Read KO E TOH TAPU KATOA TONGA LEVITIKO 2 Bible Online

LEVITIKO 2 - KO E TOH TAPU KATOA TONGA bible

LEVITIKO 2

¹PEA ka ‘omi ‘e ha taha ha kōpano ko e feilaulau-me‘akai kia Sihova, te ne ‘omi ‘ene me‘a mei he ‘elito‘i mahoa‘a; pea te ne lingi ha lolo ki ai, pea te ne hili ki ai ha laipeno.

²Pea te ne ‘omi ki he ngaahi foha ‘o ‘Ēlone, ‘a ia ‘oku taula‘eiki; pea te ne to‘o ha falukunga mei he mahoa‘a mo e lolo, mo hono kotoa ‘o e laipeno: pea ‘e tutu ia ‘e he taula‘eiki mōno me‘a fakamanatu; ko e feilaulau fai‘aki ‘a e afi, ko e ngangatu fakahōifua kia Sihova.

³Pea ko e toe ‘o e feilaulau-me‘akai ko e ‘inasi ‘o ‘Ēlone mo hono ngaahi foha; ko e taha ia ha me‘a ‘oku toputapu ‘i he ngaahi feilaulau ‘a Sihova ‘oku fai‘aki ‘a e afi.

⁴Pea kapau ko ho‘o ‘omi ha kōpano ko ha feilaulau-me‘akai kuo ta‘o ‘i ha ‘ōvani, ‘e fai‘aki ‘a e ‘elito‘i mahoa‘a, ko e ngaahi keke ta‘elēvani kuo natu ‘aki ‘a e lolo, pe ko e ngaahi mā manifinifi ta‘elēvani kuo pani lolo.

⁵Pea kapau ko e feilaulau-me‘akai fai‘aki ‘a e fakapaku ‘oku ke kōpano ‘aki, ‘e fai‘aki ‘a e ‘elito‘i mahoa‘a, kuo natu ‘aki ‘a e lolo, pea ta‘elēvani.

⁶Te ke tofitofi ia, ‘o lilingi ki ai ha lolo; ko ha feilaulau-me‘akai ia.

⁷Pea kapau ko e feilaulau-me‘akai haka ‘oku ke kōpano ‘aki, te ke ngaohi ‘aki ‘a e ‘elito‘i mahoa‘a mo e lolo.

⁸Pea te ke ‘omi kia Sihova ‘a e feilaulau-me‘akai ‘oku ngaohi hangē ko e ngaahi me‘a ko ē, pea ‘e ‘atu ki he taula‘eiki, pea ‘e ‘omi ‘e ia ki he ‘ōlita.

⁹Pea ‘e to‘o hake ‘e he taula‘eiki mei he feilaulau-me‘akai hano me‘a fakamanatu, pea te ne tutu ‘i he ‘ōlita: ko e me‘a fai‘aki ‘a e afi ia, ko e ngangatu fakahōifua kia Sihova.

¹⁰Pea ko hono toe ‘o e feilaulau-me‘akai ko e ‘inasi ia ‘o ‘Ēlone mo hono ngaahi foha; ko e taha ia ha me‘a ‘oku toputapu ‘i he ngaahi feilaulau ‘a Sihova ‘oku fai‘aki ‘a e afi.

¹¹‘E ‘ikai ‘atu ki he ‘Eiki ha feilaulau-me‘akai kuo fai lēvani: pea ka ai ha lēvani pe ha honi, ‘e ‘ikai tutu ha me‘a mei ai ‘aki ‘a e afi kia Sihova.

¹²Kapau ‘e ‘omi ia ko e kōpano ‘o e polopolo ta‘u, te mou ‘atu pē ki he ‘Eiki; ka ‘e ‘ikai tutu ‘i he ‘ōlita mo‘o ngangatu fakahōifua.

¹³Pea koe feilaulau-me‘akai kotoa pē ‘oku ke kōpano ‘aki, ‘e fakamāsima; ‘e ‘ikai te ke tuku ke hala ‘i ho‘o feilaulau-me‘akai ‘a e māsima kovinānite ‘a ho ‘Otua: te ke ‘omi ‘a e māsima mo ho‘o ngaahi kōpano kotoa pē.

¹⁴Pea kapau ko ho‘o ‘omi kia Sihova ha feilaulau-me‘akai mei he polopolo ‘o ho ta‘u, te ke fai ho‘o feilaulau polopolo ko ia ‘aki ‘a e fo‘i uite kuo tunu ‘i he afi, ko e milimili mei he uite tō.

¹⁵Pea te ke ‘ai ki ai ha lolo, mo hili ki ai ha laipeno: ko e feilaulau-me‘akai ia.

¹⁶Pea ‘e tutu ‘e he taula‘eiki hano me‘a fakamanatu, ko ha me‘a mei he uite kuo milimili, mo ha me‘a mei he lolo, mo hono kotoa ‘o e laipeno: ko e feilaulau fai‘aki ‘a e afi ia kia Sihova.