Read KO E TOH TAPU KATOA TONGA KO SELEMAIA 1 Bible Online

KO SELEMAIA 1 - KO E TOH TAPU KATOA TONGA bible

KO SELEMAIA 1

¹KONI lea ‘a Selemaia foha ‘o Hilikaia, ko e taha ‘i he kau taula‘eiki na‘e nofo ‘i ‘Anatoti ‘i he fonua ‘o Penisimani:

²‘a ia na‘e hoko ki ai ‘a e folofola ‘a Sihova ‘i he taimi ‘o Siosaia foha ‘o ‘Āmoni ko e Tu‘i Siuta, ‘i hono hongofulu ta‘u ‘o e pule ‘a e tu‘i ko ia.

³Na‘e hoko ki ai foki ‘i he taimi ‘o Sihoiakimi foha ‘o Siosaia Tu‘i Siuta, ‘o fai atu ki he faka‘osi ‘o e hongofulu mā taha ta‘u ‘o Setekaia, foha ‘o Sios aia Tu‘i Siuta; ‘io, ‘o a‘u ki he taki pōpula ‘o Selusalema ‘i hono nima ‘o e māhina.

⁴Pea na‘e hoko ‘a e folofola ‘a Sihova kiate au, ‘o pehē, Te‘eki ke u fatu koe ‘i he kete na‘a ku ‘ilo‘i koe,

⁵pea te‘eki ke ke ‘alu atu mei he manava kuo u fakatāpui koe; ne u tuku ke ke palōfita ki he ngaahi pule‘anga.

⁶Pea u tali, ‘Oiauē, ‘Ātonai Sihova, me‘a mai ‘oku ‘ikai te u poto ‘i he lea: he ko e tamasi‘i pē au.

⁷Pea folofola mai ‘a Sihova, ‘Oua te ke pehē ko e tamasi‘i koe: he te ke ‘alu kiate kinautolu kotoa ‘oku ou tuku atu koe ki ai, pea ko e me‘a kotoa te u fekau‘i ai koe, te ke lea‘aki.

⁸‘Oua te ke manavahē ‘i honau ‘ao; he ‘oku ou ‘iate koe ke fai ho fakahaofi — ko Sihova ia mei he Ta‘ehāmai.

⁹Pea mafao mai ‘e Sihova hono nima, ‘o ala ki hoku ngutu; pea folofola ‘a Sihova kiate au; Vakai, kuo u ‘ai ‘eku ngaahi lea ki ho ngutu:

¹⁰sio mai, kuo u fakanofo koe he ‘aho ni ke fai ki he ngaahi kakai mo e ngaahi pule‘anga, ke ta‘aki pea ke laiki, pea ke maumau mo faka‘auha; ke langa pea ke tō.

¹¹Pea na‘e hoko kiate au ha folofola ‘a Sihova, ‘o pehē, Ko e hā ‘a e me‘a ‘oku ke mo‘usioa, Selemaia? Pea u tali, Ko e va‘a ‘ai ‘oku ou mo‘u siofi.

¹²Pea folofola mai ‘a Sihova, Totonu ho‘o sio: he te u ‘ai[1] ‘eku lea ke fakahoko.

¹³Pea hoko ‘a e folofola ‘a Sihova kiate au hono tu‘oua, ‘o pehē, Ko e hā ena ‘oku ke mo‘usio? Pea u tali, Ko e kulo lili ia ‘oku ou mo‘usiofi; pea ‘oku hā hono ngutu he‘ene fakatafa mei he tokelau.

¹⁴Pea folofola ‘a Sihova kiate au, Ko e tokelau ‘e ‘oho mei ai ‘a e kovi ki he nofo kotoa ‘o e fonua.

¹⁵He ko au eni ‘oku ou ui mai ‘a e ngaahi fa‘ahinga ‘o e ngaahi pule‘anga ki tokelau na — ko Sihova ia mei he Ta‘ehāmai — pea te nau omi, ‘o ‘ai takitaha hono taloni fe‘unga mo e ngaahi matanikolo ‘o Selusalema, pea ke fai tau ki hono ngaahi ‘ā takatakai, pea ke fai tau ki he ngaahi kolo ‘o Siuta.

¹⁶Pea te u tala ‘a e tautea ‘o ‘eku fakamaau kinautolu koe‘uhi ko ‘enau ngaahi kovi kehekehe; he‘enau li‘aki au, ka nau tutu ‘inisēnisi ki he ngaahi ‘otua kehe, mo fai lotu ki he ngāue ‘a honau nima ‘onautolu.

¹⁷Ka ko koe, huke ho kofu, pea ke tu‘u ‘o lea kiate kinautolu ‘aki ‘a e ngaahi me‘a kotoa te u tu‘utu‘uni atu: ‘oua te ke teki he tu‘u ‘i honau ‘ao, na‘a ‘iloange te u fakateki‘i koe telia kinautolu.

¹⁸Pea ko au eni ‘oku ou ngaohi koe he ‘aho ni ko e kolo talitau‘anga, mo e pou ‘aione, mo e ‘ā palasa ki he fonua kotoa, ki he ngaahi Tu‘i Siuta, ki hono hou‘eiki, ki hono kau taula‘eiki, pea ki he kakai ‘o e fonua.

¹⁹Pea te nau tau mo koe; ka ‘e ‘ikai te nau lava‘i koe: he ‘oku ou ‘iate koe ke fai ho fakahaofi — ko Sihova ia mei he Ta‘ehāmai.