Read KO E TOH TAPU KATOA TONGA KO SELEMAIA 2 Bible Online

KO SELEMAIA 2 - KO E TOH TAPU KATOA TONGA bible

KO SELEMAIA 2

¹PEA na‘e hoko ‘a e folofola ‘a Sihova kiate au, ‘o pehē,

²‘Alu, ‘o fanongonongo ki Selusalema, ‘o pehē, Ko e folofola eni ‘a Sihova: Kuo u manatu ma‘au ho‘o ‘ofa mai ‘i ho‘o finemui, mo ho‘o fakananivi ‘i he kamata ‘o ‘eta nonofo; ho‘o muimui kiate au ‘i he Toafa, he fonua na‘e ‘ikai tō ai ha ta‘u.

³Na‘e tapu ‘a ‘Isileli kia Sihova, he ko e polopolo ‘o hono ta‘u: ‘ilonga ha taha te ne kai ki ai ‘e halaia; ‘e hoko ha kovi kiate kinautolu — ko Sihova ia mei he Ta‘ehāmai.

⁴Fanongo ki he folofola ‘a Sihova, ‘a e fale ‘o Sēkope, mo e ngaahi fāmili kotoa pē ‘o e fale ‘o ‘Isileli;

⁵Ko e folofola eni ‘a Sihova, Ko e hā ha kovi na‘e ‘ilo ‘e ho‘omou ngaahi kui ‘iate au, ‘a ia kuo nau fakamama‘o ai meiate au, ‘o muimui ki he muna, ‘o nau hoko ai ko e koto muna?

⁶Pea na‘e ‘ikai te nau pehē, Kofa‘ā ‘a Sihova ‘a ia ne ne ‘ohake kitautolu mei ‘Isipite, na‘e taki kitautolu ‘i he Toafa, ko e fonua mamate mo feluoluoki, ko e fonua mōmoa, pea ko e ‘ata-‘o-mate, ko e fonua ‘oku ‘ikai ke ‘alu ai ha taha, pea ‘oku ‘ikai nofo ai ha tangata?

⁷Ka na‘a ku ‘omi kimoutolu ki ha fonua ngoue‘anga, ke kai hono fua mo hono mahu; ka ko ho‘omou hū leva ki hoku fonua, pea mou ‘uli‘i, pea kuo mou ngaohi hoku tofi‘a ko e me‘a ke fakalili‘a ki ai.

⁸Na‘e ‘ikai ke pehē ‘e he kau taula‘eiki, Kofa‘ā ‘a Sihova? pea ko kinautolu na‘e ngāue ‘i he lao na‘e ‘ikai te nau ‘ilo au: pea ko e kau tauhi na‘a nau talangata‘a kiate au, pea ko e kau palōfita na‘a nau palofisai ‘ia Peali, pea nau muimui ki he ngaahi me‘a ‘oku ‘ikai ‘aonga.

⁹Ko ia, ‘oku ou kei fakamaau mo kimoutolu — ko Sihova ia mei he Ta‘ehāmai — pea te u fakamaau mo e fānau ‘a ho‘omou fānau.

¹⁰He ke mou laka atu ki he ngaahi motu ‘o Kītimi, ‘o vakai; pea fekau atu ki Keta, ‘o tokanga lelei; ‘o vakai pe kuo ‘i ai ha ngaahi me‘a pehē.

¹¹Kuo fetongi koā ‘e ha kakai honau ‘otua, neongo ko e ‘ata‘i ‘otua kinautolu? Ka ko hoku kakai kuo nau fetongi honau lāngilangi‘anga ‘aki ha me‘a ‘oku ‘ikai ‘aonga.

¹²Mou tumu, ‘a e ngaahi langi, ‘i he me‘a ni; ‘io, mou fakalilifu mo mo‘utāfu‘ua — ko Sihova ia mei he Ta‘ehāmai.

