Read KO E TOH TAPU KATOA TONGA KO SELEMAIA 16 Bible Online

KO SELEMAIA 16 - KO E TOH TAPU KATOA TONGA bible

KO SELEMAIA 16

¹PEA na‘e hoko ‘a e folofola ‘a Sihova kiate au, ‘o pehē,

²‘E ‘ikai te ke ma‘u hao uaifi, pea ‘e ‘ikai te ke ma‘u ha‘o fānau tangata pe fānau fefine ‘i he potu ni.

³He ko e folofola eni ‘a Sihova ‘i he fānau tangata mo e fānau fefine ‘oku fanau‘i ‘i he potu ni, pea koe‘uhi ko ‘enau ngaahi fa‘ē na‘e fanau‘i kinautolu, pea koe‘uhi ko ‘enau ngaahi tamai na‘e fakatupu kinautolu ‘i he fonua ni:

⁴Ko e ngaahi pekia‘anga fakamamahi te nau pekia ai; ‘e ‘ikai tēngihia kinautolu, pea ‘e ‘ikai tanu; te nau hoko ko e kinoha‘a ‘i he funga kelekele: pea ‘e ‘osi‘osi kinautolu ‘i he heletā mo e honge; pea ko honau ngaahi ‘anga‘anga ‘e hoko ko e me‘akai ‘a e manupuna ‘o e ‘atā, mo e manu ‘o e fonua.

⁵He ko e folofola eni ‘a Sihova, ‘Oua te ke hū ki ha fale ‘oku ‘i ai ha tangi, pea ‘oua te ke ‘alu ke fai ha tēngihia, pea ‘oua te ke maumau‘ia ‘iate kinautolu: he kuo u ‘ave ‘eku melino mei he kakai ni — ko Sihova ia mei he Ta‘ehāmai — ‘a e ‘ofa mo e fai faka‘atu‘i.

⁶Pea ko e lalahi mo e iiki ‘e pekia ‘i he fonua ni: ‘e ‘ikai tanu kinautolu, pea ‘e ‘ikai fai honau tēngihia, ‘e ‘ikai fai ha fefofoa‘i, pea ‘e ‘ikai fai ha fakatekefua koe‘uhi ko kinautolu.

⁷Pea ‘e ‘ikai tufa ha me‘akai kiate kinautolu ‘i he‘enau tangi, pe fai ha fakalelu koe‘uhi ko ha pekia; pea ‘e ‘ikai fakatau ‘a e kava fakafiemālie kiate kinautolu koe‘uhi ko e pekia ‘a ‘ene tamai pe ko ‘ene fa‘ē.

⁸Pea ‘oua te ke hū ki ha fale ‘oku fai ai ha kātoanga, ke nofo mo kinautolu, ke kai mo inu.

⁹He ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni ‘oku ou ‘ai ke tuku ‘i he potu ni — ‘o mou sio ki ai, ‘io, ‘i homou taimi — ‘a e le‘o ‘o e fiefia mo e le‘o ‘o e mavava, ‘a e le‘o ‘o e ‘eiki ta‘ane mo e le‘o ‘o e ta‘ahine.

¹⁰Pea ‘i he taimi ko ia, hili ho‘o fakahā ki he kakai ni ‘a e ngaahi fu‘u me‘a ko eni, pea te nau pehē atu, Koe‘uhi ko e hā kuo folofola‘aki pehē ‘e Sihova ‘a e ngaahi fu‘u kovi ni kiate kimautolu? Pea ko e hā ‘emau kovi? Mo e hā ‘emau angahala kuo mau fai kia Sihova ko homau ‘Otua?

¹¹Pea te ke pehē kiate kinautolu, Koe‘uhi na‘e li‘aki au ‘e ho‘omou ngaahi kui — ko Sihova ia mei he Ta‘ehāmai — pea nau muimui ‘otua kehe mo tauhi ia, mo lotu ki ai, ka nau li‘aki au, pea ko ‘eku lao na‘e ‘ikai te nau tauhia;

¹²pea ko kimoutolu na‘a mou fai kovi ange ‘i ho‘omou ngaahi kui; pea vakai, ko kimoutolu ē ‘oku muimui takitaha ki he ta‘emīngao hono loto kovi, ke ‘oua te mou fakaongo kiate au:

¹³ko ia, ‘oku ou heu‘i atu kimoutolu mei he funga fonua ni, ki ha fonua ‘oku ‘ikai te mou ‘ilo ki ai, ‘a kimoutolu, pe ko ho‘omou ngaahi tamai; pea te mou toki tauhi ai ki ha ngaahi ‘otua kehe ‘aho mo e pō; he tala‘ehai te u fai atu ha ‘ofa.

¹⁴Ko ia, vakai, ‘oku hoko mai ha taimi — ko Sihova eni mei he Ta‘ehāmai — ‘a ia ‘e ‘ikai kei lau, Tangi ‘a e mo‘ui ‘a Sihova, ‘a ia na‘a ne ‘ohake ‘a ha‘a ‘Isileli mei ‘Isipite;

¹⁵ka ko eni pē, Tangi ‘a e mo‘ui ‘a Sihova, ‘a ia na‘a ne ‘ohake ‘a ha‘a ‘Isileli mei he fonua tokelau, pea mei he fonua kehekehe, ‘a ia kuo fakateka kinautolu ki ai: he te u toe ‘omi kinautolu ki he kelekele na‘a ku ‘atu ki he‘enau ngaahi kui.

¹⁶Ko au eni ‘oku ou fekau ke omi ha kau taumāta‘u tokolahi — ko Sihova ia mei he Ta‘ehāmai — pea te nau taumāta‘u‘i kinautolu; pea hili ia te u fekau ke ‘omi ke lahi ha kau tulimanu, ‘a ia te nau pō kinautolu mei he mo‘unga kehekehe, pea mei he ngaahi potu mā‘olunga kehekehe, pea mei he ngaahi ava‘i makatu‘u.

¹⁷He ko hoku ongo mata ni ‘oku hanga ki honau hala kotoa pē: ‘oku ‘ikai ke puli meiate au, pea ‘oku ‘ikai ke fufū ‘enau kovi, ka ‘oku fe‘ao mo au.

¹⁸Ka te u tomu‘a fakaai ‘a e lōua ‘o ‘enau kovi mo ‘enau hia; koe‘uhi ko ‘enau ‘uli‘i hoku fonua ‘aki ‘a e ‘anga‘anga ‘o ‘enau me‘a fakalielia, pea kuo nau fakafonu hoku tofi‘a ‘aki ‘enau ngaahi me‘a mousa‘a.

¹⁹‘E Sihova, ko hoku mālohinga, mo ‘eku kolo talitau‘anga, mo hoku hūfanga ‘i he taimi faingata‘a, ko koe ‘e ha‘u ki ai ‘a e ngaahi pule‘anga mei he ngaahi ngata‘anga ‘o māmani, pea te nau pehē, ‘Ā, ko e loi pē ‘a e me‘a na‘e hokosi ‘e he‘emau ngaahi tamai, ko e muna pē, pea ‘oku ‘ikai hano ‘aonga.

²⁰‘E ngaohi koā ‘e ha tangata ha ngaahi ‘otua ma‘ana; ‘osi, ko e fa‘ahinga ‘ata‘i ‘otua kinautolu?

²¹Ko ia, ko au eni ‘oku ou ‘ai ke nau ‘ilo, ‘a e tātu‘otaha ni, ‘oku ou ‘ai ke nau ‘ilo hoku nima mo hoku ngū; ‘io, te nau ‘ilo ko Sihova hoku hingoa.