Read KO E TOH TAPU KATOA TONGA KO SELEMAIA 20 Bible Online

KO SELEMAIA 20 - KO E TOH TAPU KATOA TONGA bible

KO SELEMAIA 20

¹PEA ko Pāsua foha ‘o ‘Īmeli ko e taula‘eiki, pea ko e ‘ōfisa tu‘umu‘a ‘i he fale ‘o Sihova, na‘a ne fanongo kia Selemaia ‘oku ne fai ‘oku ne ngaahi palofisai ko ia.

²Pea taa‘i ‘e Pāsua ‘a Selemaia ko e palōfita, ‘o ne tuku ia ki he ‘akau ki‘i, ‘a ia na‘e ‘i he matapā ‘Olunga ‘o Penisimani, ‘a ia ‘oku ‘i he fale ‘o Sihova.

³Pea pongipongi hake na‘e fakahū mai ‘e Pāsua ‘a Selemaia mei he ‘akau ki‘i. Toki lea ki ai ‘a Selemaia, ‘o pehē, Kuo ‘ikai fakahingoa koe ‘e Sihova ko Pāsua, ka ko Makoa-misapipi (‘Ākilotoa-he-ilifia).

⁴He ko e folofola eni ‘a Sihova, Ko au eni ‘oku ou ngaohi koe ko e ilifia‘anga kiate koe, pea ki ho kau ‘ofa‘anga kotoa pē; pea te nau tō ‘i he heletā ‘a honau ngaahi fili, pea ko ho‘ou mata ‘e sio ki ai: pea te u tuku ‘a Siuta kātoa ki he nima ‘o e Tu‘i Pāpilone, pea te ne taki pōpula kinautolu ki Pāpilone, pea te ne tāmate‘i kinautolu ‘aki ‘a e heletā.

⁵Pea te u ‘atu ‘a e koloa kotoa ‘o e kolo ni, mo e me‘a kotoa kuo ne ma‘u ‘i he‘ene ngāue, mo ‘ene ngaahi me‘a mahu‘inga, mo e ngaahi fokotu‘unga koloa ‘a e ngaahi Tu‘i Siuta, ‘io, te u ‘atu ia ki he nima ‘o honau ngaahi fili, pea te nau vete kinautolu, ‘o puke kinautolu, ‘o fetuku ki Pāpilone.

⁶Pea ko koe, Pāsua, mo ho kau nofo‘anga kotoa pē, te mou ‘alu pōpula; pea te ke a‘u ki Pāpilone, pea ko e potu ko ia te ke pekia ai, pea ko e potu ko ia ‘e tanu ai koe, mo ho kau nofo‘anga kotoa pē, ‘a ia kuo ke palofisai loi ki ai.

⁷‘E Sihova, na‘a ke fiemua‘i au, pea u tō; na‘a ke hanga ‘o puke au, pea ke lava: ko e ‘aho kotoa pē ‘oku ou nofo ko e manukia, ‘oku luki kiate au hono kotoa ‘o e kakai.

⁸He talu ‘eku kamata lea mo e pau ke u tangi tokoni; mo e pau ke u malanga‘aki ‘a e fakamālohi mo e fa‘ao: seuke, ko e folofola ‘a Sihova kuo hoko ko e me‘a ke manuki‘i ai au, mo ‘iohoekina ‘i he ‘aho kotoa pē.

⁹Pea ka u ka pehē, ‘E ‘ikai te u toe hu‘ekina ia, pea ‘e ‘ikai te u toe lea ‘i hono huafa, toki hoko ia ‘i hoku loto ‘o hangē ko e afi vela kuo loki ‘i hoku hui, pea ‘oku ou fiu ‘i he fakama‘uma‘u au, ‘o ‘ikai te u malava.

¹⁰He ne u fanongo ki he mumuhu ‘a e tokolahi, ko e ilifia na‘e takatakai. “Fakahā ki he pule‘anga! ‘io, tau fakahā ki he pule‘anga;” ko hoku kaume‘a fafale ia kotoa pē, ‘a ia ‘oku nau lama ē ha‘aku humu: “hei‘ilo ‘e lava hono fiemua‘i, pea tau toki ikuna ia, pea tau sauni ‘a e me‘a kuo ne fai kiate kitautolu.”

¹¹Ka ‘oku ‘iate au ‘a Sihova, hangē ha helo fakangeingei: ko ia ‘e humu hoku kau fakatanga, ‘o ‘ikai te nau lava ‘enau me‘a: ‘e mātu‘aki fakamaa‘i kinautolu ‘aki ha mā ta‘engata, ‘e ‘ikai mangalo; koe‘uhi na‘e ‘ikai te nau fai poto.

¹²‘Io, Sihova Sāpaoti ē, ‘a e ‘Afiona ‘oku ke sivi ‘a e mā‘oni‘oni, ‘oku ke ‘afio‘i ‘a e kofuua mo e loto, tuku ke u sio ki ho‘o fai ha sauni kiate kinautolu; he kuo u tala ‘eku me‘a kiate koe.

¹³Hiva kia Sihova, fakamālō kia Sihova: he ‘oku ne hamusi ‘a e mo‘ui ‘a si‘i masiva mei he nima ‘o e kau faikovi.

¹⁴Ke mala‘ia ‘a e ‘aho na‘e fanau‘i ai kita: ‘a e ‘aho na‘e fā‘ele‘i ai au ‘e he‘eku fa‘ē: ke ‘oua na‘a hoko ia ko e ‘aho monū‘ia.

¹⁵Ke mala‘ia ‘a e tangata na‘e ‘omi ‘a e ongoongo ki he‘eku tamai, ‘o pehē, Kuo fanau‘i hao foha; ‘o mātu‘aki fakafiefia‘i ia.

¹⁶Ke hoko ‘a e tangata ko ia ke hangē ko e ngaahi kolo na‘e fulihi ‘e Sihova, ta‘eha‘ane mamae: ke ne fanongo ki he tangi ‘oiauē pongipongi, mo e kaila tau ho‘atā;

¹⁷koe‘uhi na‘e ‘ikai te ne tāmate‘i au ‘oku ou kei ‘i he fatu; kae hoko ‘eku fa‘ē ko hoku fonua, pea feitama hono fatu ‘o ta‘engata.

¹⁸Koe‘uma‘aki ‘eku hū mai mei he manava, ke mamata pē ki he ongosia mo e mamahi, pea ke ‘osi hoku ngaahi ‘aho ‘i he mā?