Read KO E TOH TAPU KATOA TONGA KO SELEMAIA 13 Bible Online

KO SELEMAIA 13 - KO E TOH TAPU KATOA TONGA bible

KO SELEMAIA 13

¹KO eni ‘a e folofola ‘a Sihova kiate au, ‘Alu, ‘o fakatau mai ha no‘o līneni, pea ‘ai ki ho kongaloto, pea ‘oua ‘e unu ki ha vai.

²Pea u fakatau ‘a e no‘o, hangē ko e folofola ‘a Sihova, pea u ‘ai ki hoku kongaloto.

³Pea hoko ‘a e folofola ‘a Sihova kiate au ko hono tu‘o ua, ‘o pehē,

⁴To‘o ‘a e no‘o na‘a ke fakatau, ‘a ia ‘oku ‘i ho kongaloto, pea ke tu‘u, ‘o ‘alu ki ‘Eufaletesi, pea fufū ia ‘i ai, ‘i ha ava ‘o e makatu‘u.

⁵Pea u ‘alu, pea u fufū ia ‘i ‘Eufaletesi, ‘o hangē ko e tu‘utu‘uni au ‘e Sihova.

⁶Pea hili ‘a e ngaahi ‘aho lahi, na‘e folofola ‘a Sihova kiate au, Tu‘u, ‘alu ki ‘Eufaletesi, pea to‘o mei ai ‘a e no‘o, ‘a ia na‘a ku fekau ke ke fufū ai.

⁷Ko ia, na‘a ku ‘alu ki ‘Eufaletesi, pea u keli, ‘o u to‘o ‘a e no‘o mei he potu na‘a ku fufū ai ia: pea tā kuo maumau ‘a e no‘o, ‘o ‘ikai ‘aonga ki ha me‘a.

⁸Pea hoko ‘a e folofola ‘a Sihova kiate au, ‘o pehē, Ko e folofola eni ‘a Sihova:

⁹‘E pehē ‘eku maumau ‘a e pōlepole‘anga ‘o Siuta, mo e pōlepole‘anga ‘o Selusalema ‘a ia ‘oku hulu.

¹⁰Ko e kakai kovi ni, ‘a ia kuo ‘ikai te nau fie fanongo ki he‘eku ngaahi lea, ‘oku nau fou pē ‘i he ta‘emīngao honau loto, pea ‘oku nau muimui ‘otua kehe, ke tauhi ki ai, mo lotu ki ai, te nau hoko hangē ko e no‘o ni, ‘a ia ‘oku ‘ikai ‘aonga ki ha me‘a.

¹¹He hangē ‘oku piki ‘a e no‘o ki he kongaloto ‘o ha tangata, ‘oku pehē mo ‘eku fakapiki kiate au ‘a e fale kotoa ‘o ‘Isileli, mo e fale kotoa ‘o Siuta — ko Sihova ia mei he Ta‘ehāmai; koe‘uhi ke nau hoko kiate au ko e kakai, mo e hingoa, mo e fakamālō, mo e teunga: ka na‘e ‘ikai te nau fakaongo mai.

¹²Pea te ke lea‘aki kiate kinautolu ‘a e lea ko eni: Ko e folofola eni ‘a Sihova, ko e ‘Otua ‘o ‘Isileli, Ko e siā kotoa ‘e fakafonu uaine. Pea te nau pehē kiate koe, ‘Ā, ‘ikai ‘oku mau lāu‘ilo ki ai, ko e siā kotoa ‘e fakafonu uaine?

¹³Pea te ke pehē kiate kinautolu, Ko e folofola eni ‘a Sihova; Ko au eni ‘oku ou fakafonu ‘a e nofo kotoa he fonua ni — ‘a e ngaahi tu‘i, ‘oku fetongi ‘a Tēvita ‘i hono taloni, mo e kau taula‘eiki, mo e kau palōfita, mo e nofo Selusalema fua pē — ‘oku ou fakafonu kinautolu ‘aki ‘a e kona.