¹³He ‘oku lōua ‘a e kovi ‘oku fai ‘e hoku kakai; kuo nau li‘aki au ko e fauniteni ‘o e vai mo‘ui, kae foa lepa ma‘anautolu; ko e ngaahi lepa maumau, ‘a ia ‘e ‘ikai te nau Matānaki ha vai.

¹⁴Ko e pōpula koā ‘a ‘Isileli? pe ko e tupu pehē ‘i ‘api? Ko e hā ē kuo ngaohi ia hangē ha vete?

¹⁵Na‘e kālou ‘a e fanga laione kiate ia, ‘o nau tuku atu honau le‘o: pea kuo nau ngaohi hono fonua ko e koto maumau; kuo tutu hono ngaahi kolo, ‘o ‘ikai lava ha nofo ai.

¹⁶Ko e ha‘a Mēfisi foki, mo e ha‘a Tapanesi, kuo nau keikeina taha ‘a e lau ‘o ho ‘ulu.

¹⁷‘Ikai na‘e ‘omi ia kiate koe ‘e koe, ‘i ho‘o li‘aki ‘a Sihova ko ho ‘Otua, ‘i he taimi ‘oku ne fai ho taki ‘i he hala?

¹⁸Pea ko eni, ko e hā ‘au ‘oku tupu ai ho‘o fou ‘i he hala ki ‘Isipite, ke inu ‘a e vai ‘o Naila? Pea ko e hā ‘au ke tupu ai ho‘o fou ‘i he hala ki ‘Āsilia, ke inu ‘a e vai ‘o e Vaitafe?

¹⁹‘Oku tautea koe ‘e ho‘o kovi, pea ‘oku akonaki‘i koe ‘e ho‘o ngaahi holomui: pea mou ‘ilo ‘o vakai ko e me‘a kovi mo ifo tamala ho‘o li‘aki ‘a Sihova ko ho ‘Otua, pea ke ta‘eha manavahē kiate au — ko e folofola ia mei he Ta‘ehāmai ‘a ‘Ātonai Sihova Sāpaoti.

²⁰Seuke, talu mei tuai mo ho‘o maumau ho‘o ‘ioke,[2] mo motuhi ho‘o ngaahi ha‘i; pea na‘a ke pehē, ‘E ‘ikai te u ngāue; ka ‘i he ngaahi funga mā‘olunga kotoa pē, pea ‘i he lolo ‘akau mata fua pē, ko koe ena ‘oku ke tokoto ke fai fe‘auaki.

²¹Ka na‘a ku tō koe ko e vaine ‘eiki, ko e hako fakatou nge‘esi fua pē; pea fēfē fua ho‘o liliu ‘o laku mai kiate au ‘a e ngaahi lito kovi ‘o vaine kehe?

²²He neongo ho‘o kaukau ‘aki ‘a e sota, mo fakalahi ho‘o sopu,[3] kei ma‘uma‘utunga pē ho‘o kovi ‘i hoku ‘ao — ko ‘Ātonai Sihova ia mei he Ta‘ehāmai.

²³Fēfē ho‘o lava ke lau, Kuo ‘ikai te u muimui ki he kau Peali? Vakai ho hala na ‘i he tele‘a, ke ke ‘ilo ‘a e me‘a kuo ke fai, ‘a e kāmeli fefine ‘oku lele holo ‘o fehauhau‘aki ‘i ho ngaahi hala na.

²⁴Ko e ‘asi hehengi maheni mo e toafa ko ē,[4] ka hoko hono taimi lala ‘oku ne fakananamu ‘a e matangi; ko hai ‘e lava ke ta‘ofi ‘ene holi? Ko kinautolu ‘oku kumi ki he manu fefine, ‘e ‘ikai te nau ongosia fai; ka hoko hono māhina, te nau ‘ilo ia.

