Read KO E TOH TAPU KATOA TONGA LEVITIKO 15 Bible Online

LEVITIKO 15 - KO E TOH TAPU KATOA TONGA bible

LEVITIKO 15

¹PEA folofola ‘a Sihova kia Mōsese mo ‘Ēlone, ‘o pehē,

²Lea ki ha‘a ‘Isileli, ‘o tala kiate kinautolu, Ko e tangata ‘oku mahaki, ko e ‘au hono kakano, ‘oku ne ta‘ema‘a ko ‘ene ‘au ko ia. Pea ko e anga eni ‘o ‘ene ta‘ema‘a ‘i he ‘au:

³pe ‘oku tuku atu ‘e he kakano ke tafe, pe ‘oku tāpuni, ka ‘oku ta‘ema‘a ai pē.

⁴‘Ilonga ha mohenga ‘oku tokoto ai ‘a e mahaki ‘au, ‘e ta‘ema‘a ia: pea ‘ilonga ha me‘a ‘oku ne nofo ai ‘e ta‘ema‘a.

⁵Pea ko ia ‘oku ne lave ki hono mohenga te ne fō hono kofu, pea te ne kaukau ‘i ha vai, pea te ne ta‘ema‘a ‘o a‘u ki he po‘uli.

⁶Pea ko ia te ne nofo ki ha me‘a kuo nofo ai ‘a e mahaki ‘au, te ne fō hono kofu, mo kaukau ‘i ha vai, pea te ne ta‘ema‘a ‘o a‘u ki he po‘uli.

⁷Pea ko ia te ne lave ki he kakano ‘o ia ‘oku mahaki ‘au, te ne fō hono kofu, pea te ne kaukau ‘i ha vai, pea te ne ta‘ema‘a ‘o a‘u ki he po‘uli.

⁸Pea ka ‘a‘anu ‘e ia ‘oku mahaki ‘au ki ha taha ‘oku ma‘a, pea ‘e fō ‘e he tokotaha ko ia hono kofu, mo kaukau ‘i ha vai, pea te ne ta‘ema‘a pē ‘o a‘u ki he po‘uli.

⁹Pea ka ‘ilonga ha heka‘anga ‘oku heka ai ‘a e mahaki ‘au, ‘e ta‘ema‘a ia.

¹⁰Pea ‘ilonga ia te ne lave ki ha me‘a ‘e taha kuo ‘i he lalo tangata ko ia, te ne ta‘ema‘a pē ‘o a‘u ki he po‘uli; pea ko ia te ne fua ha me‘a pehē, te ne fō hono kofu, mo kaukau ‘i ha vai, pea te ne ta‘ema‘a ‘o a‘u ki he po‘uli.

¹¹Pea ka ala ki ha taha ‘a ia ‘oku mahaki ‘au, ka kuo ‘ikai te ne tomu‘a fanofano vai, pea ‘e fō hono kofu ‘e he tokotaha ko ia, pea te ne kaukau ‘i ha vai, ‘o nofo ta‘ema‘a ‘o a‘u ki he po‘uli.

¹²Pea ko e ipu ‘umea kuo lave ai ‘a e mahaki ‘au, ‘e laiki: pea ka ko ha ipu ‘akau, ‘e fufulu vai.

¹³Pea ka mo‘ui ‘a ia na‘e mahaki ‘au, te ne lau atu ha ‘aho ‘e fitu mōno fakama‘a, pea te ne fō hono kofu, pea te ne fufulu hono sino ‘i ha vai mo‘ui, pea te ne toki ma‘a ai.

¹⁴Pea ‘i hono ‘aho valu te ne to‘o mai ha‘ane ongo kulukulu pe lupe mui, pea te ne ha‘u ki he ‘ao ‘o e ‘Eiki, ki he mata Tēniti Fe‘iloaki‘anga, pea te ne ‘atu ki he taula‘eiki.

¹⁵Pea ‘e feia ‘aki ‘e he taula‘eiki hana taha ko e feilaulau-angahala, pea mo e feilaulau-mōifua‘aki ‘a e taha pea te ne fai ha fakalelei ma‘ana ‘i he ‘ao ‘o Sihova, koe‘uhi ko ‘ene ‘au.

¹⁶Pea ka ai ha tangata ‘oku mahua meiate ia hono huhu‘a, te ne kaukau hono sino kotoa ‘i ha vai, pea te ne ta‘ema‘a ‘o a‘u ki he po‘uli.

