Read KO E TOH TAPU KATOA TONGA KO SELEMAIA 21 Bible Online

KO SELEMAIA 21 - KO E TOH TAPU KATOA TONGA bible

KO SELEMAIA 21

¹KO E folofola na‘e hoko kia Selemaia meia Sihova, ‘i he taimi na‘e fekau kiate ia ‘e Kingi Setekaia ‘a Pāsua foha ‘o Malakaia, mo Sefanaia foha ‘o Ma‘aseia ko e taula‘eiki, ke lea ‘o pehē,

²Huhū mu‘a kia Sihova ma‘atautolu; he ‘oku fai tau kiate kitautolu ‘e Nepukanesa ko e Tu‘i Pāpilone: hei‘ilo ‘e fai ma‘atautolu ‘e Sihova, ‘o taau mo ‘ene fu‘u ngāue fakaofo ko ē, kae ‘alu hake ia meiate kitautolu.

³Pea tali ‘e Selemaia kiate kinautolu: Ko eni ‘a e lea te mou fai kia Setekaia, Ko e folofola eni ‘a Sihova ko e ‘Otua ‘o ‘Isileli:

⁴Ko au eni ‘oku ou fakafoki ‘a e mahafu ‘oku ‘i homou nima, ‘a ia ‘oku mou fai tau ‘aki ‘i tua‘ā ki he Tu‘i Pāpilone, mo e kau Kalitia ‘oku fai ke ha‘o kimoutolu; pea te u fakatefua kinautolu ‘i loto kolo ni.

⁵Pea ‘oku ou fai tau kiate kimoutolu ‘e au ‘aki ‘a e nima kuo mafao mo e nima mālohi, pea ‘i he ‘ita, mo e houhau, mo e tuputāmaki lahi.

⁶Pea te u taa‘i ‘a e nofo he kolo ni, ‘a e tangata mo e manu fakatou‘osi: te nau mate ‘i ha fu‘u mahaki faka‘auha.

⁷Pea hili ia — ko Sihova eni mei he Ta‘ehāmai — te u tuku ‘a Setekaia ko e Tu‘i Siuta, pea mo ‘ene kau tamaio‘eiki, pea mo e kakai, kaekehe ‘a kinautolu ‘i he kolo ni ‘oku toe mei he mahaki faka‘auha, mei he heletā, pea mei he honge — te u tuku kinautolu ki he nima ‘o Nepukanesa ko e Tu‘i Pāpilone, ‘io, ki he nima ‘o honau ngaahi fili, mo e nima ‘o e kakai ‘oku kumi ki he‘enau mo‘ui: pea te ne taa‘i kinautolu ‘aki ‘a e mata ‘o e heletā; ‘e ‘ikai te ne mamae kiate kinautolu, pea ‘e ‘ikai te ne lolou, pea ‘e ‘ikai te ne faka‘atu‘i.

⁸Pea ko ho‘o lea ki he kakai ni ‘e pehē, Ko e folofola eni ‘a Sihova: Ko au eni ‘oku ou tuku ‘i homou ‘ao ‘a e hala ki he mo‘ui mo e hala ki he mate.

⁹Ko ia te ne nofo ‘i he kolo ni te ne mate ‘i he heletā, mo e honge, mo e mate faka‘auha; ka ko ia te ne hū kitu‘a, ‘o tō ki he kau Kalitia ‘oku ‘ākolo‘i kimoutolu, te ne ‘ave ‘ene mo‘ui ma‘ane vete.

¹⁰He kuo hanga hoku mata ki he kolo ni ke kovi, ‘o ‘ikai ke lelei — ko Sihova ia mei he Ta‘ehāmai — ‘e tuku ia ki he nima ‘o e Tu‘i Pāpilone, pea te ne fakamomofi ‘aki ‘a e afi.

¹¹Pea ko e me‘a ki he fale ‘o e Tu‘i Siuta, mou fanongo ki he folofola ‘a Sihova:

¹²Fale ‘o Tēvita ē, ko e folofola eni ‘a Sihova, Fai pongipongi ‘a e fakamaau, pea hamusi si‘i ngaohikovia mei he nima ‘o e fakamālohi, na‘a pā atu ‘eku houhau hangē ha afi, ‘o vela ta‘emafu‘ifu‘i, koe‘uhi ko e kovi ho‘omou fai anga.

¹³Ko au eni ‘oku ou fili ‘aki koe, si‘i fefine nofo[33] he tele‘a, he makatu‘u ‘o e toafa — ko Sihova ia mei he Ta‘ehāmai — ‘a e fa‘ahinga ‘oku mou lau, Ko hai tū ‘e lava ke ‘alu hifo kiate kitautolu? pea ko hai tū ‘e lava ke hū ki hotau ngaahi nofo‘anga?

¹⁴‘Ā, te u tautea kimoutolu, ‘o taau mo e fua ‘o ho‘omou fai anga — ko Sihova ia mei he Ta‘ehāmai — pea te u tafu ha afi ‘i hono vao, ‘a ia te ne keina hono feitu‘u kotoa takatakai,