Read KO E TOH TAPU KATOA TONGA KO SELEMAIA 17 Bible Online

KO SELEMAIA 17 - KO E TOH TAPU KATOA TONGA bible

KO SELEMAIA 17

¹KO E angahala ‘a Siuta kuo tohi ‘aki ha peni ‘aione, ‘aki ha lipi‘i taiāmoni: kuo tongi ki he tohi‘anga ‘o honau loto, pea ki honau ngaahi nifo‘i ‘ōlita.

²Hangē ko e manatu ki he fānau, ‘oku pehē ‘enau manatu ki honau ngaahi ‘ōlita, mo honau ngaahi ‘āsela; ka nau ka tu‘u ofi ki ha ‘akau laumata, ka nau ka tu‘u ‘i he ngaahi potu mā‘olunga.

³‘E si‘oku mo‘unga ‘i he tuku‘uta, te u ‘atu ho mālohi, ‘a ho‘o ngaahi fokotu‘unga koloa ke vete, pea mo ho ngaahi sia ‘i ho ngaahi feitu‘u kotoa, koe‘uhi ko e angahala.[25]

⁴Pea ‘e tuku koe ke fo‘ou — pea ko ho fo‘ui foki — ‘o mama‘o mo e tofi‘a ‘a ia na‘a ku ‘atu kiate koe;[26] pea te u tuku ke ke ngāue ki ho ngaahi fili ‘i ha fonua ‘oku ‘ikai te ke ‘ilo ki ai: he kuo mou tafu ha afi ‘i he‘eku ‘ita, ‘a ia ‘e vela ‘o ta‘engata.

⁵Ko e folofola eni ‘a Sihova: Mala‘ia ā ka ko e mafi ‘a ia ‘oku tu‘u ‘ene falala ki ha tangata, pea ‘oku ne tu‘unga kakano hono ivi, kae hiki hono loto meia Sihova.

⁶Te ne hangē ko e tangata ‘āunoa ‘i he fonua mamate;[27] pea ‘e ‘ikai te ne ‘ilo ‘a e ha‘u ‘a e lelei, ka te ne nofo‘ia ‘a e ngaahi potu pakukā ‘i he toafa, ko e kelekele māsima, ‘o ‘ikai nofo‘anga.

⁷Monū‘ia ā ka ko e mafi ‘oku tu‘u ‘ene falala kia Sihova, ‘io, ko Sihova hono pāletu‘a.

⁸He te ne hangē ko e ‘akau ‘oku tō ki ha vai, pea ‘oku ne tuku atu hono ngaahi aka ki he ve‘e vaitafe, pea ‘e ‘ikai te ne manavahē ‘oka hoko mai ‘a e pupuha, kae mata pē hono lau; pea ‘i he ta‘u la‘ala‘ā ‘e ‘ikai te ne hoha‘a, pea ‘e ‘ikai tuku ‘ene fua.

⁹Ko e fungani ‘i he me‘a kākā ka ko e loto, pea ‘oku hiliō hono kovi:[28] ko hai te ne lava ke ‘ilo ia?

¹⁰Ko au Sihova ‘oku ou hakule ‘a e loto, ‘oku ou sivi ‘a e kofuua, koe‘uhi ke ‘atu ki he tangata ‘o taau mo hono ‘alunga, ‘o fakatatau ki he fua ‘o ‘ene fai anga.

¹¹Ko e patelisi ‘oku ne tata‘o ‘a e fua na‘e ‘ikai te ne fakatō, pehē ‘e ai ha taha ‘oku ne ma‘u koloa ka ‘oku ‘ikai ke hoa mo e lao; ‘e li‘aki ia ‘e he koloa ko ia ‘i he vaeua ‘o ‘ene mo‘ui, pea ‘i hono faka‘osi te ne nofo ko e vale.

¹²Si‘i taloni ‘o e kolōlia mahiki hake mei he kamata‘anga, si‘i potu ‘o hotau faletapu!

¹³‘E Sihova, ko e ‘Amanakinga ‘o ‘Isileli, ‘e fakamaa‘i ‘a kinautolu kotoa pē ‘oku li‘aki koe. Ko e kau hiki ‘iate au ‘e tohi ‘i he kelekele,[29] koe‘uhi kuo nau li‘aki ‘a e fauniteni ‘o e vai mo‘ui, ‘a ia ko Sihova.

¹⁴‘E Sihova, faito‘o au ke mafaito‘o; tokoni‘i au ke matokonia; he ko koe pē hoku vīkiviki‘anga.

