Read KO E TOH TAPU KATOA TONGA LEVITIKO 26 Bible Online

LEVITIKO 26 - KO E TOH TAPU KATOA TONGA bible

LEVITIKO 26

¹‘E ‘ikai te mou ngaohi hamou ‘otua noa, pea ‘e ‘ikai te mou fokotu‘u hamou tamapua pe pou, pea ‘e ‘ikai te mou tuku ‘i homou fonua ha maka tongitongi ke lotu ki ai: he ko Sihova au ko homou ‘Otua.

²Te mou tauhi ‘eku ngaahi Sāpate, pea te mou ‘apasia ki hoku fale tapu: ko Sihova au.

³Kapau te mou fou ‘i he‘eku ngaahi tu‘utu‘uni, mo tauhi ‘eku ngaahi fekau ‘o fai ki ai;

⁴pea te u toki ‘atu ha‘amou ‘uha ‘i hono taimi totonu, pea ‘e lakuna ‘e he kelekele hono mahu, pea ko e ngaahi ‘akau ‘o e ngoue te nau laku mai ‘enau fua.

⁵Pea ‘e fea‘utaki ho‘omou ‘au‘au mo e toli kālepi, pea fea‘utaki ‘a e toli kālepi mo e tō ta‘u: pea te mou kai me‘akai ke mākona, pea te mou nofo nonga ‘i homou fonua.

⁶Pea te u tuku ke melino ‘a e fonua, pea te mou tākoto, ‘o ‘ikai fakahoha‘a ‘e ha taha: pea te u faka‘osi ‘a e manu kovi mei he fonua, pea ‘e ‘ikai fou atu ‘a e heletā ‘i homou fonua.

⁷Pea te mou tuli homou ngaahi fili, pea te nau tō ‘i he heletā ‘i homou ‘ao.

⁸‘Io, ko hamou toko nima te nau tuli ha teau, pea ko hamou toko teau te nau tuli ha mano: pea ‘e tō homou ngaahi fili ‘i he heletā ‘i homou ‘ao.

⁹Pea te u fofonga kiate kimoutolu, pea te u fakafanau kimoutolu mo fakatokolahi; pea te u fakapapau ‘eku kovinānite mo kimoutolu.

¹⁰Pea te mou kai ‘a e ta‘u kuo motu‘a ‘aupito; ‘io, te mou toki fakahū mai ‘a e ta‘u motu‘a kae fa‘oaki ‘a e fo‘ou.

¹¹Pea te u tu‘u hoku Tāpanekale ‘i homou lotolotonga; pea ‘e ‘ikai fehi‘a ‘a hoku loto kiate kimoutolu.

¹²Pea te u hā‘ele‘ele ‘i homou lotolotonga, pea te u nofo ko homou ‘Otua, pea te mou nofo mai ko hoku kakai.

¹³Ko Sihova au ko homou ‘Otua na‘e ‘omi kimoutolu mei ‘Isipite ke ‘oua te mou tamaio‘eiki kiate kinautolu; pea kuo u fesi‘i ‘a e ‘akau ‘o ho‘omou ‘ioke; pea kuo u ‘ai ke mou ha‘ele kēvekeva tonu.

¹⁴Ka ‘o kapau ‘e ‘ikai te mou talangofua kiate au, ‘o ‘ikai te mou fai ‘a e ngaahi fekau kehekehe ko eni; ka mou fakatale‘i ‘eku ngaahi tu‘utu‘uni,

¹⁵pea fehi‘a ‘e homou loto ki he‘eku konisitūtone, ‘o ‘ikai te mou fai ‘eku ngaahi tu‘utu‘uni kehekehe, ka mou maumau‘i ‘eku kovinānite;

¹⁶ko au foki te u fai kiate kimoutolu ‘o pehē; te u fakanofo kiate kimoutolu ‘a Fakailifia, ‘a Fakalilelila mo Mofi, ‘a ia te nau keina ‘a e mata, mo fakamaha ‘a e mo‘ui: pea ‘e hoko ho‘omou tō ta‘u ko e kulanoa, he ‘e kai ia ‘e homou ngaahi fili.

