Read KO E TOH TAPU KATOA TONGA LEVITIKO 8 Bible Online

LEVITIKO 8 - KO E TOH TAPU KATOA TONGA bible

LEVITIKO 8

¹PEA folofola ‘a Sihova kia Mōsese, ‘o pehē,

²Te ke ‘omi ‘a ‘Ēlone fakataha mo hono ngaahi foha, pea mo e ngaahi kofu, mo e lolo pani, pea mo e pulu feilaulau-angahala, mo e ongo sipi tangata, pea mo e kato mā ta‘elēvani;

³pea te ke fakakātoa mai ‘a e Fakataha ki he mata Tēniti Fe‘iloaki‘anga.

⁴Pea fai ‘e Mōsese ‘o hangē ko e fekau ‘a Sihova kiate ia; pea na‘e fakakātoa mai ‘a e Fakataha ki he mata Tēniti Fe‘iloaki‘anga.

⁵Pea lea ‘a Mōsese ki he Fakataha, ‘o pehē, ko eni ‘a e ngāue na‘e fekau ‘e Sihova ke fai.

⁶Pea na‘e fakaofi mai ‘e Mōsese ‘a ‘Ēlone mo hono ngaahi foha, pea ne kaukau kinautolu ‘aki ha vai.

⁷Pea ne ‘ai kiate ia ‘a e sote, pea ne no‘o ia ‘aki ‘a e no‘o, pea ne kofu ‘aki ‘a e kofu-tōtōlofa, pea ne ‘ai kiate ia ‘a e ‘ēfoti,[2] ‘o ne nono‘o ‘aki ‘a e No‘o-pulepule ‘o e ‘ēfoti, ‘o fakama‘u ‘aki kiate ia.

⁸Pea ne ‘ai kiate ia ‘a e sifa: pea ne tuku ‘i he sifa ‘a e ‘Ūlimi mo e Tūmemi.[3]

⁹Pea ne ‘ai ‘a e tatā ki hono ‘ulu; pea ne ‘ai ki he tatā, ki hono potu ki mu‘a, ‘a e lau‘i koula, ko e kalauni tapu; ‘o hangē ko e tu‘utu‘uni ‘a Sihova kia Mōsese.

¹⁰Pea to‘o ‘e Mōsese ‘a e lolo fakatapu, ‘o ne pani ‘aki ‘a e Tāpanekale, mo e me‘a kotoa na‘e ‘i ai, ‘o ne fakatāpui ia.

¹¹Pea ne to‘o hano me‘a, ‘o afuhi ‘aki ‘a e ‘ōlita tutu‘anga-feilaulau, ‘o tātu‘ofitu, pea ne pani ‘aki ‘a e ‘ōlita mo hono nāunau kotoa, pea mo e pālutu‘anga mo hono tu‘unga, mo fakatāpui ia.

¹²Pea ne lilingi ha lolo pani ki he ‘ulu ‘o ‘Ēlone, ‘o ne pani ia mōno fakatāpui.

¹³Pea fakaofi mai ‘e Mōsese ‘a e ngaahi foha ‘o ‘Ēlone, ‘o ne tui honau sote, mo ne no‘o kinautolu ‘aki ha ngaahi no‘o, pea ne ‘ai hanau fa‘u; ‘o hangē ko e tu‘utu‘uni ‘a e ‘Eiki kia Mōsese.

¹⁴Pea ne ‘unuaki mai ‘a e pulu feilaulau-angahala; pea hilifaki ‘e ‘Ēlone mo hono ngaahi foha honau nima ki he ‘ulu ‘o e pulu feilaulau-angahala.

¹⁵Pea ne tāmate‘i ia; pea to‘o ‘e Mōsese ‘a e toto, ‘o ne ‘ai takatakai ki he ngaahi nifo ‘o e ‘ōlita tutu‘anga-feilaulau ‘aki hono tuhu, ‘o ne fakama‘a ‘a e ‘ōlita, pea ne lilingi ‘a e toto ki he tefito‘i ‘ōlita, ‘io, na‘a ne fakatāpui ia he‘ene fai ha feilaulau ma‘ana.

¹⁶Pea ne to‘o ‘a e tākai kotoa ‘oku ‘ufi‘ufi ‘aki ‘a e to‘oto‘onga, pea mo e milimili ‘o e ‘ate, pea mo e ongo kofuua, mo e ngako ‘oku ‘i ai, pea na‘e tutu ia ‘e Mōsese ‘i he ‘ōlita.

¹⁷Ka ko e pulu, ‘a hono kili, mo hono kakano, mo hono kinoha‘a, na‘a ne faka‘auha ‘aki ‘a e afi ‘i he tu‘a ‘apitanga; ‘o hangē ko e tu‘utu‘uni ‘a Sihova kia Mōsese.

¹⁸Pea ne ‘omi ‘a e sipi tangata ki he feilaulau-mōifua: pea na‘e hilifaki ‘e ‘Ēlone mo hono ngaahi foha honau nima ki he ‘ulu ‘o e sipi tangata.

¹⁹Pea ne tāmate‘i ia: pea na‘e luluku ‘aki ‘e Mōsese ‘a e toto ‘a e ‘ōlita takatakai.

²⁰Pea ne tafa ‘a e sipi; pea na‘e tutu ‘e Mōsese ‘a e ‘ulu mo e ngaahi konga pea mo e ngako.

