Read KO E TOH TAPU KATOA TONGA LEVITIKO 16 Bible Online

LEVITIKO 16 - KO E TOH TAPU KATOA TONGA bible

LEVITIKO 16

¹PEA na‘e folofola ‘a Sihova kia Mōsese hili ‘a e pekia ‘a e ongo foha ‘o ‘Ēlone, ‘i he‘ena ‘unu‘unu mai ki he ‘ao ‘o Sihova, ‘o na pekia —

²‘io, na‘e folofola ‘a Sihova kia Mōsese, Tala ki ho ta‘okete ko ‘Ēlone, Ke ‘oua te ne hū ‘i he taimi kotoa pē ki he Potu Tapu ‘oku ‘i he loto Tatau, ki he ‘ao ‘o e Hōifua‘anga ‘i he funga ‘A‘ake: koe‘uhi na‘a ne mate: he te u hā au ‘i he ‘ao ‘i he funga Hōifua‘anga.

³Pea ko eni ia ‘a e me‘a ‘e hū ‘aki ‘e ‘Ēlone ki he Potu Tapu; ko e pulu mui mo‘o feilaulau-angahala, pea mo e sipi tangata mo‘o feilaulau-mōifua.

⁴Te ne tui hono sote līneni ‘oku tapu, pea ‘e ‘i hono kakano ‘a e talausese līneni, pea te ne no‘o ‘aki ‘a e no‘o līneni, pea te ne fa‘u ‘aki ‘a e tatā līneni: ko e ngaahi kofu tapu ia, ko ia te ne kaukau mu‘a hono sino ‘i ha vai, pea toki ‘ai.

⁵Pea te ne ma‘u mei he Fakataha ‘o ha‘a ‘Isileli ha ongo kosi tangata mo‘o feilaulau-angahala, pea mo ha sipi tangata mo‘o feilaulau-mōifua.

⁶Pea ‘e ‘atu ‘e ‘Ēlone ‘a e pulu mui ‘a ia ko e feilaulau-angahala ma‘ana, pea te ne fai‘aki ha fakalelei koe‘uhi ko ia mo hono fale.

⁷Pea te ne to‘o ‘a e ongo kosi, ‘o fokotu‘u ‘i he ‘ao ‘o Sihova, ‘i he mata Tēniti Fe‘iloaki‘anga.

⁸Pea ‘e talotalo ‘e ‘Ēlone ki he ongo kosi, ko e taha ma‘a Sihova mo e taha ma‘a ‘Asaseli.[7]

⁹Pea ko e kosi kuo tō ma‘a Sihova ‘e ‘atu ia ‘e ‘Ēlone ke fai‘aki ha feilaulau-angahala.

¹⁰Ka ko e kosi kuo tō kia ‘Asaseli ‘e fokotu‘u mo‘ui ‘i he ‘ao ‘o Sihova ke feia ‘i hono funga ha fakalelei, kae ‘ave kia ‘Asaseli ki he fonua mamate.

¹¹Pea ‘e ‘atu ‘e ‘Ēlone ‘a e pulu mui, ‘a ia ko e feilaulau-angahala ma‘ana, ke fai‘aki ‘a e fakalelei ma‘ana mo hono fale, pea te ne tāmate‘i ‘a e pulu mui, ‘a ia ko e feilaulau-angahala ma‘ana.

¹²Pea te ne fakafonu ha ‘ainga malala ‘aki ‘a e malala‘i afi mei he ‘ōlita ‘oku ‘i he ‘ao ‘o Sihova, pea te ne faluku ‘aki hono ongo nima ‘osi pē ha ‘inisēnisi namu kakala kuo momoiki, pea te ne ha‘u mo ia ki he loto Tatau.

¹³Pea te ne hilifaki ‘a e ‘inisēnisi ki he malala ‘i he ‘ao ‘o Sihova, ke kapu ‘aki ‘a e ‘ahu ‘o e ‘inisēnisi ‘a e Hōifua‘anga ‘oku ‘i he funga Fakamo‘oni‘anga, ke ‘oua te ne mate.

¹⁴Pea te ne toki to‘o ha me‘i toto mei he pulu mui, pea te ne afuhi ‘aki hono tuhu ki he tapa‘i Hōifua‘anga ki hahake, pea ‘i he ‘ao foki ‘o e Hōifua‘anga te ne afuhi ‘aki ‘a e toto hono tuhu, ‘o tu‘o fitu.

¹⁵Pea te ne toki tāmate‘i ‘a e kosi feilaulau-angahala, ‘a ia ‘oku ma‘a e kakai, pea te ne ‘omi hono toto ki he loto Tatau, pea te ne fai‘aki hono toto, ‘o hangē ko ‘ene fai‘aki ‘a e toto ‘o e pulu mui, ‘o afuhi ‘aki ‘a e Hōifua‘anga pea mo e ‘ao ‘o e Hōifua‘anga.

¹⁶Pea te ne fai ai ha fakalelei ma‘a e Potu Tapu, telia ‘a e ngaahi ta‘ema‘a‘anga ‘o ha‘a ‘Isileli, pea telia ‘enau ngaahi faihala, ‘io, ‘a ‘enau ngaahi angahala kehekehe; pea te ne fai pehē foki ma‘a e Tēniti Fe‘iloaki‘anga, ‘a ia ‘oku nofo mo kinautolu ‘o lotolotoi ‘i honau ngaahi ta‘ema‘a‘anga.

