Read KO E TOH TAPU KATOA TONGA LEVITIKO 22 Bible Online

LEVITIKO 22 - KO E TOH TAPU KATOA TONGA bible

LEVITIKO 22

¹PEA folofola ‘a Sihova kia Mōsese, ‘o pehē,

²Lea kia ‘Ēlone mo hono ngaahi foha ke nau fakatāpui kinautolu mei he ngaahi me‘a tapu ‘a ha‘a ‘Isileli, ‘o ‘oua te nau maumau ‘a e tapu ‘a hoku hingoa ‘i he ngaahi me‘a ‘oku nau fakatāpui ma‘aku: ko Sihova au.

³Tala kiate kinautolu, ‘Ilonga ha taha ‘i homou hako ‘i homou ngaahi to‘utangata ‘a ia te ne ‘unu‘unu ki he ngaahi me‘a tapu, ‘a ia ‘oku fakatāpui ‘e ha‘a ‘Isileli kia Sihova, ka ‘oku ‘iate ia hano ta‘ema‘a‘anga, ‘e tu‘usi ‘a e laumālie ko ia mei hoku ‘ao: ko Sihova au.

⁴‘Ilonga ‘a ia ‘i he hako ‘o ‘Ēlone ‘oku kilia, pe ‘oku mahaki ‘au, ‘oku tapu ‘ene kai ‘i he ngaahi me‘a tapu kae‘oua ke ne ma‘a. Pea ko ia kuo ne lave ki ha me‘a ‘oku ta‘ema‘a ‘i ha pekia, pe ‘i ha tangata ‘oku tafe hono huhu‘a;

⁵pe ha taha kuo ala ki ha fa‘ahinga totolo, ‘a ia ‘oku ne ta‘ema‘a ai; pe ko e hā fua hono ta‘ema‘a‘anga —

⁶ko e tokotaha kuo ne lave ki ha me‘a pehē te ne ta‘ema‘a ‘o a‘u ki he po‘uli, pea ‘e ‘ikai te ne kai ‘i he ngaahi me‘a tapu, ka ‘i he‘ene kaukau mu‘a ‘i ha vai.

⁷Ka ‘oka tō ‘a e la‘ā te ne ma‘a, pea hili ia te ne kai ‘i he ngaahi me‘a tapu; he ko ‘ene me‘akai ia.

⁸Ko e me‘a ‘oku mate ‘iate ia, pe kuo hae ‘e ha manu, ‘e ‘ikai te ne kai mo e fakata‘ema‘a ia: ko Sihova au.

⁹Ko ia te nau tauhi ‘a e me‘a ‘oku ou tuku ke nau tauhi, na‘a nau hia ai ‘o mate ko ‘enau maumau hono tapu: ko e ‘Eiki au ‘oku ou fakatāpui kinautolu.

¹⁰‘Ilonga ha kehe ‘e ‘ikai te ne kai ‘a e me‘a ‘oku tapu: ha taha ‘oku ‘āunofo ki he taula‘eiki, pe ha ngāue unga, ‘e ‘ikai te ne kai ‘i he me‘a tapu.

¹¹Ka ‘o kapau ko ha tokotaha kuo fakatau ‘e he taula‘eiki, ko e fua ‘o ‘ene pa‘anga, te ne kai ai: pea mo kinautolu kuo fanau‘i ‘i hono fale, te nau tokoni kinautolu ‘i he‘ene me‘akai.

¹²Ko e ‘ōfefine foki ‘o ha taula‘eiki kuo mali mo ha kehe ‘e ‘ikai kai ia ‘i he ngaahi me‘a tapu kuo apo.

¹³Ka ‘o kapau kuo uitou ‘a e ‘ōfefine ‘o ha taula‘eiki, pe kuo vete, pea ‘oku ‘ikai ha‘ane fānau, pea kuo ne foki ki he fale ‘o ‘ene tamai, ‘o hangē ko ha‘ane finemui, ‘e kai ‘e ha taha pehē ‘i he me‘akai ‘a ‘ene tamai: ka ‘e ‘ikai tokoni ai ha kehe.

¹⁴Pea kapau ‘e tokoni ta‘e‘ilo ‘e ha taha ‘i he me‘a tapu, pea te ne toki ‘atu ki he taula‘eiki ‘a e me‘a tapu ko ia, mo fakalahi ‘aki hano vahenima.