²¹Ka ko e to‘oto‘onga mo e ngaahi alanga na‘a ne fufulu vai, pea toki tutu kotoa ‘e Mōsese ‘a e sipi tangata ‘i he ‘ōlita: ko e feilaulau-mōifua ia kia Sihova: ko e ngangatu fakahōifua fai‘aki ‘a e afi kia Sihova; ‘o hangē ko e tu‘utu‘uni ‘a e ‘Eiki kia Mōsese.

²²Pea ne ‘omi ‘a e sipi tangata ‘e taha ko e sipi fakanofo: pea ko ‘Ēlone mo hono ngaahi foha na‘a nau hilifaki honau nima ki he ‘ulu ‘o e sipi.

²³Pea ne tāmate‘i ia; pea na‘e to‘o ‘e Mōsese ha me‘i toto, ‘o ne ‘ai ki he mua‘i telinga to‘omata‘u ‘o ‘Ēlone, pea ki hono motu‘a nima to‘omata‘u, pea ki hono motu‘a va‘e to‘omata‘u.

²⁴Pea ne fakaofi mai ‘a e ngaahi foha ‘o ‘Ēlone, pea ‘ai ‘e Mōsese ha me‘i toto ki honau mua‘i telinga to‘omata‘u, pea ki honau motu‘a nima to‘omata‘u, pea ki honau motu‘a va‘e to‘omata‘u: pea na‘e luluku ‘e Mōsese ‘aki ‘a e toto ‘a e ‘ōlita takatakai.

²⁵Pea na‘a ne to‘o ‘a e ngako, mo e tu‘ulāvelo, pea mo e tākai ‘oku ‘ufi‘ufi ‘aki ‘a e to‘oto‘onga, pea mo e milimili ‘o e ‘ate, pea mo e ongo kofuua, mo e ngako ‘oku ‘i ai, pea mo e tefito alanga to‘omata‘u:

²⁶pea ne to‘o mei he kato mā ta‘elēvani na‘e ‘i he ‘ao ‘o Sihova ha keke ta‘elēvani ‘e taha, mo e fo‘i keke natu lolo, pea mo ha fo‘i mā manifinifi, ‘o ne hilifaki ki he ngako mo e tefito alanga to‘omata‘u:

²⁷pea ne ‘ai kotoa ki he ‘aofi nima ‘o ‘Ēlone mo hono ngaahi foha, pea ne tātākalo ‘aki ia, ko e feilaulau-tākalo kia Sihova.

²⁸Pea toki to‘o ‘e Mōsese ‘a e ngaahi me‘a mei honau ‘aofi nima, ‘o ne tutu ‘i he ‘ōlita ‘i he funga feilaulau-mōifua: ko e fakanofo ia: ko e ngangatu fakahōifua, fai‘aki ‘a e afi kia Sihova.

²⁹Pea to‘o ‘e Mōsese ‘a e fatafata, ‘o ne tātākalo ‘aki ia, ko e feilaulau-tākalo ‘i he ‘ao ‘o Sihova: ko e ‘inasi ia ‘o Mōsese mei he sipi fakanofo; hangē ko e tu‘utu‘uni ‘a Sihova kia Mōsese.

³⁰Pea to‘o ‘e Mōsese ha me‘a mei he lolo fakanofo, pea mei he toto na‘e ‘i he funga ‘ōlita, pea ne afuhi ‘aki ‘a ‘Ēlone, ‘a hono ngaahi kofu, pea mo hono ngaahi foha, mo honau ngaahi kofu, fakataha; pea na‘a ne fakatāpui ‘aki ‘a ‘Ēlone, ‘a hono ngaahi kofu, mo hono ngaahi foha, pea mo honau ngaahi kofu, fakataha.

³¹Pea lea ‘a Mōsese kia ‘Ēlone, pea ki hono ngaahi foha, Mou haka ‘a e kakano ‘i he mata Tēniti Fe‘iloaki‘anga: pea mou kai ia ‘i he potu ko ia mo e mā ‘oku ‘i he kato fakanofo, ‘o hangē na‘e fekau kiate au, ‘o pehē, ‘E kai ia ‘e ‘Ēlone mo hono ngaahi foha.

³²Pea ko e toe ‘o e kakano mo e mā te mou faka‘auha ‘aki ‘a e afi.

³³Pea ‘e ‘ikai te mou hū kitu‘a mei he mata Tēniti Fe‘iloaki‘anga, ‘o ‘aho fitu; kae‘oua ke kakato ‘a e ngaahi ‘aho ‘o homou fakanofo: “He ko ha ‘aho ‘e fitu te ne fai ai homou fakanofo.”

³⁴Hangē ko hono fai he ‘aho ni, ‘oku pehē ‘a e tu‘utu‘uni ‘a e ‘Eiki ke fai; ke feia ha fakalelei ma‘amoutolu.

³⁵Pea koe mata Tēniti Fe‘iloaki‘anga te mou nofo ki ai, pō mo e ‘aho, ‘o ‘aho fitu, pea te mou tauhi ‘a e fatongia ‘a Sihova, ke ‘oua te mou mate: he kuo pehē hoku fekau.

³⁶Pea na‘e fai ‘e ‘Ēlone mo hono ngaahi foha ‘a e ngaahi me‘a na‘e tu‘utu‘uni ‘e Sihova ‘ia Mōsese.