¹⁵Vakai, ‘oku lea mai ‘e he fa‘ahinga ko ē, Koma‘ā ia ‘a e folofola ‘a Sihova? ke hoko mai leva.

¹⁶Ko e me‘a kiate au, na‘e ‘ikai te u kalo mei he nofo ko e tokoni tauhi ‘a‘au;[30] ka tala‘ehai na‘a ku faka‘amu ki he ‘aho kovi lahi — ‘oku ke ‘afio‘i pē: ko e me‘a na‘e hū atu mei hoku ngutu na‘e tekefili ki ho fofonga na.

¹⁷‘Oua te ke hoko ko hoku ilifia‘anga: ko hoku hūfanga koe ‘i he ‘aho ‘o e kovi.

¹⁸Ke mā kinautolu ‘oku tuli au, kae ‘oua na‘a ku mā au; ke ilifia ‘a e fa‘ahinga ko ia kae ‘oua na‘a ku ilifia au: ‘Omi kiate kinautolu ‘a e ‘aho kovi, pea maumau‘i kinautolu ‘aki ha maumau lōua.

¹⁹Ko e folofola eni ‘a Sihova kiate au: ‘Alu, ‘o tu‘u ‘i he Matapā-‘o-kakai, ‘a ia ‘oku hū mai mo hū atu ai ‘a e ngaahi Tu‘i Siuta; pea ke tu‘u foki ‘i he ngaahi matanikolo ‘o Selusalema;

²⁰pea ke lea kiate kinautolu, ‘o pehē, Mou fanongo ki he folofola ‘a Sihova, ‘a e ngaahi Tu‘i Siuta, mo Siuta kātoa, mo e nofo Selusalema fua pē, ‘a kimoutolu ‘oku hū ‘i he ngaahi matapā ko eni:

²¹Ko e folofola eni ‘a Sihova: Tokanga telia homou laumālie, pea ‘oua ‘e fua kavenga ‘i he ‘aho Sāpate, ke fakahū mai ‘i he ngaahi matanikolo ‘o Selusalema;

²²pea ‘oua na‘a ‘ave ki tu‘a ha kavenga mei homou ngaahi fale ‘i he ‘aho Sāpate, pea ‘ilonga ha ngāue, ‘oua ‘e fai: ka mou tapui ‘a e ‘aho Sāpate, ‘o hangē ko ‘eku tu‘utu‘uni ki ho‘omou ngaahi kui;

²³ka na‘e ‘ikai te nau fakaongo, pea na‘e ‘ikai te nau fokotu‘u telinga mai, ka nau fakakekeva honau kia, ke ‘oua te nau fanongo, pea ke ‘oua te nau tali akonaki.

²⁴Pea kapau te mou fakaongo mo‘oni kiate au — ko Sihova ia mei he Ta‘ehāmai — ‘o ‘oua ‘e omi kavenga ‘i he ngaahi matanikolo ni ‘i he ‘aho Sāpate, kae tapui ‘a e ‘aho Sāpate, ke ‘oua ‘e fai ai ha momo‘i ngāue;

²⁵pea ‘e toki hū ‘i he ngaahi matanikolo ni ‘ani tu‘i moni hou‘eiki ‘oku nau ‘afio ‘i he taloni ‘o Tēvita, ‘oku nau heka sāliote mo e hoosi, ‘a kinautolu mo honau hou‘eiki, ‘a e tangata Siuta mo e nofo Selusalema: pea ‘e nofo‘ia ‘a e kolo ni ‘o ta‘engata.

²⁶Pea te nau omi mei he ngaahi kolo ‘o Siuta, mo e ngaahi feitu‘u takatakai ki Selusalema, pea mei he fonua ‘o Penisimani, pea mei he Sēfela‘a, pea mei he mo‘unga, pea mei he feitu‘u ko Tonga, ko ‘enau ‘omi feilaulau-mōifua mo e feilaulau kehe, mo e feilaulau-me‘akai, mo e laipeno, pea[31] ko ‘enau ‘omi ha fakamālō ki he fale ‘o Sihova.

²⁷Ka ‘o kapau ‘oku ‘ikai te mou fakaongo kiate au, ke tapui ‘a e ‘aho Sāpate, ke ‘oua ‘e fua kavenga, pe hū ‘i he ngaahi matanikolo ‘o Selusalema ‘i he ‘aho Sāpate; pea te u toki tafu ha afi ‘i hono ngaahi matanikolo, pea te ne keina ‘a e ngaahi palasi ‘o Selusalema, ‘o ‘ikai matāmate‘i.