Read KO E TOH TAPU KATOA TONGA LEVITIKO 14 Bible Online

LEVITIKO 14 - KO E TOH TAPU KATOA TONGA bible

LEVITIKO 14

¹PEA folofola ‘a Sihova kia Mōsese, ‘o pehē,

²Ko eni ‘a e tu‘utu‘uni ki he kilia ‘i he ‘aho ‘o hono fakama‘a: ‘e ‘omi ia ki he taula‘eiki.

³Pea ‘e ‘alu ‘a e taula‘eiki ki he tu‘a ‘apitanga, pea te ne vakai ia; pea ka ‘iloange kuo mole mei he kilia ‘a e mahaki,

⁴pea ‘e toki fekau ‘e he taula‘eiki ke kumi mai ma‘a e tangata ‘e fakama‘a ha ongo manupuna mo‘ui, ‘i he fa‘ahinga ‘oku ma‘a, pea mo ha va‘a sita, pea mo ha kula-‘aho‘aho, pea mo ha ‘īsope.

⁵Pea ‘e fekau ‘e he taula‘eiki ke tāmate‘i ha manupuna ‘e taha ‘i ha funga ipu ‘umea ‘oku ‘i ai ha vai mo‘ui.

⁶Pea ko e me‘a ki he manupuna ‘oku kei mo‘ui, te ne to‘o ia mo e va‘a sita, mo e kula ‘aho‘aho, mo e ‘īsope, pea te ne unu kotoa fakataha mo e manupuna mo‘ui ki he toto ‘o e manu na‘e tāmate‘i ‘i he funga ‘o e vai mo‘ui:

⁷pea te ne afuhi ‘aki, ‘o tu‘o fitu, ‘a e taha ‘oku fai hono fakama‘a mei he kilia; pea te ne tala ki ai kuo ne ma‘a; pea te ne tukuange ‘a e manupuna mo‘ui ke ‘alu ki he vao.

⁸Pea ko e tokotaha ‘oku fai hono fakama‘a te ne fō hono kofu, mo tele hono fulufulu kotoa, mo kaukau ‘i ha vai, pea te ne toki ma‘a; pea hili ia te ne hū mai ki he ‘apitanga, ka te ne nofo ‘i hono tu‘a tēniti ‘o ‘aho fitu.

⁹Pea ‘i hono ‘aho fitu te ne tele ‘a e fulufulu kotoa ‘o hono ‘ulu mo hono kava mo hono kemo, ‘io, ko hono fulufulu kotoa ‘e tele: pea te ne fō hono kofu, pea te ne kaukau hono sino ‘i ha vai, pea te ne toki ma‘a.

¹⁰Pea ‘i hono ‘aho valu te ne ‘omi ha ongo lami tangata haohaoa, pea mo ha lami fefine ‘e taha, haohaoa pea ‘i hono ‘uluaki ta‘u, pea mo e vahehongofulu ‘e tolu ‘o e ‘elito‘i mahoa‘a kuo natu ‘aki ‘a e lolo, ma‘ane feilaulau-me‘akai, pea mo ha ipu lolo.

¹¹Pea ko e taula‘eiki ‘oku ‘a‘ana ‘a e fakama‘a te ne fokotu‘u ‘a e tangata ‘oku fai hono fakama‘a, pea mo e ngaahi me‘a ko ē, ‘i he ‘ao ‘o Sihova ‘i he mata Tēniti Fe‘iloaki‘anga.

¹²Pea ‘e to‘o ‘e he taula‘eiki ha lami tangata ‘e taha, pea te ne ‘atu ia ko e feilaulau-halaia, pea mo e ipu lolo; pea te ne tātākalo ‘aki kinaua ko e feilaulau-tākalo ‘i he ‘ao ‘o Sihova.

