Read KO E TOH TAPU KATOA TONGA KO SELEMAIA 15 Bible Online

KO SELEMAIA 15 - KO E TOH TAPU KATOA TONGA bible

KO SELEMAIA 15

¹PEA folofola ‘a Sihova kiate au: Neongo e tu‘u ‘i hoku ‘ao ‘a Mōsese mo Sāmiuela, ‘e ‘ikai malele hoku loto ki he kakai ni, Kapusi mei hoku ‘ao ke nau ‘alu.

²Pea ka faifai pea nau pehē kiate koe, Te mau ‘alu ki fē? Pea te ke pehē kiate kinautolu, Ko e folofola eni ‘a Sihova: Ko ia kuo tuhu‘i ki he mate faka‘auha, te ne ‘alu ki he mate faka‘auha; pea ko ia kuo tuhu‘i ki he heletā, ki he heletā; pea ko ia kuo tuhu‘i ki he honge, ki he honge; pea ko ia kuo tuhu‘i ki he pōpula, ki he pōpula.

³Pea ‘oku ou fokotu‘u ha kalasi ‘e fā ke ngaohi kinautolu — ko Sihova ia mei he Ta‘ehāmai — ko e heletā ke tāmate‘i, pea ko e fanga kulī ke fehae, pea ko e manupuna ‘o e ‘atā mo e manu ‘o e fonua ke keina mo faka‘auha.

⁴Pea te u tuku kinautolu ko e me‘a ke tekatali ‘aki ‘e he ngaahi pule‘anga ‘o māmani, koe‘uhi ko Manase foha ‘o Hesekaia ko e Tu‘i Siuta, koe‘uhi ko e me‘a na‘a ne fai ‘i Selusalema.

⁵He ko hai te ne maumau‘ia ‘iate koe, ‘e Selusalema? pea ko hai te ne hohoi ‘iate koe? pea ko hai te ne afe ke ‘ilo pe kuo ke fēfē?

⁶Ta‘ahine, kuo ke li‘aki au — ko Sihova ia mei he Ta‘ehāmai — ‘oku ke fakaholomui: ko ia, ‘oku mafao atu hoku nima ke faka‘auha koe; kuo u fiu ‘i he momou.[23]

⁷Pea te u tapili kinautolu ‘aki ha ī ‘i he ngaahi matanikolo ‘o e fonua; te u faka-ta‘e-ha-fānau kinautolu, te u faka‘auha hoku kakai; ko honau ngaahi ‘alunga ‘oku ‘ikai te nau foki mei ai.

⁸Kuo tokolahi si‘onau ngaahi uitou ‘i he ‘one‘one ‘o e tahi: kuo u ‘omi kiate kinautolu — ‘io, ki he fa‘ē ‘a e fu‘u siana — ha taha ‘oku vete ho‘atā: kuo u tuku ke tō kiate ia fakafokifā ‘a e mamahi mo e fakailifia.

⁹‘Oku vaivai ‘a si‘i fefine kuo ne fanau‘i ha toko fitu; ‘oku ne tuku atu hono laumālie; ‘oku tō hono la‘ā kei fu‘u ‘aho; kuo fakamaa‘i mo fakapuputu‘u ia; pea ko honau toenga te u tuku ki he heletā ‘i he ‘ao ‘o honau ngaahi fili — ko Sihova ia mei he Ta‘ehāmai.

¹⁰‘Oiauē kita, ‘alā ko ‘eku fa‘ē, na‘a ke fanau‘i au ko e tangata fakakikihi, mo e tangata fakalanga kē ki māmani kātoa! Tala‘ehai kuo u nō pa‘anga atu, pe kuo u nō pa‘anga mai; ka ‘oku kau kotoa ‘i hoku tūvangia.

¹¹Folofola ‘a Sihova, Tala atu, te u poupou koe ke lelei;[24] tala atu, te u ngaohi ‘a e fili na ke fakakolekole kiate koe ‘i he taimi ‘o e kovi, mo e taimi ‘o e faingata‘a.

¹²‘E lava ‘e ha taha ke fesi ‘a e ‘aione, ‘a e ‘aione ‘o e tokelau, mo e palasa?

¹³Ko ho mālohinga mo ho‘o koloa te u tuku ke vetea ta‘eha totongi, ‘io, ke fai ia koe‘uhi ko ho‘o ngaahi angahala kehekehe, pea ‘i ho ngaahi feitu‘u kehekehe.

¹⁴Pea te u tuku ke ‘alu ia mo ho ngaahi fili ki ha fonua ‘oku ‘ikai te ke ‘ilo ki ai; he ‘oku ai ha afi ‘oku vela ‘i he‘eku ‘ita, kuo tafu ia ke fai kiate kimoutolu.

¹⁵Ko koe, ‘Eiki, ‘oku ke ‘afio‘i: manatu‘i au mo ‘a‘ahi mai, pea ke fai ha sauni ma‘aku ‘i hoku kau fakatanga: ‘oua ‘e ‘ave au ‘i he fakatotoka ho houhau:

¹⁶ke ke mea‘i ‘oku ou kātaki manuki koe‘uhi ko koe. Na‘e fetaulaki mo au ho‘o ngaahi folofola, pea u kai ia; pea na‘e hoko ho‘o ngaahi lea ko hoku nēkeneka‘anga, mo e fiefia‘anga ‘o hoku loto: he na‘e ui‘aki au ho huafa, ‘e Sihova, ko e ‘Otua Mohu Hōsitē.

¹⁷Na‘e ‘ikai te u nofo ki he sō ‘a e kau kata, pe te u tome‘e: na‘a ku nofo toko taha pē, koe‘uhi na‘e ‘iate au ho nima; he na‘a ke fakafonu au ‘i he ‘ita mamahi.

¹⁸Ko e hā ‘oku ta‘engata ai ‘eku mamahi, pea matamatakovi hoku lavea, ‘o ‘ikai ‘aonga ha faito‘o? Te ke hoko mo‘oni kiate au hangē ko e me‘a faka‘amanakinoa, ha vai ‘oku ‘ikai ke tu‘uma‘u?

¹⁹Ko ia, ko e folofola eni ‘a Sihova: Kapau te ke foki mai, pea te u toe ‘omi koe ke tu‘u ‘i hoku ‘ao; pea kapau te ke tatala ‘a e mahu‘inga mei he efe, te ke hoko ‘o hangē ko hoku ngutu. ‘E foki kiate koe ‘a e fa‘ahinga ko ē, ka ko koe ‘e ‘ikai te ke foki kiate kinautolu.

²⁰Pea ‘oku ou tuku koe ki he kakai ni ko e ‘ā palasa kuo teu ki he tau; ko ia neongo ‘enau tau‘i koe, kae ‘ikai te nau lava‘i koe: he ‘oku ou ‘iate koe ‘e au ke tokoni‘i mo fakahaofi — ko Sihova ia mei he Ta‘ehāmai.

²¹‘Io, te u fakahaofi koe mei he nima, ‘o e kau kovi, pea te u vete koe mei he puke ‘a e kau fakamālohi.