¹⁷Pea ‘ilonga ha kofu pe kili‘imanu ‘e pani ai, ‘e fō ia, pea ‘e ta‘ema‘a ‘o a‘u ki he po‘uli.

¹⁸Pea ko e fefine ‘oku mohe mo ha tangata pehē, te na fakatou kaukau ‘i ha vai, ‘o nofo ta‘ema‘a ‘o a‘u ki he po‘uli.

¹⁹Pea ko ha fefine, kapau ‘oku ne ‘au, ‘o ‘au toto hono kakano, ‘e ‘aho fitu ‘ene mavahe: pea ‘ilonga ha taha ‘e lave kiate ia, te ne ta‘ema‘a ‘o a‘u ki he po‘uli.

²⁰Pea ‘ilonga ha me‘a te ne tokoto ai lolotonga ‘ene mavahe, ‘e ta‘ema‘a ia: pea ‘ilonga ha me‘a ‘oku ne nofo ai, ‘e ta‘ema‘a.

²¹Pea ‘ilonga ha taha te ne ala ki hono mohenga, te ne fō hono kofu, mo kaukau ‘i ha vai, pea te ne ta‘ema‘a ‘o a‘u ki he po‘uli.

²²Pea ka ai ha taha te ne lave ki ha me‘a ‘oku ne nofo ai, te ne fō hono kofu, mo kaukau ‘i ha vai, pea te ne ta‘ema‘a ‘o a‘u ki he po‘uli.

²³Pea ka pani ai ‘a e mohenga, pe ko e me‘a ‘oku ne nofo ai, ‘oka ne ka lave ai, te ne ta‘ema‘a ‘o a‘u ki he po‘uli.

²⁴Pea ka mohe mo ia ha tangata, pea pani ai ia, te ne ta‘ema‘a ‘o ‘aho fitu; pea ta‘ema‘a mo e mohenga kotoa ‘oku ne mohe ai.

²⁵Pea ka ‘au toto fuoloa ha fefine, ka ‘oku ‘ikai ko e taimi ‘o ‘ene mahaki fakafefine, pe kuo hulu atu ‘ene mahaki pehē; lolotonga ‘ene ‘au pehē, te ne tatau pē mo hono taimi mahaki: ko e tokotaha ta‘ema‘a ia.

²⁶Ko e mohenga kotoa pē te ne mohe ai lolotonga ‘ene ‘au, ‘e tatau mo hono mohenga ‘i he‘ene mahaki fakafefine: pea ko e nofo‘a kotoa te ne nofo ai ‘e ta‘ema‘a hangē ko ‘ene ta‘ema‘a ‘i hono mahaki ko ē.

²⁷Pea ‘ilonga ia te ne lave ki he ngaahi me‘a ko ia te ne ta‘ema‘a ai, pea te ne fō hono kofu, ‘o kaukau ‘i ha vai, pea te ne ta‘ema‘a ‘o a‘u ki he po‘uli.

²⁸Pea ka mātu‘u leva ‘ene ‘au, pea te ne lau atu hano ‘aho ‘e fitu, pea hili ia te ne ma‘a.

²⁹Pea ‘i hono ‘aho valu te ne to‘o mai ha‘ane ongo kulukulu pe lupe mui, pea te ne ha‘u mo ia ki he taula‘eiki, ki he mata Tēniti Fe‘iloaki‘anga.

³⁰Pea ‘e fai‘aki ‘e he taula‘eiki ‘a e taha ha feilaulau-angahala, pea mo e feilaulau-mōifua ‘aki ‘a e taha; pea te ne fai fakalelei ma‘ana ‘i he ‘ao ‘o Sihova, koe‘uhi ko ‘ene ta‘ema‘a ‘i he ‘au.

³¹Ko ia te mou vahe‘i ai ‘a ha‘a ‘Isileli mei honau ngaahi ta‘ema‘a‘anga; ke ‘oua te nau mate ‘i he‘enau ta‘ema‘a, he‘enau fakalielia‘i ‘a e fale tapu ‘o‘oku ‘i honau lotolotonga.

³²Ko e lao ia ‘o e tangata ‘oku mahaki ‘au, mo ia ‘oku tafe hono huhu‘a, ‘o ne ta‘ema‘a ai;

³³pea mo e fefine ‘oku mahaki fakafefine, pea mo ia ‘oku mahaki ‘au, pe ko e tangata pe ko e fefine; pea mo e tangata ‘oku mohe mo e fefine ‘oku ta‘ema‘a.