Read KO E TOH TAPU KATOA TONGA LEVITIKO 4 Bible Online

LEVITIKO 4 - KO E TOH TAPU KATOA TONGA bible

LEVITIKO 4

¹PEA folofola ‘a Sihova kia Mōsese, ‘o pehē, Tala ki ha‘a ‘Isileli, ‘o pehē,

²Kapau ‘e hia ta‘e‘ilo ‘e ha taha, ‘i he ngaahi me‘a na‘e tu‘utu‘uni ‘e Sihova ke ‘oua ‘e fai, ka kuo ne hanga ‘o fai ha me‘a.

³Kapau ko e taula‘eiki kuo pani ‘a ia kuo ne hia, pea kuo halaia ai ‘a e kakai, ke ne ‘omi kia Sihova ki he angahala kuo ne fai, ha pulu mui ‘oku ta‘ehano mele, ma‘ane feilaulau-angahala.

⁴Pea te ne ‘omi ‘a e pulu ki he matapā ‘o e Tēniti Fe‘iloaki‘anga, ki he ‘ao ‘o Sihova; pea te ne hilifaki hono nima ki he ‘ulu ‘o e pulu, pea te ne tāmate‘i ia ‘i he ‘ao ‘o Sihova.

⁵Pea ko e taula‘eiki pani te ne to‘o ha me‘a mei he toto ‘o e pulu, pea te ne hū mo ia ki he Tēniti Fe‘iloaki‘anga;

⁶pea ‘e unu ‘e he taula‘eiki hono tuhu ki he toto, pea te ne afuhi ‘a e toto tu‘o fitu ki he ‘ao ‘o Sihova, ‘i he ‘ao ‘o e Tatau ‘o e Potu Tapu.

⁷Pea ‘e ‘ai ‘e he taula‘eiki ha me‘i toto ki he ngaahi nifo ‘o e ‘ōlita ‘oku tutu ai ‘a e ‘inisēnisi ngangatu ‘i he ‘ao ‘o Sihova, ‘a ia ‘oku ‘i he Tēniti Fe‘iloaki‘anga; ka ko e toto kotoa ‘o e pulu te ne lilingi ‘i he tefito‘i ‘ōlita tutu‘anga feilaulau, ‘a ia ‘oku ‘i he mata Tēniti Fe‘iloaki‘anga.

⁸Pea ko hono kotoa ‘o e ngako ‘o e pulu feilaulau-angahala te ne to‘o mei ai; ‘a e tākai ‘oku ‘ufi‘ufi ‘aki ‘a e to‘oto‘onga, pea mo e loukape kotoa, pea mo e ongo kofuua, mo e ngako ‘oku ‘i ai, ‘a ia ‘oku ‘i he kongaloto,

⁹pea mo e milimili ‘oku ‘i he funga ‘ate, fakataha mo e ongo kofuua; te ne hae mai ‘a e ngaahi me‘a ko ia,

¹⁰‘o hangē ko e to‘o mei he pulu feilaulau-‘ofa: pea ‘e tutu ia ‘e he taula‘eiki ‘i he ‘ōlita tutu‘anga-feilaulau.

¹¹Ka ko e kili ‘o e pulu, mo hono kakano kotoa, fakataha mo hono ‘ulu, mo hono ngaahi alanga, mo hono to‘oto‘onga, mo hono kinoha‘a,

¹²‘io ko e pulu kotoa te ne ‘ave kitu‘a ‘apitanga, ki he potu ma‘a ‘oku lilingi ai ‘a e efuefu, pea te ne faka‘auha ia ‘aki ‘a e afi ‘i ha fefie: ‘io, ‘i he potu ‘oku tuku ai ‘a e efuefu ‘e faka‘auha afi ai ia.

¹³Pea ka kuo hia ta‘e‘ilo ‘a e fakataha kotoa ‘o ‘Isileli, pea puli ‘a e me‘a mei he ha‘oha‘onga ‘o e Fakataha, ka kuo nau fai ha taha ‘o e ngaahi me‘a na‘e tu‘utu‘uni ‘e Sihova ke ‘oua na‘a fai, pea kuo nau halaia;

¹⁴pea ka ‘iloa ‘a e angahala kuo nau fai, pea ‘e toki ‘omi ‘e he Fakataha ha pulu mui ma‘anau feilaulau-angahala, pea te nau taki mai ki he mata Tēniti Fe‘iloaki‘anga.

¹⁵Pea ko e mātu‘a ‘o e Fakataha te nau hilifaki honau nima ki he ‘ulu ‘o e pulu ‘i he ‘ao ‘o Sihova, pea te nau tāmate‘i ‘a e pulu ‘i he ‘ao ‘o Sihova.

¹⁶Pea ko e taula‘eiki pani te ne hū mo ia ha me‘a mei he toto ‘o e pulu ki he Tēniti Fe‘iloaki‘anga:

¹⁷pea ‘e unu ‘e he taula‘eiki hono tuhu ki hano toto, pea te ne afuhi ia tātu‘ofitu ki he ‘ao ‘o Sihova ‘i he ‘ao ‘o e Tatau.

¹⁸Pea te ne ‘ai ha me‘i toto ki he nifo ‘o e ‘ōlita ‘oku ‘i he ‘ao ‘o Sihova, ‘a ia ‘oku ‘i he Tēniti Fe‘iloaki‘anga, ka ko e toto kotoa te ne lilingi ‘i he tefito‘i ‘ōlita tutu‘anga-feilaulau, ‘a ia ‘oku ‘i he mata Tēniti Fe‘iloaki‘anga.

