Read KO E TOH TAPU KATOA TONGA LEVITIKO 23 Bible Online

LEVITIKO 23 - KO E TOH TAPU KATOA TONGA bible

LEVITIKO 23

¹PEA folofola ‘a Sihova kia Mōsese, ‘o pehē,

²Lea ki ha‘a ‘Isileli, pea tala kiate kinautolu, ko e ngaahi ‘aho tu‘utu‘uni ‘a Sihova, ‘a ia te mou fanongonongo ‘o tala ke fakataha tapu — ko eni ia ‘eku ngaahi ‘aho kotofa ko ia.

³Ko e ‘aho ‘e ono ‘e fai ngāue ai: ka ‘i hono ‘aho fitu ‘e fai ha Sāpate mālōlō, ko e fakataha tapu; tapu ha‘amou fai ai ha momo‘i ngāue: ko e Sāpate ia kia Sihova ‘i homou ngaahi tangutu‘anga kotoa pē.

⁴Ko eni ‘a e ngaahi ‘aho tu‘utu‘uni ‘a Sihova, ‘a e ngaahi kātoanga tapu ‘a ia te mou fanongonongo ‘i he hoko honau taimi.

⁵Ko hono hongofulu mā fā ‘o e ‘aho ‘i he ‘uluaki māhina, efiafi, ko e Pāsova ia ‘a e ‘Eiki.

⁶Pea ‘i hono ‘aho hongofulu mā nima ‘o e māhina ko ia ‘oku kamata ai ‘a e kātoanga Tapu lēvani ‘a e ‘Eiki: ko e ‘aho ‘e fitu te mou kai mā ta‘elēvani.

⁷Ko e ‘uluaki ‘e fai ha‘amou fakataha tapu: ‘e ‘ikai te mou momo‘i fai ai ha ngāue fakatamaio‘eiki.

⁸Ka te mou ‘atu kia Sihova ha feilaulau tutu ‘o ‘aho fitu: ‘i hono ‘aho fitu ‘e ai ha fakataha tapu; ‘e ‘ikai te mou momo‘i fai ai ha ngāue ‘o hoto lakanga.

⁹Pea folofola ‘a Sihova kia Mōsese, ‘o pehē,

¹⁰Lea ki ha‘a ‘Isileli, pea tala kiate kinautolu, Ka mou ka hū ki he fonua ‘a ia ‘oku ou ‘atu kiate kimoutolu, ‘o mou utu ai hamou ta‘u, pea te mou toki ‘omi ki he taula‘eiki ‘a e ‘ū koane polopolo ‘o homou ta‘u:

¹¹pea ‘e tātākalo ‘e ia ‘a e ‘ū koane ‘i he ‘ao ‘o Sihova ke fai ai ha hōifua kiate kimoutolu. ‘E fai hono tākalo ‘aki ‘e he taula‘eiki ‘i he ‘apongipongi hili ‘a e Sāpate.

¹²Pea ‘i he ‘aho ‘oku mou apo ai ‘a e ‘ū koane te mou feia ha lami tangata, ta‘emele pea ‘i hono ‘uluaki ta‘u, mo‘o feilaulau-mōifua kia Sihova.

¹³Pea ko hono feilaulau me‘akai ko e vahehongofulu ‘e ua ‘o e ‘elito‘i mahoa‘a, kuo natu loto, ko e feilaulau fai‘aki ‘a e afi kia Sihova mo‘o ngangatu fakahōifua, pea ko hono kava ‘o‘ona ko e vahefā ‘o ha hina uaine.

¹⁴Pea ‘e ‘ikai te mou kai ha mā, pe koane tunu, pe ha fua‘i koane tō, ‘o a‘u ki he ‘aho mate pē ko ia; ‘o ‘oua pē ke mou ‘omi ‘a e kōpano ‘a homou ‘Otua. Ko e tu‘utu‘uni ta‘engata ia ‘i homou ngaahi tangutu‘anga kotoa pē ‘o laui to‘utangata.