¹³Pea te ne tāmate‘i ‘a e lami tangata ‘i he potu ‘oku tāmate‘i ai ‘a e feilaulau-angahala mo e feilaulau-mōifua, ‘i he potu ‘oku tu‘u ai ‘a e Fale Tapu: he hangē ‘oku ‘a e taula‘eiki ‘a e feilaulau-angahala, ‘oku pehē mo e feilaulau-halaia: ko ha me‘a toputapu ia.

¹⁴Pea ‘e to‘o ‘e he taula‘eiki ha me‘i toto mei he feilaulau-halaia, pea te ne ‘ai ia ki he mua‘i telinga to‘omata‘u ‘o e tokotaha ‘oku fai hono fakama‘a, pea ki hono motu‘a nima to‘omata‘u, pea ki hono motu‘a va‘e to‘omata‘u.

¹⁵Pea ‘e to‘o ‘e he taula‘eiki ha me‘i lolo mei he ipu, ‘o lilingi ki hono ‘aofinima to‘ohema ‘o‘ona:

¹⁶pea ‘e unu ‘e he taula‘eiki ‘a e tuhu ‘o hono nima to‘omata‘u ‘i he lolo ‘oku ‘i hono ‘aofinima to‘ohema, pea te ne afuhi ‘aki tu‘o fitu ki he ‘ao ‘o Sihova.

¹⁷Pea te ne ‘ai ha me‘a mei he lolo ‘oku toe ‘i hono ‘aofinima, ki he mua‘i telinga to‘omata‘u ‘o e tokotaha ‘oku fai hono fakama‘a, pea ki hono motu‘a nima to‘omata‘u, pea ki hono motu‘a va‘e to‘omata‘u, ki he funga toto ‘o e feilaulau-angahala:

¹⁸pea ko hono toe ‘o e lolo ‘i hono ‘aofinima te ne ‘ai ki he ‘ulu ‘o e taha ‘oku fai hono fakama‘a: pea ‘e fai ai ‘e he taula‘eiki ha fakalelei ma‘ana ‘i he ‘ao ‘o Sihova.

¹⁹Pea ‘e feia ‘e he taula‘eiki ‘a e feilaulau-angahala, ‘o ne fai‘aki ‘a e fakalelei ma‘a e taha ‘oku fakama‘a, koe‘uhi ko ‘ene ta‘ema‘a; pea hili ia te ne tāmate‘i ‘a e feilaulau-mōifua:

²⁰pea ‘e toki ‘atu ‘e he taula‘eiki ‘i he ‘ōlita ‘a e feilaulau-mōifua mo e feilaulau-me‘akai, ‘o fai ‘a e fakalelei ma‘ana: pea te ne ma‘a ai.

²¹Ka ‘o kapau ko e masiva, ‘o ‘ikai te ne lava ‘a e ngaahi me‘a ko ia, pea te ne toki ‘omi ha lami tangata ‘e toko taha ma‘ane feilaulau-halaia, ke tātākalo ‘aki mo fai fakalelei ‘aki ma‘ana, pea mo e vahehongofulu ‘e taha ‘o e ‘elito‘i mahoa‘a kuo natu ‘aki ‘a e lolo, ma‘ane feilaulau-me‘akai, mo ha ipu lolo;

²²pea mo ha ongo kulukulu pe lupe mui, ha me‘a pē te ne lava ke ma‘u; pea ‘e fai‘aki ‘a e taha ha feilaulau-angahala, pea ko e taha ko e feilaulau-mōifua.

²³Pea ‘i hono ‘aho valu te ne ‘omi ‘a e ngaahi me‘a ko ia ki he taula‘eiki, ki he mata Tēniti Fe‘iloaki‘anga, ki he ‘ao ‘o Sihova, mōno fakama‘a.

²⁴Pea ‘e to‘o ‘e he taula‘eiki ‘a e lami feilaulau-halaia, pea mo e ipu lolo, pea te ne tātākalo ‘aki kinaua ‘i he ‘ao ‘o Sihova mo‘o feilaulau-tākalo.

