Read KO E TOH TAPU KATOA TONGA KO SELEMAIA 25 Bible Online

KO SELEMAIA 25 - KO E TOH TAPU KATOA TONGA bible

KO SELEMAIA 25

¹KO E folofola na‘e tō kia Selemaia, ‘o kau ki he kakai Siuta kātoa, ‘i hono fā ‘o e ta‘u ‘o Sihoiakimi foha ‘o Siosaia ko e Tu‘i Siuta; ko e ‘uluaki ta‘u ia ‘o Nepukanesa ko e Tu‘i Pāpilone.

²Ko e folofola foki na‘e ‘a‘au ‘e he palōfita ko Selemaia ki he kakai Siuta kātoa, pea ki he nofo Selusalema kotoa, ‘o pehē:

³Talu ‘a e hongofulu mā tolu ta‘u ‘o Siosaia foha ‘o ‘Āmoni ko e Tu‘i Siuta, ‘o a‘u mai ki he ‘aho ko eni, ko e ta‘u ‘e uofulu mā tolu, mo e hoko ‘a e folofola ‘a Sihova kiate au, mo ‘eku lea kiate kimoutolu, ‘o u ‘ā hengihengi ‘o lea; kae ‘ikai te mou tali.

⁴Pea fekau atu kiate kimoutolu ‘e Sihova ‘ene fu‘u kau sevāniti ko e kau palōfita, ‘o ne ‘ā hengihengi ‘o fekau atu; kae ‘ikai te mou tali, pea na‘e ‘ikai te mou fokotu‘u telinga ke fanongo.

⁵Na‘a nau pehē atu, Mou tafoki mu‘a takitaha mei hono ‘alunga kovi, pea mei he kovi ‘o ho‘omou ngaahi fai anga, pea te mou toki nofo ‘i he kelekele ‘a ia na‘e foaki ‘e Sihova kiate kimoutolu, pea ki ho‘omou ngaahi kui, talu mei mu‘a ‘o fai ‘o ta‘engata.

⁶Pea ‘oua te mou muimui ‘otua kehe, ke tauhi kiate kinautolu, pea ke lotu ki ai, ke ‘oua te mou faka‘ita ‘aki au ‘a e ngāue ‘a homou nima; ‘o ‘oua na‘a ku fai ha kovi kiate kimoutolu.

⁷Ka na‘e ‘ikai te mou fakaongo kiate au — ko Sihova ia mei he Ta‘ehāmai — ko e fai ke fakatupu ‘eku ‘ita ‘aki ‘a e ngāue ‘a homou nima; pea mou kovi ai.

⁸Ko hono ō ia kuo folofola peheni ‘a Sihova Sāpaoti: Ko e me‘a ‘i he ‘ikai te mou fakaongo ki he‘eku ngaahi lea,

⁹ko au eni ‘oku ou fekau atu ke ma‘u mai ‘a e ngaahi fa‘ahinga kotoa pē ‘o e tokelau — ko Sihova ia mei he Ta‘ehāmai — pea ki he‘eku sevāniti ko Nepukanesa ko e Tu‘i Pāpilone, ke u ‘omi kinautolu ki he fonua ni, pea ki he kakai ‘oku nofo ai, pea ki he ngaahi pule‘anga takatakai; ke u mōifua kinautolu, pea ke u ngaohi kinautolu ko e me‘a ke fai ai ha ofo, mo ha faka‘ise‘isa, ‘io, ko e koto ka‘anga ta‘engata.

¹⁰Pea te u ‘ai ke mate meiate kinautolu ‘a e le‘o ‘o e fiefia, mo e le‘o ‘o e mavava, ‘a e le‘o ‘o e ‘eiki ta‘ane, mo e le‘o ‘o e ta‘ahine, ‘a e ongo ‘a e maka momosi, mo e ulo ‘a e maama.