²⁵Ta‘ofi ho va‘e mei he ‘alu ta‘esū, mo ho u‘a mei he fie inua. Ka na‘a ke tali, ‘E ‘ikai lava: ‘ikai; he kuo u ‘ofa ki he muli, pea ko kinautolu te u muimui ki ai.

²⁶Hangē ko e mā ‘a e kaiha‘a ‘oka ma‘u, ‘oku pehē ‘a e mā ‘a e fale ‘o ‘Isileli; ko kinautolu, ‘a honau ngaahi tu‘i, ‘a honau hou‘eiki, mo honau ngaahi taula‘eiki, pea mo honau kau palōfita;

²⁷he‘enau pehē ki he ‘akau, Ko ‘eku tamai koe; pea ki he maka, Ko koe na‘e fā‘ele‘i au: he kuo nau fuli mai honau tu‘a, ‘o ‘ikai honau mata: ka ki he taimi ‘o ‘enau kovi ‘oku nau pehē, Tu‘u, ‘o fakahaofi kimautolu.

²⁸Ka kofa‘ā ho ngaahi ‘otua ‘a ia na‘a ke ngaohi ma‘a u? Ke tu‘u hake ‘a kinautolu, ‘o kapau te nau lava ke fakahaofi koe ‘i he taimi ‘o ho‘o kovi: he hangē ko e lau ‘o ho‘o ngaahi kolo, ‘e Siuta, ‘oku pehē ‘a e lau ‘o ho ngaahi ‘otua.

²⁹Ko e hā ‘oku mou tangi ai ke fakamaau mo au? kuo mou angatu‘u kotoa pē kiate au — ko Sihova ia mei he Ta‘ehāmai.

³⁰Kuo ta‘e‘aonga ‘eku taa‘i ho‘omou fānau: kuo ‘ikai te nau tali ‘a e akonaki; kuo keina ‘e ho‘omou heletā ‘a ho‘omou kau palōfita, hangē ha laione fekai.

³¹‘a e toki to‘utangata na! mou tokanga‘i ‘a e folofola ‘a Sihova. Ko e toafa au ki ‘Isileli? pe ko e fonua po‘uli ‘aupito? Ko e hā ‘oku lau ai ‘e hoku kakai, ‘o pehē, ‘Oku mau ‘alu fa‘iteliha pē; ‘e ‘ikai te mau toe ha‘u kiate koe?

³²‘E ngalo ‘i ha ta‘ahine ‘ene teunga, pe ngalo ‘i ha polo‘i hono no‘o? ka kuo ngalo au ‘i hoku kakai ‘o ‘aho lahi ta‘emalaua.

³³Hono ‘ikai mālie ho‘o le‘ei ho hala ke kumi ‘ofa! ko ia foki ‘oku ke fakamaheni ho ngaahi ‘alunga mo e ngaahi kovi.

³⁴Ko e ngaahi tapa ‘o ho kofu foki ‘oku ‘ilonga ai ‘a e toto ‘o e ngaahi laumālie ‘o si‘i masiva ta‘ehalaia: tala‘ehai na‘a ke ma‘u kinautolu ‘oku nau hae fale, ka na‘a ke fai ‘i he funga ‘o e me‘a kotoa ko ē.[5]

³⁵Ka ‘oku ke pehē, Tū ‘oku ou ‘atā; kuo pau kuo foki hono houhau meiate au. Ko au eni te ta hopo mo koe, koe‘uhi ko ho‘o pehē, Kuo ‘ikai te u angahala.

³⁶Ko e hā ‘oku ke fu‘u lele holo ai ke le‘ei ho founga? Te ke maa‘i ‘a ‘Isipite foki, ‘o hangē ko ho‘o maa‘i ‘a ‘Āsilia.

³⁷Te mou ha‘u mei he me‘a ni foki ‘oku mou fefofoa‘i homou ‘ulu: he kuo fakatale‘i ‘e Sihova ho ngaahi falala‘anga, pea ‘e ‘ikai ha‘amou tu‘umālie mei ai.