²⁵Pea te ne tāmate‘i ‘a e lami feilaulau-halaia, pea te ne to‘o ha me‘i toto mei ai, pea te ne ‘ai ki he mu‘a‘i telinga to‘omata‘u ‘o e toko taha ‘oku fai hono fakama‘a, pea ki hono motu‘a nima to‘omata‘u mo hono motu‘a va‘e to‘omata‘u.

²⁶Pea ‘e lingi ‘e he taula‘eiki ha me‘i lolo ki hono ‘aofinima to‘ohema ‘o‘ona;

²⁷pea te ne afuhi ‘aki ‘a e tuhu ‘o hono nima to‘omata‘u ha me‘i lolo mei hono ‘aofinima to‘ohema, ‘o tātu‘ofitu ‘i he ‘ao ‘o Sihova.

²⁸Pea te ne ‘ai ha me‘i lolo mei hono ‘aofinima ki he mua‘i telinga to‘omata‘u ‘o e tokotaha ‘oku fai hono fakama‘a, pea ki hono motu‘a nima to‘omata‘u, mo hono motu‘a va‘e to‘omata‘u, ‘i he potu ‘oku ‘i ai ‘a e toto ‘o e feilaulau-halaia;

²⁹pea ko hono toe ‘o e lolo ‘oku ‘i hono ‘aofinima te ne ‘ai ki he ‘ulu ‘o e tokotaha ‘oku fai hono fakama‘a, ke fai‘aki ha fakalelei ‘i he ‘ao ‘o Sihova.

³⁰Pea te ne feia ha taha ‘o e ongo kulukulu pe lupe mui, ‘a e me‘a kuo ne lava ke ma‘u;

³¹‘io te ne fai‘aki ha taha ‘o e me‘a kuo ne lava ke ma‘u ma‘ane feilaulau-angahala, mo e taha ma‘ane feilaulau-mōifua; fakataha mo e feilaulau-me‘akai: pea ‘e fai ai ‘e he taula‘eiki ha fakalelei ‘i he ‘ao ‘o Sihova ma‘ana ‘oku fakama‘a.

³²Ko e lao ia ki he mahaki kilia, ‘a ia ‘oku ‘ikai te ne lava ke ma‘u ‘a e me‘a mōno fakama‘a.

³³Pea folofola ‘a Sihova kia Mōsese mo ‘Ēlone, ‘o pehē,

³⁴Ka mou ka a‘u ki he fonua ko Kēnani, ‘a ia ‘oku ou ‘atu mo‘omou tofi‘a, pea ka u ka tuku ‘a e mala ko e kilia ki ha fale ‘i he fonua ‘oku mou tofi‘a ‘aki:

³⁵pea ko ia ‘oku ‘o‘ona ‘a e fale te ne ha‘u ‘o tala ki he taula‘eiki, ‘o pehē, ‘oku matamata kiate au ‘oku ai ha mala ‘i he fale.

³⁶Pea ‘e fekau ‘e he taula‘eiki ke nau fetukutuku mei he fale ‘i he te‘eki ke ne hū ki ai ke vakai ‘a e mala, na‘a ta‘ema‘a ‘a e me‘a kotoa ‘oku ‘i ai: pea hili ia pea ‘e toki hū ‘a e taula‘eiki ke vakai ‘a e fale.

³⁷Pea ka mamata ia ki he mala, pea tā ‘oku ‘i he holisi ia, ko e fanga ki‘i luoluo ‘oku meimei lanumata pe kulokula, pea matamata ‘asi ki loto;

³⁸pea ‘e toki hū kitu‘a ‘a e taula‘eiki, ‘o ‘alu ki he matapā ‘o e fale, ‘o ne tāpuni ‘a e fale ‘o ‘aho fitu.