¹¹Pea ‘e hoko ‘a e fonua ni kātoa ko e ka‘anga, mo e me‘a ke fai ai ha ofo; pea ‘e ngāue ‘a e ngaahi pule‘anga ni ki he Tu‘i Pāpilone, ‘o fitungofulu ta‘u.

¹²Pea ka kakato ‘a e fitungofulu‘i ta‘u, te u tautea ‘a e Tu‘i Pāpilone, mo e pule‘anga ko ia — ko Sihova ia mei he Ta‘ehāmai — koe‘uhi ko ‘enau faikovi, mo e fonua foki ‘o e kau Kalitia; ‘io, te u ngaohi ia ko e koto lala ‘o ta‘engata.

¹³Pea te u ‘omi ki he fonua ko ia ‘a e me‘a kotoa kuo u lea‘aki ke hoko ki ai, ‘io, ‘a e me‘a kotoa kuo tohi ‘i he tohi ni, ‘a ia kuo palofisai ‘aki ‘e Selemaia ki he ngaahi pule‘anga.

¹⁴He ‘e fakafatongia‘i kinautolu, ‘io, ‘a e fa‘ahinga ko ia foki, ‘eni pule‘anga lahi moni tu‘i mā‘olunga: pea te u totongi kiate kinautolu ke tuha mo ‘enau fai, mo e ngāue ‘a honau nima.

¹⁵He ko e folofola eni ‘a Sihova ko e ‘Otua ‘o ‘Isileli kiate au, ‘o pehē: To‘o mei hoku nima ‘a e ipu uaine — ‘a e tafulu ni — ‘o fakainu ‘aki ‘a e ngaahi pule‘anga kotoa ‘oku ou fekau atu koe ki ai.

¹⁶Pea te nau inu, ‘o tāsipesipa, ‘o nau sesele ko e me‘a ‘i he heletā ‘oku ou tuku atu ki honau lotolotonga.

¹⁷Pea u to‘o ‘a e ipu mei he nima ‘o Sihova, pea u fakainu‘aki ‘a e ngaahi pule‘anga, ‘a ia na‘e fekau atu au ki ai ‘e Sihova;

¹⁸‘a Selusalema, mo e ngaahi kolo ‘o Siuta, mo hono ngaahi tu‘i, mo hono hou‘eiki, ke ngaohi kinautolu ko e ka‘anga, ko e me‘a ke fai ai ha ofo, mo ha faka‘ise‘isa, mo ha kape; ‘o hangē ko ia he ‘aho ni;

¹⁹‘a Felo ko e Tu‘i ‘Isipite, mo ‘ene kau tamaio‘eiki, mo hono hou‘eiki, mo hono kakai kotoa;

²⁰mo e ngaahi fa‘ahinga kuo fefiofi, mo e ngaahi tu‘i ‘o e fonua ko ‘Usa, mo e ngaahi tu‘i ‘o e fonua ‘o e kau Filisitia, mo ‘Asikeloni, mo Kesa, mo ‘Ekiloni, mo e toe ‘o ‘Asitoti;

²¹‘a ‘Ītomi, mo Moape, mo Ha‘a ‘Āmoni,

²²mo e ngaahi Tu‘i Taia, mo e ngaahi Tu‘i Saitoni;

²³mo e ngaahi tu‘i ‘o e ngaahi motu mei he tu‘a tahi, ‘a Tētani, mo Teima, mo Pusa, mo e ha‘a Tele-tuliki-honau-kava;

²⁴mo e ngaahi Tu‘i ‘Ālepea, mo e ngaahi tu‘i ‘o e ngaahi fa‘ahinga fefiofi ‘oku nofo ‘i he toafa;

²⁵mo e ngaahi Tu‘i Sīmeli, mo e ngaahi Tu‘i ‘Īlami, mo e ngaahi Tu‘i Mītia;

²⁶mo e ngaahi tu‘i kehekehe ‘o tokelau, ‘a e ofi mo e mama‘o, hokohoko atu; pea mo e ngaahi pule‘anga kotoa ‘o māmani ‘oku ‘i he funga ‘o e kelekele: pea fakamuimui ‘e inu ‘e he Tu‘i Sēsaki.[40]

²⁷Pea te ke pehē kiate kinautolu, Ko e folofola eni ‘a Sihova Sāpaoti, ko e ‘Otua ‘o ‘Isileli; Mou inu ‘o konā ai, ‘o lua, ‘o tō, ‘o ‘oua ‘e toe tu‘u, ko e me‘a ‘i he heletā ‘oku ou fekau atu ki homou lotolotonga.

