Read KO E TOH TAPU KATOA TONGA LEVITIKO 12 Bible Online

LEVITIKO 12 - KO E TOH TAPU KATOA TONGA bible

LEVITIKO 12

¹PEA folofola ‘a e ‘Eiki kia Mōsese, ‘o pehē, Lea ki ha‘a ‘Isileli, ‘o pehē,

²Ka feitama ha fefine, ‘o fā‘ele‘i ha tama tangata, te ne ta‘ema‘a ‘o ‘aho fitu; ko ‘ene ta‘ema‘a ‘e fuoloa tatau mo ‘ene pehē ‘i he mahaki fakafefine.

³Pea ‘i hono ‘aho valu ‘e kamu ‘a e kili ‘o hono ‘ao.

⁴Pea te ne nofo ke a‘u ‘i he ‘aho ‘e tolungofulu mā tolu; ‘e ‘ikai te ne ala ki ha me‘a ‘oku tapu, pea ‘e ‘ikai te ne hū ki he feitu‘u tapu, kae‘oua ke kakato hono ngaahi ‘aho ‘au.

⁵Ka ‘o kapau te ne fā‘ele‘i ha ta‘ahine, te ne ta‘ema‘a ‘o uike ua, ‘o hangē ko ha‘ane mahaki fakafefine: pea te ne nofo ke ‘au ‘o ‘aho onongofulu mā ono.

⁶Pea ‘i he kakato hono ngaahi ‘aho ‘au, pe ko e tama, pe ko e ta‘ahine, te ne ‘omi ha lami ‘uluaki ta‘u ma‘ane feilaulau-mōifua, mo ha lupe mui, pe ha kulukulu ma‘ane feilaulau-angahala; te ne ‘omi ki he mata Tēniti Fe‘iloaki‘anga ki he taula‘eiki.

⁷Pea te ne ‘atu ia ki he ‘ao ‘o Sihova, ‘o fai‘aki ia ha fakalelei ma‘ana, pea fakama‘a ia mei he‘ene ‘au toto. Ko e lao ia ki he fefine fā‘ele, pe ko e tama, pe ko e ta‘ahine.

⁸Pea kapau kuo ‘ikai te ne lava ke ‘omi ha lami, te ne ha‘u mo ia ha ongo kulukulu pe lupe mui, ko e taha ki ha feilaulau mōifua, mo e taha ki ha feilaulau-angahala; pea ‘e fai ha fakalelei ma‘ana ‘e he taula‘eiki, pea te ne toki ma‘a.