¹⁷Pea ‘e ‘ikai ha tokotaha ‘i he Tēniti Fe‘iloaki‘anga, ‘oka ne ka hū ki he Potu Tapu ke fai ‘a e fakalelei, kae ‘oua ke ne hū mai kuo ne lava ‘a e fakalelei ma‘ana mo hono fale, pea mo e fakataha kotoa ‘o ‘Isileli,

¹⁸pea te ne hū kitu‘a ki he ‘ōlita ‘oku ‘i he ‘ao ‘o Sihova, pea te ne fai ha fakalelei ma‘ana; pea te ne to‘o ha me‘i toto mei he pulu mui mo e kosi, ‘o ‘ai ki he ngaahi nifo ‘o e ‘ōlita takatakai.

¹⁹Pea te ne afuhi ‘aki ‘a e toto hono tuhu ‘o tu‘o fitu, ke fakama‘a ia, mo faka‘atā mei he ngaahi ta‘ema‘a‘anga ‘o ha‘a ‘Isileli.

²⁰Pea ‘i he ‘osi ‘ene fai fakalelei ma‘a e Potu Tapu, mo e Tēniti Fe‘iloaki‘anga, mo e ‘ōlita, te ne toki ‘atu ‘a e kosi mo‘ui:

²¹pea ‘e hilifaki ‘e ‘Ēlone hono ongo nima fakatou‘osi ki he ‘ulu ‘o e kosi mo‘ui, pea te ne vete ‘i hono funga ‘a e ngaahi kovi kotoa ‘o ha‘a ‘Isileli, mo ‘enau ngaahi faihala, ‘io, ‘enau ngaahi angahala fuli pē: pea te ne hilifaki kotoa ki he ‘ulu ‘o e kosi, pea te ne tuku ia ki ha tangata kuo ‘osi teu ki ai, ke ‘ave ki ha fonua mamate.

²²Pea ‘e fua ‘e he kosi ‘a e ngaahi kovi kotoa pē kuo hilifaki kiate ia, ‘o ‘ave ki ha fonua mamate: pea te ne tukuange ‘a e kosi ‘i he fonua mamate.

²³Pea ‘e toki hū ‘a ‘Ēlone ki he Tēniti Fe‘iloaki‘anga, pea te ne to‘o ‘a e ngaahi kofu līneni na‘a ne ‘ai ‘i he‘ene hū ki he Potu Tapu, pea te ne tuku ai pē ‘i he potu ko ia;

²⁴pea te ne kaukau hono sino ‘i ha vai ‘i ha potu ‘oku tapu; ‘o ne ‘ai hono ngaahi kofu: pea te ne toki hū mai, ‘o fai ‘ene feilaulau-mōifua, pea mo e feilaulau-mōifua ‘a e kakai, ‘o ne feia ai ha fakalelei ma‘ana mo e kakai.

²⁵Pea ko e ngako ‘o e feilaulau-angahala te ne tutu ‘i he ‘ōlita.

²⁶Pea ko ia na‘a ne ‘ave ‘a e kosi ma‘a ‘Asaseli, te ne fō hono kofu, mo kaukau hono sino ‘i ha vai, pea hili ia te ne hū mai ki he ‘apitanga.

²⁷Pea ko e pulu feilaulau-angahala mo e kosi feilaulau-angahala, ‘a ia na‘e ‘omi hona toto ke feia ‘aki ha fakalelei ‘i he Potu Tapu, ‘e ‘ave kinaua ki he tu‘a ‘apitanga; pea te nau faka‘auha ‘aki ‘a e afi ‘a hona kili, mo hona kakano, mo hona kinoha‘a.

²⁸Pea ko ia ‘oku ne tutu kinaua te ne fō hono kofu, mo kaukau hono sino ‘i ha vai, pea hili ia te ne hū mai ki he ‘apitanga.

²⁹Pea ‘e hoko ia ko e tu‘utu‘uni ta‘engata kiate kimoutolu: ‘i hono fitu ‘o e māhina, pea ‘i hono ‘aho hongofulu ‘o e māhina, te mou fakamamahi kimoutolu, pea ‘e ‘ikai te mou momo‘i fai ha ngāue, ‘a e tupu ‘i he fonua pe ko e muli ‘oku mou nonofo,

³⁰he ko e ‘aho eni ia ‘oku feia ai ‘a e fakalelei ma‘amoutolu, ke fakama‘a kimoutolu; te mou toki ma‘a ai mei ho‘omou ngaahi angahala fuli pē ‘i he ‘ao ‘o Sihova.

³¹Ko e Sāpate mālōlō tapu ia ma‘amoutolu; pea te mou fakavaivai‘i homou laumālie; ko e tu‘utu‘uni ta‘engata ia.

³²Pea ‘e fai ‘a e fakalelei ‘e he taula‘eiki ‘e pani mo fakatāpui ke fetongi ‘ene tamai; pea ‘e tui ‘e ia ‘a e ngaahi kofu līneni, ‘a e ngaahi kofu tapu:

³³pea te ne fai fakalelei ma‘a e Fale Tapu, pea te ne fai fakalelei ma‘a e Tēniti Fe‘iloaki‘anga mo e ‘ōlita; pea te ne fai fakalelei ma‘a e kau taula‘eiki pea mo e kakai kotoa ‘i he fakataha.

³⁴Pea ko e tu‘utu‘uni ta‘engata eni ia kiate kimoutolu, ke feia ha fakalelei ma‘a ha‘a ‘Isileli ‘o tu‘o taha ‘i he ta‘u, koe‘uhi ko ‘enau ngaahi angahala kehekehe. Pea na‘a ne fai ‘o hangē ko e tu‘utu‘uni ‘a e ‘Eiki kia Mōsese.[8]