Read KO E TOH TAPU KATOA TONGA KO SELEMAIA 22 Bible Online

KO SELEMAIA 22 - KO E TOH TAPU KATOA TONGA bible

KO SELEMAIA 22

¹KO E folofola eni ‘a Sihova, ‘Alu hifo ki he fale ‘o e Tu‘i Siuta, pea ke fai ai ‘a e lea ko eni, ‘io, te ke pehē,

²Fanongo ki he folofola ‘a Sihova, ‘a e Tu‘i Siuta, ‘oku ‘afio ‘i he taloni ‘o Tēvita, ‘a e ‘afiona mo ho‘o kau tamaio‘eiki, pea mo ho kakai na ‘oku hū mai ‘i he ngaahi matapā ni.

³Ko e folofola eni ‘a Sihova: Fai ‘a e fakalao mo e totonu, pea hamusi si‘i ngaohikovia mei he nima ‘o e fakamālohi; pea ‘oua ‘e fai ha kovi pe ha fakamamahi ki he ‘āunofo, ki he tamai mate, pe ki he uitou, pea ‘oua ‘e lilingi ‘a e toto ‘o e ta‘ehalaia ‘i he potu ni.

⁴He kapau te mou mātu‘aki fai ‘a e me‘a ko ia, pea ‘e hū ‘i he ngaahi matapā ‘o e fale ni ha ngaahi tu‘i ‘oku fetongi ‘a Tēvita ‘i hono taloni, ‘oku nau heka sāliote mo e hoosi, ‘a ia mo ‘ene tamaio‘eiki mo hono kakai.

⁵Ka ‘o kapau ‘oku ‘ikai te mou fakaongo ki he ngaahi lea ni, ‘oku ou fuakava ‘iate au ‘e hoko ‘a e fale ni ko e koto ka‘anga — ko Sihova ia mei he Ta‘ehāmai.

⁶He ko eni ‘a e folofola ‘a Sihova ki he fale ‘o e Tu‘i Siuta: Ko ha Kiliati koe kiate au, ko ha tumutumu ‘o Lepanoni: tala atu, te u ngaohi koe ko e fonua lala, koni kolo ta‘eha nofo ai.

⁷Pea te u fakanofo ha ni‘ihi ke ngaohi koe, ko e kau faka‘auha, takitaha mo hono nāunau: pea te nau tā ‘a e lelei ‘o ho ngaahi sita, ‘o lī ki he afi.

⁸Pea ‘e laka ofi ki he kolo ni ha ngaahi kakai lahi, pea te nau lea ‘a ē ki hē, ‘o pehē, Ko e hā kuo fai pehē ai ‘e Sihova ki he fu‘u kolo ni?

⁹Pea te nau tali, Koe‘uhi ā na‘a nau li‘aki ‘a e kovinānite ‘a Sihova ko honau ‘Otua, pea nau lotu ki he ngaahi ‘otua kehe, ‘o nau tauhi ki ai.

¹⁰‘Oua te ke tēngihia ‘a e pekia, Pea ‘oua te ke maumau‘ia ai: Fai mu‘a ho‘o tangi koe‘uhi ko ia kuo ‘alu;[34] He ‘e ‘ikai te ne toe foki mai, Pe sio he fonua na‘e fanau‘i ai.

¹¹He ko eni ‘a e folofola ‘a Sihova kia Sālumi[35] foha ‘o Siosaia ko e Tu‘i Siuta, ‘a ia na‘a ne fetongi ‘ene tamai ko Siosaia, ‘o ne ‘alu atu mei he potu ni:

¹²‘E ‘ikai te ne toe foki mai; ka ko e potu kuo taki pōpula ia ki ai, ko e potu ia te ne pekia ai, pea ko e fonua ni ‘e ‘ikai te ne toe sio ki ai.

¹³‘Oiauē ia ‘oku langa hono fale ‘i he ta‘etotonu, ‘O ‘ai hono ngaahi loki ‘olunga ‘i he maumau konisitūtone! ‘Oku ne fakangāue‘i hono kaungā‘api ta‘etotongi, Pea ko e fua ‘o ‘ene ngāue ‘oku ‘ikai te ne ‘ange:

¹⁴He‘ene pehē, Te u langa mo‘oku ha fale ‘oku ‘amo atu, Mo e ngaahi loki ‘olunga ‘oku fu‘u ‘atā, Pea ‘oku ne ‘ai ke lahi hono tupa, Pea ‘oku ‘aofi ‘aki ‘a e sita, Pea ‘oku vali kulokula.

