Read KO E TOH TAPU KATOA TONGA LEVITIKO 3 Bible Online

LEVITIKO 3 - KO E TOH TAPU KATOA TONGA bible

LEVITIKO 3

¹PEA kapau ko e feilaulau-‘ofa ‘a ‘ene kōpano, ko e ‘omi mei he fanga pulu, pe ko ha manu tangata pe fefine, ‘e ta‘ehano mele, pea te ne ‘atu ia ‘i he ‘ao ‘o Sihova.

²Pea te ne hilifaki hono nima ki he ‘ulu ‘o ‘ene kōpano, pea te ne tāmate‘i ia ‘i he mata Tēniti Fe‘iloaki‘anga; pea ko e ngaahi foha ‘o ‘Ēlone, ‘a ia ‘oku taula‘eiki, te nau luluku ‘aki ‘a e toto ‘a e ‘ōlita takatakai.

³Pea te nau ‘omi mei he feilaulau-‘ofa ha me‘a ke tutu ma‘a Sihova; ‘a e tākai ‘oku ‘ufi‘ufi ‘aki ‘a e to‘oto‘onga, pea mo e loukape kotoa, pea mo e ongo kofuua, mo e ngako ‘oku ‘i ai, ‘a ia ‘oku ‘i he kongaloto.

⁴Pea mo e milimili ‘oku ‘i he funga ‘ate, fakataha mo e ongo kofuua; te ne hae mai ‘a e ngaahi me‘a ko ia.

⁵Pea ‘e tutu ia ‘e he ngaahi foha ‘o ‘Ēlone ‘i he ‘ōlita, ‘i he funga ‘o e feilaulau-mōifua ‘a ia kuo hilifaki ki he fefie ‘i he afi: ko e feilaulau fai‘aki ‘a e afi ia, ko e ngangatu fakahōifua kia Sihova.

⁶Pea kapau ‘oku mei he fanga manu iiki ‘ene kōpano, ko ‘ene feia ha feilaulau-‘ofa kia Sihova, te ne ‘atu ha manu tangata pe fefine kae ta‘ehano mele.

⁷Kapau ko ‘ene ‘atu ha lami ma‘ane kōpano, te ne ‘omi pē ki he ‘ao ‘o Sihova;

⁸pea te ne hilifaki hono nima ki he ‘ulu ‘o ‘ene kōpano, pea te ne tāmate‘i ‘i he matapā ‘o e Tēniti Fe‘iloaki‘anga; pea ko e ngaahi foha ‘o ‘Ēlone te nau luluku ‘aki ‘a e toto ‘a e ‘ōlita takatakai.

⁹Pea te ne ‘omi mei he feilaulau-‘ofa ha me‘a ke tutu kia Sihova; ‘a hono ngako, mo hono kotoa ‘o e tu‘ulāvelo: te ne tu‘usi ia ofi ki he hui tu‘ungaiku; pea mo e tākai ‘oku ‘ufi‘ufi ‘aki ‘a e to‘oto‘onga, pea mo e loukape kotoa, pea mo e ongo kofuua, mo e ngako ‘oku ‘i ai, ‘a ia ‘oku ‘i he kongaloto.

¹⁰Pea mo e milimili ‘oku ‘i he funga ‘ate, fakataha mo e ongo kofuua; te ne hae mai ‘a e ngaahi me‘a ko ia.

¹¹Pea ‘e tutu ia ‘e he taula‘eiki ‘i he ‘ōlita ko e me‘akai fai‘aki ‘a e afi ma‘a Sihova.

¹²Pea kapau ko ‘ene kōpano ko e kosi, te ne ‘omi ki he ‘ao ‘o Sihova,

¹³pea te ne hilifaki hono nima ki hono ‘ulu, pea te ne tāmate‘i ia ‘i he mata Tēniti Fe‘iloaki‘anga; pea ko e ngaahi foha ‘o ‘Ēlone te nau luluku ‘aki ‘a e toto ‘a e ‘ōlita takatakai.

¹⁴Pea te ne ‘omi mei ai ‘ene kōpano ke fai‘aki ‘a e afi kia Sihova; ‘a e tākai ‘oku ‘ufi‘ufi ‘aki ‘a e to‘oto‘onga, pea mo e loukape kotoa, mo e ongo kofuua, mo e ngako ‘oku ‘i ai, ‘a ia ‘oku ‘i he kongaloto,

¹⁵pea mo e milimili ‘oku ‘i he funga ‘ate, fakataha mo e ongo kofuua; te ne hae mai ‘a e ngaahi me‘a ko ia.

¹⁶Pea ‘e tutu ia ‘e he taula‘eiki ‘i he ‘ōlita, ko e me‘akai fai‘aki ‘a e afi mo‘o ngangatu fakahōifua: ko e ngako kotoa ko e ‘inasi ‘o e ‘Eiki. Ko e tu‘utu‘uni ia ki homou ngaahi to‘utangata ‘o lauikuonga, ‘i homou ngaahi tangutu‘anga kotoa pē, ‘a e ‘ikai te mou kai ‘a e ngako pe ko e toto.