Read KO E TOH TAPU KATOA TONGA LEVITIKO 5 Bible Online

LEVITIKO 5 - KO E TOH TAPU KATOA TONGA bible

LEVITIKO 5

¹KA ai ha taha kuo ne hia he‘ene fanongo ki he fakafuakava, ka ko e fakamo‘oni ia (pe kuo ne sio ki ai, pe kuo ne ‘ilo‘i); kapau ‘e ‘ikai te ne tala, te ne fua hono kovi.

²Pea ka ko e tokotaha kuo ne lave ki ha taha ‘o e me‘a ‘oku tapu, ‘a e ‘anga‘anga nai ‘o ha manu kaivao ‘oku ta‘ema‘a, pe ko e ‘anga‘anga ‘o ha manu lalata ‘oku ta‘ema‘a, pe ko e ‘anga‘anga ‘o ha me‘a totolo ‘oku ta‘ema‘a, pea ‘oku puli ‘iate ia, pea ‘oku ne ta‘ema‘a ai; ka te ne halaia pē.

³Pea na‘a kuo ne lave ki ha ta‘ema‘a‘anga ‘o ha kakai, ha taha ‘o e ngaahi me‘a ‘oku nau ta‘ema‘a ai, ka ‘oku puli meiate ia; pea ka ‘ilo ‘e ia ki ai te ne halaia.

⁴Pea ka kuo ‘ohonoa ‘a e ngutu ‘o ha taha, ‘o fuakava ke fai ha lelei pe ha kovi, pe ko e hā fua ha me‘a kuo ne fuakava ‘ohonoa ai, ka kuo puli meiate ia; pea ka faifai ‘o ne ‘ilo ki ai, pea te ne toki halaia ‘i he taha ‘o e ngaahi me‘a ko ē.

⁵Pea ka faifai ‘o ne halaia ‘i he ngaahi me‘a ko ē, te ne toki vete ‘a e angahala ‘oku ‘iate ia:

⁶pea te ne ha‘u mo ia ‘ene feilaulau-halaia kia Sihova koe‘uhi ko ‘ene angahala kuo ne fai, ko ha manu fefine mei he fanga manu iiki, ha lami pe ha kosi, ma‘ane feilaulau-angahala; pea ‘e fakalelei ma‘ana ‘e he taula‘eiki koe‘uhi ko ‘ene angahala.

⁷Pea kapau ‘e ‘ikai fe‘unga ‘ene koloa ke ma‘u ha sipi, ka te ne ha‘u mo ia ki he ‘Eiki ‘ene feilaulau-halaia ‘i he angahala kuo ne fai, ko ha ongo kulukulu pe lupe mui; ko e taha ko e feilaulau-angahala, pea ko e taha ko e feilaulau-mōifua.

⁸Pea te ne ha‘u mo ia ki he taula‘eiki, ‘a ia te ne fuofua ‘atu ‘a e taha ki he feilaulau-angahala, pea te ne la‘usi hono ‘ulu ‘i he monga, kae ‘ikai te ne haeua:

⁹pea te ne afuhi ha me‘a mei he toto ‘o e feilaulau-angahala ki he holisi ‘o e ‘ōlita, pea ko hono toe ‘o e toto ‘e tatau ki he tefito‘i ‘ōlita: ko ha feilaulau-angahala ia.

¹⁰Pea te ne ngaohi hono ua ko e feilaulau-mōifua, ‘o hangē ko e tu‘utu‘uni; pea ‘e fakalelei ma‘ana ‘e he taula‘eiki koe‘uhi ko e angahala kuo ne fai, pea ‘e fakamolemole ia.

¹¹Pea kapau ‘e ‘ikai te ne lava ha ongo kulukulu pe lupe mui, ke ne ha‘u mo ia ‘ene kōpano koe‘uhi ko e angahala kuo ne fai, ko e vahe hongofulu ‘o e efa mahoa‘a lelei: ko ene feilaulau-angahala ia; ‘e ‘ikai te ne ‘ai ha lolo ki ai, pea ‘e ‘ikai te ne hili ki ai ha laipeno, he ko e feilaulau-angahala ia.

¹²Pea te ne ‘omi ia ki he taula‘eiki, pea ‘e tata mei ai ‘e he taula‘eiki ha falukunga mōno me‘a fakamanatu; pea te ne tutu ‘i he ‘ōlita, ‘i he anga ‘o e ngaahi feilaulau ‘a Sihova fai‘aki ‘a e afi: ko e feilaulau-angahala ia.

¹³Pea ‘e fakalelei ma‘ana ‘e he taula‘eiki koe‘uhi ko e angahala kuo ne fai, ha taha ‘o e ngaahi me‘a ko ē; pea ‘e fakamolemole ia: pea ko e ‘inasi ia ‘o e taula‘eiki, ‘o hangē ko e feilaulau-me‘akai.

¹⁴Pea folofola ‘a Sihova kia Mōsese, ‘o pehē,

¹⁵Ka fai kākā ‘e ha taha, ‘o ne hia ta‘e‘ilo he‘ene tosi ha me‘a ‘i he ngaahi tapu ‘a e ‘Eiki; te ne ha‘u mo ia ‘ene feilaulau-halaia kia Sihova mei he fanga manu iiki, ko ha sipi tangata ta‘ehano mele, ko hono mahu‘inga ko e ngaahi sikeli siliva, ha me‘a pē te ke tu‘utu‘uni; (‘e fai ki he sikeli ‘o e Fale Tapu) he ko ‘ene feilaulau-halaia ia.

¹⁶Pea te ne totongi ‘a e me‘a tapu kuo ne ‘ave ta‘etotonu, pea te ne fakalahi ‘aki hono vahe nima, pea te ne ‘atu ia ki he taula‘eiki, pea ‘e fakalelei ma‘ana ‘e he taula‘eiki ‘aki ‘a e sipi tangata feilaulau-angahala, pea ‘e fakamolemole ia.

¹⁷Pea ka fai angahala ‘e ha taha, ‘o ne fai ha taha ‘o e ngaahi me‘a kuo tu‘utu‘uni ‘e he ‘Eiki ke ‘oua na‘a fai; neongo ‘oku ‘ikai te ne ‘ilo ki ai, ka te ne halaia pē, pea te ne fua hono kovi.

¹⁸Pea te ne ha‘u mo ia ki he taula‘eiki ha manu mei he fa‘ahinga iiki ma‘ane feilaulau-halaia, ko e sipi tangata ta‘ehano mele, ‘o fakatatau ki he mahu‘inga te ke tu‘utu‘uni: pea ‘e fakalelei ma‘ana ‘e he taula‘eiki koe‘uhi ko e me‘a na‘a ne matavalea ai, ‘o fai ta‘e‘ilo; pea ‘e fakamolemole ia.

¹⁹Ko e feilaulau-halaia ia, kuo ne halaia mo‘oni ki he ‘Eiki.