¹⁵‘Oku ke ngali tu‘i koā koe‘uhi ko ho‘o veipā he ‘akau sita? Ko ho‘o ‘eiki na, ‘ikai na‘a ne kai mo inu, mo fai ‘a e fakalao mo e totonu? ko e taimi ko ia na‘a ne tu‘umālie.

¹⁶Na‘a ne fakamaau ‘a e me‘a ‘a e tōkilalo mo e masiva; ko e taimi ko ia na‘e lelei. ‘Ikai ko e fai pehē ko e ‘ilo‘i ‘o‘oku? ko Sihova ia mei he Ta‘ehāmai.

¹⁷Ka ko e me‘a pē ‘oku hanga ki ai ho fofonga mo ho loto, ke ma‘u ha‘o koloa, pea ke lilingi ‘a e toto ‘o e ta‘ehalaia, pea ke fai ha fakamālohi mo ha have‘i.

¹⁸Ko ia, ko e folofola eni ‘a Sihova kia Sihoiakimi foha ‘o Siosaia ko e Tu‘i Siuta: ‘E ‘ikai fai hano tangilāulau, ‘Oiauē si‘oku tokoua! pē, ‘Oiauē si‘oku tuofefine! ‘e ‘ikai fai hano tangilāulau ‘o pehē, ‘Oiauē hoku tu‘a‘ofa ‘eiki! pē, ‘Oiauē ‘a e mole hono hau!

¹⁹Ko hono tanu ko e tanu ‘o ha ‘asi, ‘a ia ‘oku toho ‘o li‘aki mama‘o mo e ngaahi matanikolo ‘o Selusalema.

²⁰Si‘i fefine, ‘alu hake ki Lepanoni, ‘o ‘ioho; Pea ofa‘aki ho le‘o ‘i Pēsani: Pea ‘ioho mei ‘Apalemi; He kuo maumau kotoa ho kau ‘ofa‘anga.

²¹Na‘a ku lea kiate koe ‘i ho‘o tu‘umālie; na‘a ke tali, ‘E ‘ikai te u tokanga. Ko ho ‘alunga ia talu ho‘o talavou, ‘a e ‘ikai te ke fakaongo ki hoku le‘o.

²²Ko ho kau tauhi kotoa ‘e keikeina ‘e he matangi, pea ko e kakai ‘oku ‘ofa kiate koe te nau ‘alu pōpula: seuke, te ke toki mā, ‘io, ‘e fakamaa‘i koe ‘i ho‘o fu‘u kovi.

²³Si‘i fefine nofo Lepanoni, ‘O ngaohi ho pununga ‘i he sita, ‘E nifi koā ho‘o māpuhoi ‘oka hoko mai ho‘o ngaahi mamahi, Ko e langā hangē ha fefine fā‘ele!

²⁴Tangi ‘eku mo‘ui — ko Sihova ia mei he Ta‘ehāmai — neongo ko e mama sila ‘i hoku nima to‘omata‘u ‘a Konaia foha ‘o Sihoiakimi ko e Tu‘i Siuta, ka te u to‘o koe mei ai;

²⁵‘o tuku ki he nima ‘o e kakai ‘oku kumi ki ho‘o mo‘ui, pea ki he nima ‘o e kakai ‘oku ke manavahē ki ai; ‘io, ki he nima ‘o Nepukanesa ko e Tu‘i Pāpilone, pea ki he nima ‘o e kau Kalitia.

²⁶Pea te u lī koe, mo ho‘o fa‘ē na‘e fanau‘i koe, ki ha fonua kehe, ‘a ia na‘e ‘ikai te mou tutupu ai: pea te mou pekia ‘i he potu ko ia.

²⁷Pea ko e fonua ‘a ia ‘oku holi si‘enau mo‘ui ke foki ki ai, ko e potu ko ia ‘e ‘ikai te nau foki ki ai.

²⁸He ko e pakula‘ā ke li‘aki noa ‘a e tangata ni ko Konaia? Ko e ipu ia ke ta‘efai ki ai ha manako? Ko e hā ‘oku lī ai ia mo hono hako, ‘O fakapuna ki ha fonua ‘oku ‘ikai te nau ‘ilo ki ai?

²⁹Fonua, Fonua, Fonua, fanongo ki he folofola ‘a Sihova.

³⁰Ko eni ‘a e folofola ‘a Sihova. Tohi ‘a e tangata ni ko e ta‘e-ha-fānau, ko e tangata ‘e ‘ikai monū‘ia lolotonga ene mo‘ui: e ‘ikai monū‘ia ha tangata mei hono hako, he nofo ‘i he taloni ‘o Tēvita, pe ha‘ane toe pule ki Siuta.