¹⁵Pea te mou kamata ‘apongipongi, hili ‘a e Sāpate, ke lau ‘aho; ‘io, te mou kamata mei he ‘aho na‘a mou ‘omi ai ‘a e ‘ū koane tākalo, ‘o fakakakato ha uike ‘e fitu:

¹⁶te mou fai atu ki he ‘aho hili hono fitu ‘o e uike, ‘o kakato ai hamou nimangofulu‘i ‘aho; pea te mou toki ‘atu kia Sihova he feilaulau me‘akai mei he ta‘u fo‘ou.

¹⁷Te mou omi mo kimoutolu mei homou ngaahi tangutu‘anga ha ongo fo‘i mā tākalo ‘e ua, kuo ngaohi ‘aki ha vahehongofulu ‘e ua: ‘e fai‘aki ‘a e ‘elito‘i mahoa‘a; ‘e ta‘o lēvani ia mo‘o polopolo ta‘u ki he ‘Eiki.

¹⁸Pea te mou ‘atu fakataha mo e ongo fo‘i mā ha fitu‘i lami tangata, ta‘emele pea ‘i hono ‘uluaki ta‘u, pea mo ha pulu mui pea mo ha ongo sipi tangata: ko e feilaulau-mōifua ia kia Sihova, pea ‘e ai mo hano feilaulau me‘akai mo hana kava, ke tutu mo‘o ngangatu fakahōifua ki he ‘Eiki.

¹⁹Pea te mou feia ha kosi tangata mo‘o feilaulau-angahala, mo ha ongo lami tangata ‘i hona ‘uluaki ta‘u mo‘o feilaulau-‘ofa.

²⁰Pea ‘e tātākalo kinautolu ‘e he taula‘eiki ‘i he ‘ao ‘o Sihova, fakataha mo e mā polopolo, ko e feilaulau pō: ‘e tapu ia kia Sihova, fakataha mo e ongo lami, mo‘o ‘inasi ‘o e taula‘eiki.

²¹Pea te mou fanongonongo ‘i he ‘aho mate pē ko ia, ‘E fai hamou fakataha tapu, ko e ngāue ‘a homou lakanga kehekehe ‘e ‘ikai te mou fai. Ko e tu‘utu‘uni ta‘engata ia kiate kimoutolu ‘i homou ngaahi tangutu‘anga kotoa pē ‘o laui to‘utangata.

²²Pea ka mou ka utu ‘a e ta‘u ‘o homou fonua, ‘e ‘ikai te mou utu ke ‘osi‘osingamālie ho‘o ngoue ‘o a‘u ki he tuliki, pea ko e ngangana ‘a ho ta‘u ‘e ‘ikai te ke tufi: te ke tuku pē ia ki he masiva mo e muli: ko Sihova au ko homou ‘Otua.

²³Pea folofola ‘a Sihova kia Mōsese, ‘o pehē,

²⁴Lea ki ha‘a ‘Isileli, ‘o pehē, ‘I hono fitu ‘o e māhina, ‘i hono ‘uluaki ‘aho, ‘e ai hamou ‘aho faka-Sāpate; ko e fakamanatu ifi, ko e fakataha tapu.

²⁵Ko e ngaahi ngāue ‘a homou lakanga ‘e ‘ikai te mou fai: pea te mou ‘atu ha feilaulau tutu kia Sihova.

²⁶Pea folofola ‘a Sihova kia Mōsese, ‘o pehē,

²⁷Tauange mo kimoutolu ‘a hono ‘aho hongofulu ‘o e māhina fitu ni, he ko e ‘Aho Fakalelei ia: ko hamou ‘aho fakataha tapu ia, pea te mou fakavaivai ai homou laumālie; pea te mou ‘atu ha feilaulau tutu kia Sihova.

²⁸Pea ‘oku tapu ‘a e ngāue kotoa pē kiate kimoutolu ‘i he ‘aho mātē pē ko ia: he ko ha ‘aho fakalelei: ke feia ‘a e fakalelei ma‘amoutolu ‘i he ‘ao ‘o Sihova ko homou ‘Otua.

²⁹He ka ‘ilonga ha laumālie ‘e ‘ikai te ne fakavaivai ‘i he ‘aho ko ia, ‘e tu‘usi ia mei hono kakai.

³⁰‘Io, ‘ilonga ha taha te ne fai ha momo‘i ngāue ‘i he ‘aho mātē pē ko ia, te u faka‘auha ‘a e tokotaha ko ia mei he lotolotonga ‘o hono kakai.

