Read KO E TOH TAPU KATOA TONGA LEVITIKO 24 Bible Online

LEVITIKO 24 - KO E TOH TAPU KATOA TONGA bible

LEVITIKO 24

¹PEA folofola ‘a Sihova kia Mōsese, ‘o pehē,

²Fekau ki ha‘a ‘Isileli ke nau ‘omi kiate koe ha lolo ‘ōlive ma‘a, ko e lolo kuo tuki ki he maama; koe‘uhi ke ai ha maama ke ulo ma‘u pē.

³‘E teuteu ia ‘e ‘Ēlone ma‘u ai pē, mei he efiafi ki he ‘apongipongi, ‘i he ‘ao ‘o e ‘Eiki, ‘i he tu‘a tatau ‘o e fakamo‘oni‘anga ‘i he Tēniti Fe‘iloaki‘anga.

⁴Te ne teuteu ‘a e ngaahi nge‘esi maama ‘i he funga tu‘unga maama ma‘a ‘i he ‘ao ‘o Sihova ma‘u ai pē.

⁵Pea te ke to‘o ha ‘elito‘i mahoa‘a, pea ke ta‘o ‘aki ha keke ‘e hongofulu mā ua: ko e vahehongofulu ‘e ua ‘e ‘alu ki he keke takitaha.

⁶Pea te ke ‘ai ia ki he tēpile ma‘a ‘i he ‘ao ‘o Sihova, ko e tu‘unga ‘e ua, ‘o taki ono ‘a e tu‘unga.

⁷Pea te ke hilifaki ki he ongo tu‘unga ha laipeno mo‘onia: ko hono me‘a fakamanatu ia ‘o e mā, ke feia ‘aki ‘a e afi kia Sihova.

⁸Ko e Sāpate kotoa pē te ne fokotu‘u ia ‘i he ‘ao ‘o Sihova ma‘u ai pē: ko e me‘a mei ha‘a ‘Isileli ia, ko e fuakava ta‘engata.

⁹Pea ko e ‘inasi ia ‘o ‘Ēlone mo hono ngaahi foha, pea te nau kai ia ‘i ha potu ‘oku tapu; he ko e me‘a toputapu ia ma‘ana ‘i he ngaahi feilaulau tutu ‘a Sihova: ko e tu‘utu‘uni ta‘engata ia.

¹⁰Pea hū kitu‘a ‘a e tama ‘a ha fefine ‘Isileli, ka ko ‘ene tamai ko e ‘Isipite, ‘o ne ‘alu ki he lotolotonga ‘o ha‘a ‘Isileli: pea ke ‘i he ‘apitanga ‘a e tama ‘a e fefine ‘Isileli pea mo ha tangata ‘Isileli; pea ko e tama ‘a e fefine ‘Isileli na‘a ne kape‘i ‘a e Huafa, ‘o ne tālalakulaku ki ai: ko ia na‘a nau ‘omi ia kia Mōsese.

¹¹Pea ko e hingoa ‘o ‘ene fa‘ē ko Selomiti, ko e ‘ōfefine ‘o Tīpili, ‘i he matakali ‘o Tani.

¹²Pea na‘a nau tuku le‘ohi ia, kae‘oua ke fakapatonu mai ma‘anautolu mei he fofonga ‘o Sihova.

¹³Pea folofola ‘a Sihova kia Mōsese, ‘o pehē,

¹⁴‘Ave ia kuo tālalakulaku ki he tu‘a ‘apitanga, pea ko kinautolu kotoa pē na‘e fanongo ki ai ke nau hilifaki honau nima ki hono ‘ulu, pea ‘e tolomaka‘i ia ‘e he fakataha kotoa.

¹⁵Pea te ke lea ki ha‘a ‘Isileli, ‘o pehē, Ko ia ‘oku ne tālalakulaku ki hono ‘Otua te ne fua ‘ene hia.

¹⁶Pea ko ia ‘oku ne kape ki he huafa ‘o Sihova ‘e mate tāmate‘i ia; ‘e mātu‘aki tolomaka‘i ia ‘e he fakataha kotoa: tatau pē ‘a e muli mo e tupu‘i fonua; kuo ne talakaa‘i ‘a e Huafa: te ne mate tāmate‘i.

¹⁷Pea ko ia ‘oku ne tāmate‘i ha tangata te ne mate tāmate‘i;

¹⁸pea ko ia ‘oku ne tāmate‘i ha manu te ne totongi ia: ‘a e mo‘ui ‘aki ha mo‘ui.

¹⁹Pea ko ia ‘oku ne fakatupu ha mele ‘i ha taha ‘o hono kakai, hangē ko ‘ene fai ‘e pehē ‘a e fai kiate ia;

²⁰ko e fasi ‘aki ha fasi, ko e fo‘i mata ‘aki ha fo‘i mata, ko e nifo ‘aki ha nifo: hangē ko e mele kuo ne fai ‘i he tangata ‘e pehē hono fai kiate ia.

²¹Pea ko ia ‘oku ne tāmate‘i ha manu te ne totongi, ka ko ia ‘oku ne tāmate‘i ha tangata te ne mate.

²²‘E taha pē ho‘omou lao; tatau ki ha muli pea mo ha tupu‘i-fonua; he ko Sihova au ko homou ‘Otua.

²³Pea lea ‘a Mōsese ki ha‘a ‘Isileli, pea na‘a nau ‘ave kitu‘a ‘apitanga ‘a e siana na‘e tālalakulaku; pea nau tolomaka‘i ia. ‘Io, na‘e fai ‘e ha‘a ‘Isileli ‘o hangē ko e tu‘utu‘uni ‘a e ‘Eiki kia Mōsese.