Read KO E TOH TAPU KATOA TONGA LEVITIKO 21 Bible Online

LEVITIKO 21 - KO E TOH TAPU KATOA TONGA bible

LEVITIKO 21

¹PEA folofola ‘a Sihova kia Mōsese, ‘o pehē, Lea ki he kau taula‘eiki ko e fānau ‘a ‘Ēlone, pea tala kiate kinautolu, ‘E ‘ikai fakata‘ema‘a ia ‘e ha taha koe‘uhi ko ha me‘a faka‘eiki ‘i hono kakai;

²ngata pē ‘i hono kakano totonu, ha taha ofi kiate ia, ‘o pehē ko ‘ene fa‘ē, pe tamai, pe foha, pe ‘ōfefine, pe tokoua.

³Kapau ko hono tuofefine foki ‘oku tāupo‘ou, ‘oku ofi ia kiate ia he kuo te‘eki hano husepāniti; ‘e ngofua ‘ene fakata‘ema‘a ia koe‘uhi ko ia.

⁴‘E ‘ikai te ne fakata‘ema‘a ia koe‘uhi, tokua, ko ‘ene ma‘u kakai,[14] ke maumau ai ‘ene tapu.

⁵‘E ‘ikai te nau momo‘i ‘ai ke tula ha feitu‘u ‘o honau ‘ulu, pea ‘e ‘ikai te nau tele ‘a e tuliki ‘o honau kava, pe tu‘utu‘u honau sino.

⁶Te nau tapu ki honau ‘Otua, pea ‘e ‘ikai te nau maumau ‘a e tapu ‘o e huafa ‘o honau ‘Otua: he ‘oku nau ‘atu ‘a e ngaahi feilaulau tutu, ko e me‘akai ‘a honau ‘Otua: ko ia, te nau tāpuhā.

⁷‘E ‘ikai te nau mali mo ha fefine fe‘auaki, pe ha taha kuo ‘uli‘i; pea ‘e ‘ikai te nau mali mo ha fefine kuo vete mei hono husepāniti; he ‘oku tapu ‘a e taula‘eiki ki hono ‘Otua.

⁸Ko ia te mou fakatāpui ia, he ‘oku ne ‘atu ‘a e me‘akai ‘a ho ‘Otua: te ne tāpuhā kiate kimoutolu; he ko e tāpuhā au, ‘a e ‘Eiki ‘oku fakatāpui kimoutolu.

⁹Pea ka maumau ‘ene tapu ‘e he ‘ōfefine ‘o ha taula‘eiki ‘i ha‘ane fe‘auaki, ‘oku ne maumau ‘a e tapu ‘a ‘ene tamai: ‘e fakamomofi ia ‘aki ‘a e afi.

¹⁰Pea ko ia ‘i ha‘a taula‘eiki ‘oku taula‘eiki-lahi, ‘a ia kuo lingi ki hono ‘ulu ‘a e lolo fakanofo, pea kuo fakatāpui ke ‘ai ‘a e ngaahi kofu, ‘e ‘ikai te ne tuku mafue hono ‘ulu, pe hae hono kofu:

¹¹pea ‘e ‘ikai te ne hū ki fale ki ha pekia; neongo ko ‘ene tamai, pe ko ‘ene fa‘ē, ‘e ‘ikai te ne fakata‘ema‘a ai ia;

¹²pea ‘e ‘ikai te ne hū ai kitu‘a mei he feitu‘u tapu, pe maumau ‘a e tapu ‘a e feitu‘u tapu ‘a hono ‘Otua; he ‘oku ‘iate ia ‘a e kalauni ko e lolo fakanofo ‘a hono ‘Otua: ko Sihova au.

¹³Pea ‘e mali ia mo ha fefine tāupo‘ou.

¹⁴Ko ha uitou, pe ha taha kuo vete, pe ha taha kuo ‘uli‘i, ha fe‘auaki, ‘e ‘ikai te ne mali mo ha taha pehē: ka te ne mali mo ha tāupo‘ou pē, ha taha mei hono kakai.

¹⁵Pea ‘e ‘ikai te ne fakame‘avale‘i hono hako ‘i he kakai; he ko e ‘Eiki au ‘oku fakatāpui ia.

¹⁶Pea na‘e folofola ‘a Sihova kia Mōsese, ‘o pehē, Lea kia ‘Ēlone; ‘o pehē,

¹⁷Ko ia ‘oku ‘ila ‘i ho hako ‘i he ngaahi to‘utangata ke‘oua te ne ‘unu‘unu mai ke ‘atu ‘a e me‘akai ‘a hono ‘Otua.

¹⁸He ‘ilonga ‘a ia ‘oku ai hano ‘ila, ‘e ‘ikai ‘unu‘unu mai ia; ha kui, pe heke, pe fakakonga, pe hulu;

¹⁹pe ha tangata ‘oku ve‘e fasi, pe nima fasi,

²⁰pe ha tu‘apiko, pe pukupuku, pe ha mata kovi, pe pokua, pe lafa‘ia, pe kuo momosi hono tenga.

²¹‘Ilonga ha tangata ‘i he hako ‘o ‘Ēlone ko e taula‘eiki ‘oku ‘i ai ha ‘ila, ‘e ‘ikai kākunga ia ke ‘atu ‘a e ngaahi feilaulau tutu ‘a Sihova: ‘oku ‘ila; ‘e ‘ikai kākunga ia ke ‘atu ‘a e me‘akai ‘a hono ‘Otua.

²²Ka te ne tokoni pē ‘i he me‘akai ‘a hono ‘Otua, ‘a e me‘a toputapu mo e me‘a tapu foki.

²³Ka ‘e ‘ikai te ne hū ki he Tatau, pe ofiofi ki he ‘ōlita, he ‘oku ‘iate ia ha ‘ila; koe‘uhi ke ‘oua na‘a ne maumau‘i ‘a e tapu ‘a hoku ngaahi potu tapu: he ko e ‘Eiki au ‘oku fakatāpui ‘a e ngaahi potu ko ia.

²⁴Pea na‘e fakahā pehē ‘e Mōsese kia ‘Ēlone, mo hono ngaahi foha, pea mo ha‘a ‘Isileli kātoa.