Read KO E TOH TAPU KATOA TONGA LEVITIKO 17 Bible Online

LEVITIKO 17 - KO E TOH TAPU KATOA TONGA bible

LEVITIKO 17

¹PEA folofola ‘a e ‘Eiki kia Mōsese, ‘o pehē,

²Lea kia ‘Ēlone mo hono ngaahi foha, pea ki ha‘a ‘Isileli kotoa, pea ke fakahā kiate kinautolu; ko eni ‘a e me‘a kuo tu‘utu‘uni ‘e Sihova:

³‘Ilonga ha tangata ‘i he fale ‘o ‘Isileli, ‘a ia ‘oku ne tāmate‘i ha pulu pe lami pe kosi ‘i he ‘apitanga, pe ‘oku ne tāmate‘i ‘i he tu‘a ‘apitanga,

⁴ka kuo ‘ikai te ne ‘omi mu‘a ki he mata Tēniti Fe‘iloaki‘anga, ke kōpano ‘aki ki he ‘Eiki ‘i he ‘ao ‘o e Tāpanekale ‘o Sihova: ‘e lau toto ki he tangata ko ia; kuo ne lingi toto; pea ‘e tu‘usi ‘a e tangata ko ia mei hono kakai:

⁵koe‘uhiā ke ‘omi ‘e ha‘a ‘Isileli ‘a e ngaahi feilaulau ‘a ia ‘oku nau feia ni ‘i he vao, ‘io, ke nau ‘omi ia kia Sihova, ki he mata Tēniti Fe‘iloaki‘anga, ki he taula‘eiki, ‘o feia feilaulau-‘ofa ‘aki kia Sihova.

⁶Pea ‘e luluku ‘aki ‘e he taula‘eiki ‘a e toto ‘a e ‘ōlita ‘o Sihova ‘i he mata Tēniti Fe‘iloaki‘anga, mo tutu ‘a e ngako mo‘o ngangatu fakahōifua ki he ‘Eiki.

⁷Pea ‘e ‘ikai te nau toe fai ‘enau tāmate manu ki he ha‘a Sātulō, ‘a ia ‘oku nau tango ange ki ai. Ko e tu‘utu‘uni ta‘engata ia kiate kinautolu, ‘o laui to‘utangata.

⁸‘Io, te ke tala kiate kinautolu, ‘Ilonga ha tangata, (pe ‘oku ne kau ki ‘Isileli, pe ki he muli ‘oku ‘āunofo mai kiate kinautolu), ‘oku ne feia ha feilaulau-mōifua, pe ha feilaulau kehe.

⁹Ka ‘oku ‘ikai te ne ‘omi ki he mata Tēniti Fe‘iloaki‘anga ke feia kia Sihova, pea ‘e tu‘usi ‘a e tangata ko ia mei hono kakai.

¹⁰Pea ka ai ha tangata ‘oku kau ki ‘Isileli, pe ha muli ‘oku ‘āunofo kiate kinautolu, ‘a ia ‘oku ne kai ha toto, neongo pe ko e hā: te u hāngai mamahi ki he tokotaha ko ia ‘oku ne kai toto, pea te u tu‘usi ia mei hono kakai.

¹¹He ko e mo‘ui ‘a e kakano ‘oku ‘i he toto: pea kuo u tuku ia ma‘amoutolu ki he ‘ōlita, ke fai‘aki ‘a e fakalelei ma‘a ho‘omou mo‘ui: he ko e toto ia ‘oku ne fakalelei, koe‘uhi ko e mo‘ui ia.

¹²Ko hono ‘uhinga ia na‘a kuo pehē ai ki ha‘a ‘Isileli, Tapu ke kai toto ‘e ha toko taha ‘iate kimoutolu; pea ko e muli ‘oku ‘āunofo kiate kimoutolu ‘e tapu ‘ene kai toto.

¹³Pea ‘ilonga ha taha ‘i ha‘a ‘Isileli mo e muli ‘oku ‘āunofo kiate kinautolu, ‘a ia te ne tuli manu, ‘o ma‘u ha manu pe manupuna ‘oku kai, te ne lilingi ‘a e toto, ‘o ‘u‘ufi ‘aki ‘a e efu.

¹⁴He ko e me‘a ki he mo‘ui ‘a e kakano kehekehe, ko hono toto ko ‘ene mo‘ui pē ia: ko ia na‘a ku pehē ai ki ha‘a ‘Isileli, Ko e toto ‘o e sino kehekehe ‘oku tapu ke mou kai: he ko e mo‘ui ‘o e sino kehekehe ko e toto ia: ko ia ‘oku ne kai ia ‘e tu‘usi.

¹⁵Pea ‘ilonga ha taha te ne kai ha me‘a ‘oku mate ‘iate ia, pe kuo hae ‘e ha manu; pe ko ha tupu ia ‘i he fonua, pe ko ha muli; te ne fō hono kofu, pea te ne kaukau ‘i ha vai, pea te ne ta‘ema‘a ‘o a‘u ki he po‘uli: te ne toki ma‘a ai.

¹⁶Ka ‘o kapau ‘oku ‘ikai te ne fō ia, pe kaukau hono sino, te ne fua ‘ene kovi.