Read KO E TOH TAPU KATOA TONGA LEVITIKO 19 Bible Online

LEVITIKO 19 - KO E TOH TAPU KATOA TONGA bible

LEVITIKO 19

¹PEA folofola ‘a Sihova kia Mōsese, ‘o pehē,

²Lea ki he fakataha kotoa ‘o ha‘a ‘Isileli, pea ke tala kiate kinautolu, Te mou mā‘oni‘oni; he ‘oku ou mā‘oni‘oni, ‘a au Sihova ko homou ‘Otua.

³Te mou ‘apasia takitaha ki he‘ene fa‘ē mo ‘ene tamai, pea te mou tauhi hoku ngaahi Sāpate: ko Sihova au ko homou ‘Otua.

⁴‘E ‘ikai te mou tafoki ki he ngaahi ‘aitoli, pe ngaohi hamou ‘otua ukamea: ko Sihova au ko homou ‘Otua.

⁵Pea ka mou ka feia ha ngaahi feilaulau-‘ofa kia Sihova, mou fai pē ke ne hōifua ai kiate kimoutolu.

⁶‘E kai ia ‘i he ‘aho ‘o hono feia, pea mo e ‘apongipongi: ka ‘oka toe ha me‘a ki hono ‘aho tolu, ‘e faka‘auha ‘aki ‘a e afi.

⁷‘Io, kapau ‘e momo‘i kai ‘i hono ‘aho tolu, ko e me‘a namukū ia; ‘e ‘ikai tali:

⁸pea ko ia te ne kai te ne fua hono kovi, koe‘uhi kuo ne takuanoa ‘a e me‘a tapu ‘a Sihova; pea ‘e tu‘usi ‘a e laumālie ko ia mei hono kakai.

⁹Pea ka mou ka utu ‘a e ta‘u ‘o homou fonua, ‘e ‘ikai te mou utu ke ‘osi‘osingamālie ho‘o ngoue, ‘o a‘u ki he tuliki, pea ko e ngangana ‘a ho ta‘u ‘e ‘ikai te ke tufi.

¹⁰Ko ho‘o ngoue vaine foki ‘e ‘ikai te ke toli ke ‘osi, pea ko e me‘a kuo ngangana ai ‘e ‘ikai te ke tufi; te ke tuku pē ia ki he masiva mo e muli: ko Sihova au ko homou ‘Otua.

¹¹‘E tapu ho‘omou kaiha‘a, pea tapu ho‘omou kākā, pea tapu ho‘omou loi ‘i ho‘omou feangai.

¹²Pea ‘oku tapu ho‘omou fuakava loi ‘i hoku hingoa ke takuanoa ‘a e hingoa ‘o homou ‘Otua: ko Sihova au.

¹³‘Oku tapu ho‘o fakamālohia ho kaungā‘api, mo ho‘o kaiha‘a meiate ia: ‘e ‘ikai ‘aho ia ‘iate koe ‘a e totongi ‘o e ngāue unga.

¹⁴Tapu ho‘o kape ki he tuli, mo ho‘o ‘ai ha tūkia‘anga ‘i he ‘ao ‘o e kui, ka te ke ‘apasia ki ho ‘Otua: ko Sihova au.

¹⁵‘Oku tapu ho‘o piko‘i ‘a e fakamaau: ‘e ‘ikai te ke toka‘i ‘a masiva, pea ‘e ‘ikai te ke āfeitau‘olunga?; ka te ke faitotonu ‘i ho‘o fakamaau ha taha.

¹⁶‘E ‘ikai te ke ‘alu fano ‘i he lotolotonga ‘o ho kakai ke fakakovi: pea ‘e ‘ikai te ke kumi ki he toto ‘o ho kaungā‘api: ko Sihova au.

¹⁷‘E ‘ikai te ke tauhi ‘i ho loto ‘a e fehi‘a ki ho tokoua: te ke mātu‘aki valoki si‘i kāinga ko ia, ‘o ‘oua ‘e fua hia koe‘uhi ko ia.[9]

¹⁸‘E ‘ikai te ke fai sauni, pe tauhi ha ‘ita ki ha ni‘ihi ‘i ho fa‘ahinga, ka te ke ‘ofa ki ho kaungā‘api, ‘o hangē ko ho‘o ‘ofa kiate koe: ko Sihova au.