¹⁷Pea te u fofonga ‘ita kiate kimoutolu, pea ‘e taa‘i kimoutolu ‘i he ‘ao ‘o homou ngaahi fili: pea ‘e fakaehaua kimoutolu ‘e he fa‘ahinga ‘oku fehi‘a kiate kimoutolu; pea te mou hola neongo ‘oku ‘ikai ha tuli.

¹⁸Pea kapau te mou kei talangata‘a kiate au, neongo e ngaahi me‘a ko ē; pea te u tautea kimoutolu, ‘o tātu‘ofitu hake koe‘uhi ko ho‘omou ngaahi angahala.

¹⁹Pea te u laiki ‘a e mālohi ‘oku mou pōlepole ai; pea te u ‘ai ke hangē ha ‘aione ‘a homou langi, pea hangē ha kapa homou kelekele:

²⁰pea ‘e maumau noa homou kakava: he ‘e ‘ikai lakuna ‘e he kelekele hono mahu, pea ‘e ‘ikai fua ‘e he ngaahi ‘akau ‘o e fonua.

²¹Pea kapau te mou fakafepaki kiate au, ‘o ‘ikai te mou fie talangofua mai; pea te u fakalahi mala kiate kimoutolu, ‘o tātu‘ofitu, ‘o fakatatau ki ho‘omou angahala.

²²Pea te u tuku atu ‘a e manu kaivao, ‘a ia te ne fakata‘efanau kimoutolu, mo faka‘auha ho‘omou monumanu, pea fakatoko si‘i kimoutolu; pea ‘e ta‘e‘uhia homou ngaahi hala.

²³Pea kapau ‘e ‘ikai te mou liliu mai ‘i he ngaahi me‘a ko ia, ka mou kei fakafepaki mai;

²⁴pea te u toki fakafepaki mo au kiate kimoutolu; pea te u taa‘i kimoutolu ‘e au foki, ‘o tātu‘ofitu, koe‘uhi ko ho‘omou ngaahi angahala.

²⁵Pea te u ‘omi ha heletā kiate kimoutolu, ‘a ia te ne fai ‘a e sauni ‘o e fuakava; pea ‘e fakataha kimoutolu ki ho‘omou ngaahi kolo, pea te u ‘atu ‘a e mahaki faka‘auha kiate kimoutolu; pea ‘e tuku kimoutolu ki he nima ‘o homou ngaahi fili.

²⁶Pea ‘i he‘eku maumau homou falala‘anga kai, ‘e ta‘o ho‘omou mā ‘e ha hongofulu‘i fefine ‘i ha ngoto‘umu pē taha, pea te nau fakafuofua ho‘omou mā ‘i he‘enau toe ‘atu; pea te mou kai kae ‘ikai mākona.

²⁷Pea kapau ‘e ‘ikai te mou talangofua kiate au, ka mou fakafepaki mai neongo e ngaahi me‘a ko ia;

²⁸pea ‘e toki kakaha ‘eku fakafepaki atu kiate kimoutolu: pea te u tautea kimoutolu, ‘e au foki, ‘o tātu‘ofitu, koe‘uhi ko ho‘omou ngaahi angahala.

²⁹Pea te mou kai ‘a e kakano ‘o homou ngaahi foha, ‘io, ko e kakano ‘o homou ngaahi ‘ōfefine te mou kai.

³⁰Pea te u maumau‘i ho‘omou ngaahi sia tapu, pea te u tā ho‘omou ngaahi ‘īmisi‘i la‘ā, pea te u laku homou ngaahi ‘anga‘anga mo e ngaahi ‘anga‘anga ‘o ho‘omou ngaahi tamapua; pea ‘e fehi‘a ‘a hoku loto kiate kimoutolu.

³¹Pea te u ngaohi ho‘omou ngaahi kolo ko e koto lala, pea te u ngaohi homou ngaahi fale tapu ko e koto maumau, pea ‘e ‘ikai te u nanamu ki ho‘omou ngaahi ngangatu fakahōifua.

³²Pea te u ngaohi ‘a e fonua ko e koto li‘aki: pea ko homou ngaahi fili ‘oku nofo ai te nau ofongi ia.

³³Ka te u fakamovetevete kimoutolu ki he ngaahi pule‘anga, pea te u tafi-ki-tu‘a-niu kimoutolu ‘aki ‘a e heletā; pea ‘e hoko homou fonua ko e koto li‘aki, pea ko ho‘omou ngaahi kolo ko e koto maumau.