³¹‘Oku tapu kiate kimoutolu ‘a e ngāue kotoa pē: ko e tu‘utu‘uni ta‘engata ia ‘i homou ngaahi tangutu‘anga kotoa pē ‘o laui to‘utangata.

³²Ko e Sāpate ‘o e Sāpate ia kiate kimoutolu, pea te mou fakavaivai ai homou laumālie: ‘i hono hiva ‘o e ‘aho ‘o e māhina, efiafi, ‘e kamata ‘a e tapu: pea te mou fai mei he efiafi ki he efiafi.

³³Pea folofola ‘a Sihova kia Mōsese, ‘o pehē,

³⁴Lea ki ha‘a ‘Isileli, ‘o pehē, ‘I hono ‘aho hongofulu mā nima ‘o e māhina fitu ko eni ‘e kamata ai ‘a e kātoanga Fale-lou‘akau, pea ‘e fai ia kia Sihova ‘o ‘aho fitu.

³⁵‘I he ‘uluaki ‘aho ‘e fai ha fakataha tapu; ‘e ‘ikai te mau fai ‘a e ngāue ‘o homou ngaahi lakanga.

³⁶Ko e ‘aho ‘e fitu te mou ‘atu ‘a e ngaahi feilaulau tutu kia Sihova: ko hono ‘aho valu ‘e ai ha‘amou fakataha tapu; pea te mou ‘atu ha feilaulau tutu kia Sihova: ko e faka‘osi ia, ‘e tapu ‘aupito ha‘amou fai ‘a e ngāue ‘a homou ngaahi lakanga.

³⁷Ko e ngaahi ‘aho tu‘utu‘uni ia ‘a Sihova, ‘a ia te mou fanongonongo ke fakataha tapu, ke ‘atu ai feilaulau tutu kia Sihova, ‘a e feilaulau mōifua mo e feilaulau-me‘akai, ‘a e tāmate manu, mo e ngaahi kava, takitaha ‘i hono ‘aho:

³⁸tukukehe ‘a e ngaahi Sāpate ‘a e ‘Eiki, pea tukukehe ho‘omou ngaahi me‘a faaki, pea tukukehe ho‘omou ngaahi tukumo‘ui, pea tukukehe ho‘omou ngaahi me‘a‘ofa ‘a ia ‘oku mou ‘atu ki he ‘Eiki.

³⁹Tauange mo kimoutolu ‘a e ‘aho hongofulu mā nima ‘o hono fitu ‘o e māhina, ‘oka ‘osi ho‘omou utu ‘a e fua ‘o e kelekele, ke mou fai ai ‘a e kātoanga ‘a Sihova ‘o ‘aho fitu. ‘I he ‘uluaki ‘aho ‘e fai ha faka-Sāpate, pea ‘i hono ‘aho valu ‘e fai ha faka-Sāpate.

⁴⁰Pea ‘i he ‘uluaki ‘aho te mou to‘o ha‘amou ‘akau kakala, ko e ngaahi lou paame, mo ha ‘akau lau tafu‘ufu‘u, mo e uilou ai: pea te mou fakafiefia ‘i he ‘ao ‘o Sihova ko homou ‘Otua ‘o ‘aho fitu.

⁴¹Pea te mou tauhi ia ko e kātoanga ki he ‘Eiki ‘o ‘aho fitu ‘i he ta‘u kotoa pē: ko e tu‘utu‘uni ta‘engata ia ke fai ‘e homou ngaahi to‘utangata: te mou fai ia ‘i hono fitu ‘o e māhina.

⁴²Te mou nofo fale lou‘akau ‘o ‘aho fitu; ko e kau ‘Isileli tupu‘i fonua kotoa pē te nau nofo fale lou‘akau;

⁴³koe‘uhiā ke ‘ilo ‘e homou ngaahi to‘utangata na‘a ku tuku ke nofo fale lou‘akau ‘a ha‘a ‘Isileli ‘i he‘eku ‘omi kinautolu mei ‘Isipite: ko Sihova au ko homou ‘Otua.

⁴⁴Ko ia na‘e fakahā ‘e Mōsese ‘a e ngaahi ‘aho tu‘utu‘uni ‘a Sihova ki ha‘a ‘Isileli.