¹⁹Te mou tauhi ‘eku ngaahi fekau. ‘E ‘ikai te mou fakahoa-‘a-kehe ho‘omou fanga manu: ‘e ‘ikai te ke tōkaki ‘i ho‘o ngoue ha fa‘ahinga tenga ‘e ua: pea ‘e ‘ikai te ke tui ha kofu ‘oku fefiofi ai ha fa‘ahinga filo ‘e ua ko e fakakākā.[10]

²⁰Pea ka mohe ha tangata mo ha fefine, ‘a ia ko e kaunanga pea polo‘i ki ha tangata, ka kuo te‘eki ke momo‘i huhu‘i, pe fakatau‘atāina, ‘e ‘eke pē ‘a e ongo me‘a, ka ‘e ‘ikai te na mate,[11] he na‘e ‘ikai tau‘atāina ‘a e fefine.

²¹Pea te ne ‘omi ‘ene feilaulau-halaia kia Sihova ki he mata Tēniti Fe‘iloaki‘anga: ko ‘ene feilaulau-halaia ko e sipi tangata.

²²Pea ‘e fai fakalelei ma‘ana ‘e he taula‘eiki ‘i he ‘ao ‘o Sihova ‘aki ‘a e sipi feilaulau-halaia, koe‘uhi ko e angahala kuo ne fai: pea ‘e fakamolemole ia ‘i he angahala kuo ne fai.

²³Pea ka mou ka a‘u ki he fonua, pea kuo mou tō ‘a e ngaahi ‘akau kehekehe ke kai, te mou lau hono fua hangē kuo ta‘ekamu: ko e ta‘u ‘e tolu te nau hangē kiate kimoutolu ha me‘a ‘oku ta‘ekamu; ‘e ‘ikai kai.

²⁴Pea ‘i hono fā ‘o e ta‘u ‘e tapu hono kātoa ‘o e fua ke fai‘aki ‘a e fakafeta‘i ki he ‘Eiki.[12]

²⁵Pea ‘i hono nima ‘o e ta‘u te mou kai hono fua — koe‘uhiā ke fakalahi ki hono fua ma‘amoutolu: ko Sihova au ko homou ‘Otua.

²⁶‘Oku tapu ho‘omou kai ha me‘a ‘oku ‘i ai ha toto: tapu ho‘omou fai ‘a e tuki, pe ko e talotalo kovi.

²⁷Tapu ho‘omou kosi ke fakaseakale homou lau, pea tapu ho‘o maumau ‘a e ngaahi tuliki ‘o ho kava.

²⁸Tapu ho‘omou tafatafa‘i homou sino koe‘uhi ko e pekia, pea tapu ho‘omou tātatau: ko Sihova au.

²⁹‘Oua te ke tuku ho ‘ōfefine ke nofo ki he fe‘auaki;[13] na‘a tō ‘a e fonua ki he fe‘auaki, pea fonu ‘a e fonua ‘i he fakalielia.

³⁰Te mou tauhi hoku ngaahi Sāpate, pea ‘apasia ki hoku fale tapu: ko Sihova au.

³¹‘Oua te mou afe kiate kinautolu ‘oku fakahā‘ele fa‘ahikehe, pe ki he fa‘ahinga tuki; ‘oua ‘e kumi kiate kinautolu ke mou ‘uli ai: ko Sihova au ko homou ‘Otua.

³²Te ke tu‘u ki ‘olunga ‘i he ‘ao ‘o e ‘uluhinā, pea te ke faka‘apa‘apa kiate ia ‘oku motu‘a, pea te ke ‘apasia ki ho ‘Otua: ko Sihova au.

³³Pea kapau ‘e ‘āunofo ha muli kiate koe ‘i homou fonua, ‘e ‘ikai te mou fai ha kovi ki ai.

³⁴Ko e muli ‘oku ‘āunofo kiate kimoutolu ‘e tatau kiate kimoutolu mo e tupu ‘i he fonua; pea te ke ‘ofa kiate ia hangē ko ho‘o ‘ofa kiate koe; he na‘a mou nofo muli ‘i he fonua ko ‘Isipite: ko Sihova au ko homou ‘Otua.

³⁵‘E ‘ikai te mou fai ta‘etotonu ‘i he fakamaau, ‘i he fua fakalōloa, mo e fua mamafa, pea mo e fua efu.

³⁶‘E totonu ho‘omou fuatautau, totonu ho‘omou me‘a fakamamafa, totonu ho‘omou efa, pea totonu ho‘omou kālani: ko Sihova au ko homou ‘Otua, ‘a ia na‘a ku ‘omi kimoutolu mei he fonua ko ‘Isipite.

³⁷Ko ia te mau tauhi ‘eku ngaahi fekau, mo ‘eku konisitūtone kotoa, ‘o fai ki ai: ko Sihova au.