Read KO E TOH TAPU KATOA TONGA LEVITIKO 6 Bible Online

LEVITIKO 6 - KO E TOH TAPU KATOA TONGA bible

LEVITIKO 6

¹PEA folofola ‘a Sihova kia Mōsese, ‘o pehē,

²Ka ai ha taha ‘e fai angahala, ‘o fai kākā kia Sihova he‘ene loi ki hono kaungāme‘a ‘i ha me‘a na‘e tuku tauhi, pe ko ha me‘a talifaki, pe ha me‘a kaiha‘a, pe ko ha me‘a kuo ne fakakikihi ai mo hono kaungāme‘a;

³pe kuo ne ma‘u ha me‘a na‘e mole, ‘o ne loi ai, ‘o ne fuakava ki he‘ene loi; ha taha ‘o e ngaahi me‘a pehē ‘oku fai ‘e he kakai, ‘o nau hia ai.

⁴Pea ka faifai pea hā kuo ne angahala, pea ‘oku ne halaia, te ne fakafoki ‘a e me‘a kuo ne ‘ave, pe ko e me‘a kuo ne fakakikihi ai, pe ko e me‘a na‘e tuku tauhi kiate ia, pe ko e me‘a na‘e mole ka kuo ne ‘ilo ki ai,

⁵pe ko e hā fua ‘a e me‘a kuo ne fuakava loi ai; ‘io, te ne fakafoki hono kotoa, pea te ne fakalahi ‘aki hono vahe nima: te ne ‘atu kiate ia ‘oku ‘a‘ana, ‘i he ‘aho ‘o ‘ene halaia.

⁶Pea ko e feilaulau halaia te ne ha‘u mo ia kia Sihova ko e manu mei he fa‘ahinga iiki, ko e sipi tangata ta‘ehano mele, te ne fai ki he mahu‘inga te ke tu‘utu‘uni, ‘o ‘atu ki he taula‘eiki ma‘ane feilaulau-halaia:

⁷pea ‘e fakalelei ‘e he taula‘eiki ‘i he ‘ao ‘o Sihova ma‘ana, pea ‘e fakamolemole ia, pe ko e hā fua ‘ene me‘a kuo ne fai ‘o halaia ai.

⁸Pea folofola ‘a e ‘Eiki kia Mōsese, ‘o pehē,

⁹Te ke tu‘utu‘uni kia ‘Ēlone mo hono ngaahi foha, ‘o pehē, Ko ‘eni ‘a e lao ‘o e feilaulau-mōifua: ‘e tuku ia, ‘a e feilaulau-mōifua, ‘i he funga fefie ‘i he ‘ōlita ‘i he pō kotoa, ‘o a‘u ki he ‘apongipongi; pea ‘e tafutafu ‘a e afi ‘o e ‘ōlita ‘i ai.

¹⁰Pea ‘e tui ‘e he taula‘eiki hono kofu tupenu, pea te ne ‘ai hono talausese tupenu ki hono kakano; pea te ne tata ‘a e efuefu ‘i he ‘ōlita, ‘a ia kuo hoko ki ai ‘a e feilaulau-mōifua ‘i he ngāue ‘a e afi, pea te ne tuku ‘i he tafa‘aki ‘ōlita.

¹¹Pea te ne hu‘ihu‘i hono kofu, ‘o ne ‘ai ha ngaahi kofu kehe, pea te ne ‘ave ‘a e efuefu ki he tu‘a ‘apitanga ki ha potu ‘oku ma‘a.

¹²Ka ‘e tafutafu pē ‘a e afi ‘i he ‘ōlita; ‘e ‘ikai mate: pea ‘e tafu fefie ai ‘e he taula‘eiki ‘i he pongipongi kotoa pē: pea te ne fakamā‘opo‘opo lelei ‘i ai ‘a e feilaulau-mōifua, pea te ne tutu ai ‘a e ngako ‘o e ngaahi feilaulau-‘ofa.

¹³‘E tafutafu ma‘u pē ‘a e afi ‘i he ‘ōlita; ‘e ‘ikai mate.

¹⁴Pea ko eni ‘a e lao ‘o e feilaulau-me‘akai: ‘e ‘atu ia ‘e he ngaahi foha ‘o ‘Ēlone ki he ‘ao ‘o Sihova ‘i he ‘ao ‘o e ‘ōlita.

