Read KO E TOH TAPU KATOA TONGA KO SELEMAIA 18 Bible Online

KO SELEMAIA 18 - KO E TOH TAPU KATOA TONGA bible

KO SELEMAIA 18

¹KO E folofola na‘e hoko kia Selemaia meia Sihova, ‘o pehē,

²Tu‘u, ‘o ‘alu hifo ki he fale ‘o e tufunga ipu ‘umea, pea te u tuku ke ke fanongo ai ki he‘eku lea.

³Pea u ‘alu hifo ki he fale ‘o e tufunga ipu ‘umea, pea tā ‘oku fai ‘ene ngāue ‘i he mīsini.

⁴Pea ka maumau ‘i he nima ‘o e tufunga ‘a e ipu ‘oku ne ngaohi ‘aki ‘a e ‘umea, pea ne hanga ‘o ngaohi ia ko e ipu kehe, ha me‘a pē na‘e hā lelei ki he tufunga ke ngaohi.

⁵Pea hoko ‘a e folofola ‘a Sihova kiate au, ‘o pehē, Fale ‘o ‘Isileli ē, ‘ikai koā te u lava ke fai kiate kimoutolu ‘o hangē ko e tufunga ni?

⁶ko Sihova ia mei he Ta‘ehāmai. Vakai, hangē ko e ‘umea ‘i he nima ‘o e tufunga, ko kimoutolu ia ‘i hoku nima, si‘i fale ‘o ‘Isileli.

⁷Ka fokifā te u lea ‘i ha kakai, pe ha pule‘anga, ke ta‘aki ia mo holoki mo faka‘auha;

⁸ka ‘oka tafoki ‘a e kakai na‘a ku lea ki ai mei hono kovi ko ia, pea te u fakatomala ai ‘i he kovi na‘a ku fakakaukau ke fai ki ai.

⁹Pea ka fokifā te u lea ‘i ha kakai, pe pule‘anga, ke langa hake mo hunuki hifo;

¹⁰ka ‘o kapau te ne fai ‘a e me‘a ‘oku tau kovi kiate au, ‘o ‘oua te ne fakaongo ki hoku le‘o, pea te u fakatomala ‘i he lelei ‘a ia na‘a ku pehē ke fai ki ai.

¹¹Pea ko eni, lea mu‘a ki he tangata Siuta, pea ki he nofo Selusalema, ‘o pehē, Ko e folofola eni ‘a Sihova: Vakai, ‘oku ou tufunga‘i ha kovi ke fai kiate kimoutolu, pea ‘oku ou fa‘u ha fakakaukau ke mou kovi ai: ‘ē, mou foki takitaha mei hono hala kovi, ‘o mou ngaohi ke lelei homou ngaahi ‘alunga mo ho‘omou ngaahi fai anga.

¹²Ka ‘oku nau pehē, ‘E ‘ikai lava: ka te mau muimui ki he‘emau ngaahi fakakaukau, pea takitaha fai ki he ta‘emīngao hono loto kovi.

¹³Ko ia ko e folofola eni ‘a Sihova: Fehu‘i mu‘a ‘i he ngaahi pule‘anga: ko hai kuo ne fanongo ki ha me‘a hangē ko eni? Ko e me‘a faka‘ulia faufau kuo fai ‘e he tāupo‘ou ko ‘Isileli.

¹⁴‘E mole ‘a e sinou ‘o Lepanoni mei he makatu‘u ‘o e tuku‘uta? pe mātu‘u koā ‘a e vai muli na ‘oku tafe momoko mai?

¹⁵He kuo fakangalongalo‘i au ‘e hoku kakai, kuo nau tutu ‘inisēnisi ki he me‘a launoa; pea kuo nau fakahumu kinautolu ‘i honau ngaahi ‘alunga, ‘a e ngaahi hala tupu‘a, ke ‘alu ki he ngaahi hala fakateiapa‘a, ko e hala ‘oku ‘ikai tanu;

¹⁶ke ngaohi honau fonua ko e me‘a ke fai ai ha ofo mo ha faka‘ise‘isa ‘o ta‘engata; ‘ilonga ha taha ‘oku laka ofi ai te ne ofo mo kalokalo hono ‘ulu.

¹⁷Te u veteki kinautolu ‘i he ‘ao ‘o e fili, ‘o hangē ko e fai ‘a e matangi hahake; te u sī kiate kinautolu ‘aki hoku tu‘a, ‘o ‘ikai ‘aki hoku mata, ‘i he ‘aho ‘o ‘enau tu‘utāmaki.

¹⁸Pea na‘a nau pehē, Ha‘u ā ke tau puleaki‘i ‘a Selemaia; he tala‘ehai ‘e mole ‘a e lao mei he taula‘eiki, mo e fakakaukau mei he poto, mo e folofola mei he palōfita. Ha‘u ā ke tau tā ‘elelo‘i ia, ‘oua na‘a tau tokanga‘i ‘ene ngaahi fu‘u lea.

¹⁹‘E Sihova, ke ke tokanga‘i au ‘e koe, pea ke ongo atu ‘a e le‘o ‘o e kakai ‘oku fakakikihi mo au.

²⁰‘E totongi ‘a e lelei ‘aki ‘a e kovi? he kuo nau keli ha luo ki he‘eku mo‘ui. Manatu ki he‘eku tu‘u ‘i ho ‘ao ke fai ha fakalaloa ma‘anautolu, ke ta‘ofi ho houhau meiate kinautolu.

²¹Ko ia, ke ke ‘atu ‘enau fānau ki he honge, pea tukuange kinautolu ke fa‘iteliha ‘a e heletā; ke nofo ta‘eha fānau mo uitou honau ngaahi uaifi; ke mate honau kau tangata ‘i he mahaki faka‘auha, ko honau kau talavou ke te‘ia ‘aki ‘a e heletā ‘i he tau.

²²Ke ongo mai ‘a e tautapa mei honau ngaahi fale, ‘oka ‘iloange kuo ke ‘omi kiate kinautolu ha kongakau: he kuo nau keli ha luo ke pō au, kuo nau ‘ufi‘ufi ha ngaahi tauhele ke mo‘ua hoku va‘e.

²³Ka ko koe, ‘e Sihova, ‘oku ke ‘afio‘i ‘enau ngaahi fakakaukau kiate au ke u mate; ‘oua te ke fakamolemole ‘enau kovi, pea ‘oua te ke tāmate‘i ‘enau angahala, kae tuku ke fe‘ao ia mo koe: ka nau hoko ko e koto tō fo‘ohake ‘i ho ‘ao; ‘i he taimi ‘o ho houhau, ngāue kiate kinautolu.