³⁴Pea ‘e toki ma‘u lelei ‘e he fonua hono ngaahi Sāpate, lolotonga ‘oku tuku li‘aki ia ‘o mou nofo ‘i he fonua ‘o homou ngaahi fili; ‘io, ‘e toki mālōlō ‘a e fonua, ‘o ma‘u lelei hono ngaahi Sāpate.

³⁵Lolotonga ‘oku tuku li‘aki te ne ma‘u ha mālōlō, ‘a e mālōlō na‘e ‘ikai te ne ma‘u ‘i homou ngaahi Sāpate, ‘i he taimi na‘a mou nofo ai.

³⁶Pea ko e me‘a ki homou toe, te u tuku atu ha toutou ki honau loto ‘i he fonua ‘o honau ngaahi fili; pea ko e kohi ‘o ha fo‘i lau ‘oku vilingia te nau hahaka ai ‘o ‘ohovale; pea te nau hola ‘o hangē ko e hola mei he heletā: pea te nau tō neongo ‘oku ‘ikai ha tuli.

³⁷Pea te nau fehumuhumuki ‘iate kinautolu ‘o hangē ha tō ‘i he heletā; ‘osi, ‘oku ‘ikai ha tuli; pea ‘e ‘ikai hamou mālohi Ke tu‘u ki homou ngaahi fili.

³⁸Pea te mou ‘auha ‘i he ngaahi pule‘anga ko ia; ‘io, ‘e keina kimoutolu ‘e he fonua ‘o homou ngaahi fili.

³⁹Pea ko e toenga ‘omoutolu te nau faka‘au ki mui ‘i he ngaahi fonua ‘o homou ngaahi fili ‘i he kovi kuo nau fai; ‘io, ko e kovi ‘a ‘enau ngaahi kui foki, ‘a ia ‘oku ō mo kinautolu, te nau faka‘au hifo ai.

⁴⁰Pea te nau toki fakamo‘oni ‘enau ngaahi kovi mo e kovi ‘a ‘enau ngaahi kui, ‘i he hia na‘a nau hia ai kiate au, kae‘uma‘ā foki ‘a e tupu ‘i he‘enau fakafepaki kiate au ‘a ‘eku fakafepaki kiate kinautolu, mo ‘ave kinautolu ki he fonua ‘o honau ngaahi fili.

⁴¹Pea kapau leva ‘e vaivai honau loto ta‘ekamu, ‘o nau tali lelei honau tautea;

⁴²te u toki manatu ai ki he‘eku fuakava mo Sēkope, kae‘uma‘ā ‘a ‘eku fuakava mo ‘Aisake: ko ‘eku fuakava foki mo ‘Epalahame te u manatu ki ai; ka te u manatu foki ki he fonua.

⁴³Pea ‘e tau‘atāina ‘a e fonua meiate kinautolu, pea te ne ma‘u lelei hono ngaahi Sāpate, lolotonga ‘oku tuku li‘aki, ‘o ‘ikai te nau ‘i ai; pea ko kinautolu foki te nau tali lelei honau tautea; koe‘uhiā, ‘io, koe‘uhiā na‘a nau fakatale‘i ‘eku konisitūtone, pea fehi‘a ‘e honau loto ki he‘eku ngaahi fekau.

⁴⁴Ka neongo ia kotoa, ka nau ka ‘i he fonua ‘o honau ngaahi fili, ‘e ‘ikai te u fakatale‘i kinautolu, pea ‘e ‘ikai te u fehi‘a kiate kinautolu ke faka‘osi kinautolu mo maumau ‘eku kovinānite mo kinautolu: he ko Sihova au ko honau ‘Otua:

⁴⁵ka te u manatu ma‘anautolu ki he fuakava ‘o honau tupu‘anga, ‘a ia na‘a ku fakahū kitu‘a mei ‘Isipite, kae sio ‘a e ngaahi kakai; koe‘uhi ke u hoko ko honau ‘Otua: ko Sihova au.

⁴⁶Ko e ngaahi fekau ia mo e konisitūtone mo e ngaahi lao, ‘a ia na‘e tuku ‘e Sihova ‘i hona vaha‘a mo ‘Isileli, ‘o fakafai ‘ia Mōsese ‘i he mo‘unga ko Sainai.