¹⁵Pea te ne to‘o hake mei ai ha falukunga mei he mahoa‘a ‘o e feilaulau-me‘akai, pea mei hono lolo, pea mo hono kotoa ‘o e laipeno kuo hili ki he feilaulau-me‘akai, pea te ne tutu ia ‘i he ‘ōlita mo‘o ngangatu fakahōifua, ko hono me‘a fakamanatu kia Sihova.

¹⁶Pea ko hono toe ‘e kai ‘e ‘Ēlone mo hono ngaahi foha: ‘e kai ta‘elēvani pē ‘i ha potu ‘oku tapu: te nau kai ia ‘i he loto‘ā ‘o e Tēniti Fe‘iloaki‘anga.

¹⁷‘E ‘ikai ta‘o ia mo ha lēvani: kuo u tuku ia ko honau ‘inasi ‘i he ngaahi feilaulau ‘a‘aku ‘oku fai‘aki ‘a e afi; ko ha me‘a toputapu ia, hangē ko e feilaulau-angahala mo e feilaulau halaia.

¹⁸‘Ilonga ha tangata ‘i he fānau ‘a ‘Ēlone te ne kai ai; ko e ‘inasi ia ‘o ta‘engata ‘i homou ngaahi to‘utangata mei he ngaahi feilaulau ‘a Sihova ‘oku fai‘aki ‘a e afi: ‘ilonga ha taha ‘e lave ki ai te ne tapu leva.

¹⁹Pea folofola ‘a e ‘Eiki kia Mōsese, ‘o pehē,

²⁰Ko eni ‘a e kōpano ‘a ‘Ēlone mo hono ngaahi foha, ‘a ia te nau ‘atu kia Sihova ‘i he ‘aho ‘oku pani ai ia, ko e vahe hongofulu ‘o e efa mahoa‘a lelei: ko e feilaulau tu‘u ma‘u ia, ‘e fai hono vaeua pongipongi mo hono vaeua efiafi.

²¹‘E ngaohi ‘i he fakapaku ‘aki ‘a e lolo; ka fefiofi lelei, te ke ‘omi ia; te ke ‘atu ia ko e feilaulau-me‘akai-fakapaku-momoiki, ko e ngangatu fakahōifua kia Sihova.

²²Pea ko e taula‘eiki pani te ne ‘atu ia, (ha taha ‘o ‘ene fānau te ne fetongi ia) ko e tu‘utu‘uni ta‘engata ‘a hono tutu ‘o ‘osi ma‘a Sihova.

²³‘Io, ‘ilonga ha feilaulau-me‘akai ‘a e taula‘eiki, ‘e tutu ‘o ‘osi ia; ‘e ‘ikai kai.

²⁴Pea folofola ‘a e ‘Eiki kia Mōsese, ‘o pehē,

²⁵Tala kia ‘Ēlone mo hono ngaahi foha, ‘o pehē, Ko e lao eni ‘o e feilaulau-angahala; ko e potu ‘oku tāmate‘i ai ‘a e feilaulau-mōifua ‘e tāmate‘i ai ‘a e feilaulau-angahala ‘i he ‘ao ‘o Sihova: ko e me‘a toputapu ia.

²⁶Ko e taula‘eiki ‘oku ne feia ‘a e feilaulau-angahala te ne kai ia: ‘e kai ia ‘i ha potu ‘oku tapu ‘i he loto‘ā ‘o e Tēniti Fe‘iloaki‘anga.

²⁷‘Ilonga ha taha ‘e lave ki hono kakano te ne tapu leva: pea ka afuhi hono toto ki ha kofu, te ke fō ‘a e me‘a kuo afuhi ‘i ha potu ‘oku tapu.

²⁸Pea ko e ipu ‘umea ‘oku haka ai, ‘e laiki; pea kapau na‘e haka ‘i ha ipu kapa, ‘e olo mo lōmaki‘i ‘i ha vai.

²⁹‘Ilonga ha tangata ‘i he ha‘a taula‘eiki, te ne kai mei ai: ko e me‘a toputapu ia.

³⁰Ka ‘ilonga ha feilaulau angahala, ‘a ia ‘oku ‘omi hono toto ki he Tēniti Fe‘iloaki‘anga, ke fai fakalelei ‘aki ‘i he Potu Tapu, ‘e ‘ikai kai ia: ‘e faka‘auha ‘aki ‘a e afi.