³⁹Pea ‘e foki mai ‘a e taula‘eiki ‘i hono ‘aho fitu ke vakai; pea ka ‘iloange kuo mafola ‘a e mala ‘i he holisi ‘o e fale;

⁴⁰pea te ne tu‘utu‘uni ke ta‘aki mai ‘a e ngaahi maka ‘oku ‘i ai ‘a e mala, ‘o ‘ave ki he tu‘a kolo, ki ha potu ‘oku ta‘ema‘a:

⁴¹pea te ne fekau ke vau ‘a e fale takatakai, pea ke nau lilingi ‘a e efu ‘oku vau ki ha potu ta‘ema‘a ‘oku ‘i he tu‘a kolo.

⁴²Pea te nau kumi maka kehe, ‘o fetongi ‘aki ‘a e maka ko ē, pea te ne to‘o ha lahe kehe, ‘o vali ‘aki ‘a e fale.

⁴³Pea kapau ‘e foki mai ‘a e mala, ‘o hā ‘i he fale hili ‘ene ta‘aki ‘a e ngaahi maka mo vali ‘a e fale, pea hili hono vali;

⁴⁴pea ‘e ha‘u ‘a e taula‘eiki; pea ka vakai ‘e ia tā kuo mafola ‘a e mala ‘i he fale, ko e kilia fakapopo ia ‘oku ‘i he fale: ‘oku ta‘ema‘a ia.

⁴⁵Pea te ne holoki ‘a e fale, ‘a hono ngaahi maka mo e ‘akau mo e lahe kotoa; pea te ne ‘ave ki tu‘a kolo, ki ha potu ‘oku ta‘ema‘a.

⁴⁶Pea ko ia te ne hū ki he fale lolotonga kuo tāpuni, te ne ta‘ema‘a ‘o a‘u ki he efiafi.

⁴⁷Pea ko ia te ne mohe ‘i he fale te ne fō hono kofu; pea ko ia te ne kai ‘i he fale te ne fō hono kofu.

⁴⁸Ka ‘o kapau ‘e ha‘u ‘a e taula‘eiki, ‘o ne vakai, tā kuo ‘ikai mafola ‘a e mala ‘i he fale hili hono vali; pea ‘e toki fakahā ‘e he taula‘eiki ‘oku ma‘a ‘a e fale, he kuo mo‘ui ‘a e mala.

⁴⁹Pea te ne kumi mai ha holo ki he fale, ko e ongo manupuna, mo ha va‘a sita, mo ha kula ‘aho‘aho, pea mo ha ‘īsope.

⁵⁰Pea te ne tāmate‘i ha manupuna ‘e taha ‘i ha funga ipu ‘umea ‘oku ‘i ai ha vai mo‘ui:

⁵¹pea te ne to‘o ‘a e va‘a sita mo e ‘īsope mo e kula-‘aho‘aho fakataha mo e manupuna ‘oku mo‘ui, pea te ne unu kotoa ki he toto ‘o e manupuna na‘e tāmate‘i, pea mo e vai mo‘ui, pea te ne afuhi ‘aki ‘a e fale ‘o tu‘o fitu:

⁵²pea te ne fakama‘a ‘a e fale ‘aki ‘a e toto ‘o e manupuna, mo e vai mo‘ui, mo e manupuna mo‘ui, mo e va‘a sita, mo e ‘īsope, pea mo e kula-‘aho‘aho:

⁵³ka te ne tukuange ‘a e manupuna mo‘ui ke ‘alu mei he kolo ki he vao: ‘o ne fai ai ‘a e fakalelei koe‘uhi ko e fale, pea ‘e toki ma‘a.

⁵⁴Ko e lao ia ki he mahaki kilia, hono ngaahi fa‘ahinga kehekehe, pea ki he kamā;

⁵⁵pea ki he kilia ‘i ha kofu pe fale;

⁵⁶pea ki ha hangatāmaki, pe mongumangu, pe tane;

⁵⁷ke fakahinohino ki he taimi ‘o ‘ene ta‘ema‘a mo e taimi ‘o ‘ene ma‘a: ko eni ia ‘a e lao ‘o e kilia.