¹⁹Pea te ne to‘o mei ai hono kotoa ‘o e ngako, pea te ne tutu ‘i he ‘ōlita.

²⁰Pea ko e me‘a te ne fai ki he pulu; hangē ko ia na‘a ne fai ki he pulu feilaulau-angahala ko ē, ‘e pehē ‘ene fai ki heni: pea ‘e fai fakalelei ma‘anautolu ‘e he taula‘eiki, pea ‘e fakamolemole kinautolu.

²¹Pea te ne ‘ave ‘a e pulu ki tu‘a ‘apitanga, pea te ne faka‘auha ia ‘aki ‘a e afi, ‘o hangē ko ‘ene tutu ‘a e pulu ‘e taha ko ē: ko e feilaulau angahala ia ‘o e Fakataha.

²²Ko ha ‘eiki foki, kapau te ne hia he‘ene fai ha taha ‘o e ngaahi me‘a ‘a ia na‘e tu‘utu‘uni ‘e Sihova ko hono ‘Otua ke ‘oua na‘a fai, ka ko e fai ta‘e‘ilo, pea kuo ne halaia;

²³ka faka‘ilo kiate ia ‘a e me‘a kuo ne fai angahala ai, te ne toki ha‘u mo ia ‘ene kōpano ko e kosi, ko e manu tangata ta‘ehano mele.

²⁴Pea te ne hilifaki hono nima ki he ‘ulu ‘o e kosi, pea te ne tāmate‘i ia ‘i he potu ‘oku tāmate‘i ai ‘a e feilaulau-mōifua ‘i he ‘ao ‘o Sihova: ko e feilaulau-angahala ia.

²⁵Pea ‘e to‘o ‘e he taula‘eiki ha me‘a mei he toto ‘o e feilaulau-angahala ‘aki hono tuhu, pea te ne ‘ai ki he ngaahi nifo ‘o e ‘ōlita tutu‘anga-feilaulau; ka te ne lilingi ‘a e toto ‘i he tefito‘i ‘ōlita tutu‘anga-feilaulau.

²⁶Pea ko hono kotoa ‘o e ngako te ne tutu ‘i he ‘ōlita, hangē ko e ngako ‘o e feilaulau-‘ofa; pea ‘e fai ‘e he taula‘eiki ‘a e fakalelei ma‘ana koe‘uhi ko ‘ene angahala, pea ‘e fakamolemole ia.

²⁷Pea kapau ‘e hia ta‘e‘ilo ‘e ha taha ‘o e kakai tu‘a, he‘ene fai ha taha ‘o e ngaahi me‘a na‘e tu‘utu‘uni ‘e Sihova ke ‘oua na‘a fai, pea kuo ne halaia;

²⁸ka faka‘ilo kiate ia ‘a e angahala kuo ne fai, te ne toki ha‘u mo ia ‘ene kōpano, ko ha kosi fefine ta‘ehano mele, ma‘a e angahala kuo ne fai.

²⁹Pea te ne hilifaki hono nima ki he ‘ulu ‘o e feilaulau-angahala, pea te ne tāmate‘i ia ‘i he potu ‘o e feilaulau-mōifua.

³⁰Pea ‘e to‘o ‘e he taula‘eiki ha me‘i toto mei ai ‘aki hono tuhu, pea te ne ‘ai ki he ngaahi nifo ‘o e ‘ōlita tutu‘anga-feilaulau, ka ko e toto kotoa te ne lilingi ‘i he tefito‘i ‘ōlita.

³¹Pea te ne hae mai hono ngako kotoa, ‘o hangē ko ‘ene hae ‘a e ngako ‘o e feilaulau-‘ofa, pea ‘e tutu ia ‘e he taula‘eiki ‘i he ‘ōlita mo‘o ngangatu fakahōifua kia Sihova; pea ‘e fakalelei ‘e he taula‘eiki ma‘ana, pea ‘e fakamolemole ia.

³²Pea kapau ko e lami te ne ha‘u mo ia ma‘ane kōpano koe‘uhi ko ‘ene angahala, te ne ‘omi ha manu fefine ta‘ehano mele.

³³Pea te ne hilifaki hono nima ki he ‘ulu ‘o e feilaulau-angahala, pea te ne tāmate‘i ia ma‘ane feilaulau-angahala ‘i he potu ‘oku tāmate‘i ai ‘a e feilaulau-mōifua.

³⁴Pea ‘e to‘o ‘e he taula‘eiki ha me‘a mei he toto ‘o e feilaulau, angahala ‘aki hono tuhu, pea te ne ‘ai ki he nifo ‘o e ‘ōlita tutu‘anga-feilaulau, ka ko e toto kotoa te ne lilingi ‘i he tefito‘i ‘ōlita:

³⁵pea te ne hae mai hono ngako kotoa, ‘o hangē ko ‘ene hae ‘a e ngako ‘o e lami feilaulau-‘ofa; pea ‘e tutu ia ‘e he taula‘eiki ‘i he ‘ōlita, fakataha mo e ngaahi feilaulau ‘a Sihova fai‘aki ‘a e afi: pea ‘e fai ‘e he taula‘eiki ‘a e fakalelei ma‘ana ‘i he angahala kuo ne fai, pea ‘e fakamolemole ia.