¹⁴Pea te u fakafepaki kinautolu, ‘io, ‘a e mātu‘a mo e fānau fakataha — ko Sihova ia mei he Ta‘ehāmai: ‘e ‘ikai te u lolou, pea ‘e ‘ikai te u mamae, pea ‘e ‘ikai te u faka‘atu‘i, ka te u faka‘auha pē kinautolu.

¹⁵Fanongo kimoutolu, ‘o mou fokotu‘u telinga mai; ‘oua te mou fakamofutofuta; he ko Sihova ia ‘oku lea.

¹⁶Tuku kia Sihova ko homou ‘Otua ‘a e kolōlia, he te‘eki ke ne ‘omi ‘a e po‘uli, pea te‘eki humu homou va‘e ‘i he ngaahi mo‘unga ‘o e efiafi po‘uli; pea ‘oku mou ‘amanaki ki ha maama, ka ‘oku ne liliu ia ko e ‘ata-‘o-mate, ‘oku ne ngaohi ia ko e po‘uli matolu.

¹⁷Pea kapau ‘oku ‘ikai te mou fakaongo, tā ‘e tangi ‘i he lilo hoku laumālie koe‘uhi ko e fakapupula na, pea mātu‘aki tangi hoku mata ni, ‘o fetafei ‘i he lo‘imata, koe‘uhi kuo taki pōpula ‘a e tākanga ‘a Sihova.

¹⁸Lea ki he tu‘i pea ki he ma‘itaki, Nofo ‘i lalo; he kuo homo hifo ‘a e teu homo ‘ulu, ‘a hono kalauni lāngilangi‘anga.

¹⁹Ko e ngaahi kolo ‘i he feitu‘u ko Tonga kuo songo, pea ‘oku ‘ikai lava ‘e ha taha ke fakaava: kuo taki pōpula ‘a Siuta kātoa; kuo taki pōpula, ‘o hiki mo e faliki.

²⁰Ta‘ahine, tāngaki homou mata, ‘o vakai ‘a kinautolu ‘oku ha‘u mei he tokelau. Kofa‘ā ‘a e tākanga na‘e tuku kiate koe, ho‘o fanga sipi faka‘ofo‘ofa?

²¹Ko e hā ha‘o lau ‘e fai ka ne ka fokotu‘u ha ni‘ihi ke ‘ulu kiate koe, ka ko e fa‘ahinga kuo ke fakamaheni kinautolu ke kaume‘a mo koe? ‘Ikai ‘e puke koe ‘e he mamahi, ‘o hangē ko ha fefine fā‘ele?

²²Pea kapau te ke pehē ‘i ho loto, Ko e hā ‘oku mo‘utāmakia ai au ‘e he ngaahi me‘a ni? ‘Ā, ko e lahi ho‘o kovi kuo huke ai ho kāuni, kuo fā homou va‘e.

²³‘E lava ‘e ha ‘Itiopea ke liliu hono kili, pe ko ha lēpati ke liliu hono pulepule? ‘e toki lava ai ‘e kimoutolu foki ke fai lelei, ‘a ia ‘oku mou maheni mo e faikovi.

²⁴Ko ia te u veteki ‘a kinautolu, hangē ko e kafukafu ‘oku ifi ‘e he matangi ‘o e toafa.

²⁵Ko eni ho ‘inasi tō, ko ho tufakanga kuo vahe meiate au — ko Sihova ia mei he Ta‘ehāmai: koe‘uhi kuo ke fakangalongalo‘i au, pea kuo ke tu‘u ho‘o falala ki he loi.

²⁶Ko ia foki, ko au te u huke ho kāuni, ‘o pūlou ‘aki ho mata, kae hā ho mā‘anga.

²⁷Ko ho‘o fa‘a tono ‘unoho, ko ho‘o fa‘a tangi tau hangē ha fu‘u hoosi, ko ho‘o fe‘auaki mousa‘a ‘i he ngaahi funga mā‘olunga ‘i he tuku‘uta — ‘Ā, kuo u mamata ki ho‘o ngaahi fakalielia, ‘Oiauē koe, Selusalema! ‘e ‘ikai lava ho fakama‘a; kae‘oua ke hili ha taimi — fēfē nai hono fuoloa?