¹⁵‘Io, ‘e ‘ikai te nau fakame‘avale‘i ‘a e ngaahi me‘a tapu ‘a ha‘a ‘Isileli, ‘a ia kuo nau hapai kia Sihova;

¹⁶‘o hilifaki ai ki he kakai ha hia fakahalaia ‘i ha‘anau kai ‘enau ngaahi me‘a tapu; he ko Sihova au ‘oku ou fakatāpui ‘a e ngaahi me‘a ko ia.

¹⁷Pea folofola ‘a Sihova kia Mōsese, ‘o pehē,

¹⁸Lea kia ‘Ēlone mo hono ngaahi foha, pea mo ha‘a ‘Isileli kātoa, pea tala kiate kinautolu, Ka ai ha taha ‘i ha‘a ‘Isileli, pe ‘i he muli ‘oku nofo mo e ‘Isileli, ‘a ia ‘oku ne ‘atu ha‘ane kōpano, (pe ko ha‘anau tukumo‘ui, pe ko ha‘anau me‘a‘ofa pē ‘a e kōpano ko ia, ‘a ia ‘oku nau ‘atu kia Sihova), ko e feilaulau-mōifua.

¹⁹Pea koe‘uhi ke fai ai ha hōifua kiate kimoutolu, te mou ‘atu ha manu ta‘ehano mele, ko e manu tangata, pe ko ha pulu, pe sipi, pe kosi.

²⁰Ka ko e manu ‘oku ‘ila ‘e ‘ikai te mou ‘atu, he ‘e ‘ikai fai ai ha hōifua kiate kimoutolu.

²¹Pea ko ia ‘oku ne ‘atu ha feilaulau-‘ofa kia Sihova ke fakaai ‘ene tukumo‘ui, pe ke feia ha me‘a‘ofa; pe ko ha pulu pe ko ha sipi ka ‘e haohaoa pē kae tali: ‘e ‘ikai ‘i ai ha momo‘i mele.

²²Ko e manu ‘oku kui, pe fasi, pe ‘oku fakakonga pē, pe ‘oku ‘au, pe ‘oku pokua, pe lafa‘ia, ‘e ‘ikai te mou ‘atu ha me‘a pehē kia Sihova ke feia ‘aki ha feilaulau tutu ma‘a e ‘Eiki ‘i he ‘ōlita.

²³‘E ngofua ha‘o ‘atu ha pulu pe lami ‘oku hulu atu hano konga, pe ‘oku masiva, ‘o kapau ko ha me‘a‘ofa pē; ka ‘e ‘ikai tali ia ki ha tukumo‘ui.

²⁴‘E ‘ikai te mou ‘atu ha fufula kia Sihova, pe ko e momosi pe tuki, pe mio‘i, pe faito‘o: ‘io, ‘i homou fonua ‘e ‘ikai te mou ngaohi ha manu ke pehē.

²⁵Pea ‘e ‘ikai te mou tali mei ha muli ha taha ‘o e ngaahi me‘a ko ia ke ‘atu mo‘o me‘akai ‘o homou ‘Otua; he kuo e‘a ai honau fakaka‘anga; ‘oku ‘i ai ha mele: ‘e ‘ikai fai ai ha hōifua kiate kimoutolu.

²⁶Pea folofola ‘a Sihova kia Mōsese, ‘o pehē,

²⁷Ka fā‘ele‘i ha pulu pe sipi pe kosi, te ne ‘aho fitu ‘i he huhu ‘o ‘ene fa‘ē; pea ‘i hono ‘aho valu, ‘o fai atu, ‘e ngofua ke kōpano ‘aki, ‘o fai‘aki ha feilaulau tutu kia Sihova.

²⁸Pea neongo ko ha pulu pe sipi, ka ‘e ‘ikai te mou tāmate‘i ‘a e sināmanu mo ‘ene tama ‘i ha ‘aho pē taha.

²⁹Pea ka mou ka feia ha feilaulau fakafeta‘i kia Sihova, ke pehē ho‘omou fai kae talia kimoutolu.

³⁰‘E kai ia ‘i he ‘aho ‘o hono feia; ‘e ‘ikai te mou fakatoe hano me‘a ki he ‘apongipongi; ko Sihova au.

³¹Ko ia te mou tauhi ‘eku ngaahi fekau, mo fai ki ai: ko Sihova au.

³²Pea ‘e ‘ikai te mou fakame‘avale‘i ‘a e hingoa tapu ‘o‘oku, ka te u tāpuhā‘ia ‘i he lotolotonga ‘o ha‘a ‘Isileli: ko Sihova au ‘oku ou fakatāpui kimoutolu,

³³‘a ia na‘a ku ‘omi kimoutolu kitu‘a mei ‘Isipite ke u hoko ko homou ‘Otua: ko Sihova au.