konga ‘o e ‘anga‘anga ki ha pulopula kuo tuku ke tō, ‘e ma‘a pē ia.

³⁸Ka ‘oka kuo fakavai ‘a e tenga, pea tō ki ai ha konga ‘o e ‘anga‘anga, ‘e ta‘ema‘a ia kiate kimoutolu.

³⁹Pea ka mate ha manu na‘e mei kai, ko ia ‘oku ne ala ki he ‘anga‘anga te ne ta‘ema‘a ‘o a‘u ki he po‘uli;

⁴⁰pea ko ia te ne kai ha me‘a mei he ‘anga‘anga te ne fō hono kofu, pea te ne ta‘ema‘a ‘o a‘u ki he po‘uli: pea ko ia te ne ‘ave ‘a e ‘anga‘anga te ne fō hono kofu, pea te ne ta‘ema‘a ki he po‘uli.

⁴¹Pea ko e fa‘ahinga kotoa ‘oku totolo ‘i he kelekele ko e me‘a fakalielia ia; e ‘ikai kai.

⁴²‘Ilonga ‘a e fa‘ahinga ‘oku ‘alu ‘aki hono kete, mo e fa‘ahinga ‘oku ‘alu fakave‘efā, ‘o hulu atu ki he ve‘e lahi, ‘io, ko e fa‘ahinga kotoa ‘oku totolo ‘i he kelekele, ‘e ‘ikai te mou kai: he ko e me‘a fakalielia ia.

⁴³‘Ē, ‘ikai te mou fakalielia‘i kimoutolu ‘aki ‘a e ngaahi fa‘ahinga ‘oku totolo, pea ‘e ‘ikai te mou ‘uli‘i ‘aki kimoutolu ke mou ta‘ema‘a ai.

⁴⁴He ko Sihova au ko homou ‘Otua; ko ia mou fakatāpui kimoutolu, pea mou mā‘oni‘oni, he ‘oku ou mā‘oni‘oni; pea ‘e ‘ikai te mou ‘uli‘i homou laumālie ‘aki ha momo‘i fa‘ahinga totolo ‘oku ngāue ‘i he kelekele.

⁴⁵He ko au Sihova ia na‘e ‘omi kimoutolu mei ‘Isipite ke u nofo ko homou ‘Otua; ko ia te mou mā‘oni‘oni, he ‘oku ou mā‘oni‘oni.

⁴⁶Ko e lao ia ‘o e manu, mo e manupuna, mo e ngaahi fa‘ahinga manu ‘oku ngaue ‘i he vai, mo e ngaahi fa‘ahinga ‘oku totolo ‘i he kelekele; ke vahe‘i ‘a e me‘a ‘oku ta‘ema‘a mei he me‘a ‘oku ma‘a, pea ko e manu ‘oku kai mei he manu ‘oku ‘ikai kai.