²⁸Pea kapau te nau fakafisi ke to‘o ‘a e ipu mei ho nima, ‘o inu, pea te ke pehē kiate kinautolu, Ko e folofola eni ‘a Sihova Sāpaoti: kuo pau te mou inu.

²⁹He ko au eni ‘oku ou kamata ke ngaohikovi‘i ‘a e kolo ‘oku ui‘aki hoku hingoa, pea ko e pehē ke mou hao kimoutolu? ‘E ‘ikai te mou ‘alu ta‘etautea: he te u ui kia Heletā ke tō ki he nofo kotoa ‘o māmani — ko Sihova Sāpaoti ia mei he Ta‘ehāmai.

³⁰Ko ia, te ke palofisai kiate kinautolu, ‘o fai‘aki ‘a e ngaahi lea ko eni, pea te ke pehē kiate kinautolu, ‘E kālou ‘a Sihova mei Taukakapa, pea te ne tuku atu hono le‘o mei hono ‘afio‘anga tapu; te ne mātu‘aki kālou ki hono loto‘ā sipi; te ne tali ‘aki ha tau‘a‘alo, ‘o hangē ko e kau mala kālepi, ki he kau nofo he māmani.

³¹‘E a‘u ha longoa‘a ki he ngata‘anga ‘o māmani; he ‘oku ai ha fakakikihi ‘a Sihova mo e ngaahi pule‘anga, ‘e talatalaaki‘i ‘e ia ‘a e kakano kotoa; ko e me‘a ki he kau angahala, te ne tuku kinautolu ki he heletā — ko Sihova ia mei he Ta‘ehāmai.

³²Ko e folofola eni ‘a Sihova Sāpaoti; Vakai, ko e kovi ē ‘e ‘alu mei he pule‘anga ki he pule‘anga, pea ‘e langa‘i hake ha fu‘u afā mei he ngaahi ngata‘anga ‘o māmani.

³³Pea ‘e fokotu‘utu‘u ‘a e tā ‘a Sihova ‘i he ‘aho ko ia mei he ngata‘anga ‘e taha ‘o māmani, ‘o a‘u ki hono ngata‘anga ‘e taha: ‘e ‘ikai tēngihia kinautolu, pea ‘e ‘ikai tānaki, pea ‘e ‘ikai tanu; te nau hoko ko e kinoha‘a pe ‘i he funga kelekele.

³⁴Tangi ‘oiauē, ‘a e kau tauhi sipi, pea ‘ioho; pea mou paniefua, ‘a e kau fotu ‘i he tākanga; he kuo kakato homou taimi ke tāmate‘i,[41] pea te u laiki kimoutolu, pea te mou tō hangē ha ipu mahu‘inga.[42]

³⁵Pea kuo mole ‘aupito ‘a e hola‘anga mei he kau tauhi, mo e hao‘anga mei he kau fotu ‘i he tākanga.

³⁶Sī! ko e ‘ioho ‘a e kau tauhi, mo e ‘oiauē ‘a e kau fatu ‘i he tākanga! he ‘oku faka‘auha ‘e Sihova ‘enau kaikai‘anga.

³⁷Pea kuo fakalongo ‘a e ngaahi loto‘ā malu ‘i he fotu mai ‘a e kakaha ‘o e houhau ‘o Sihova.

³⁸Kuo ne hanga ‘o li‘aki hono falenga,[43] hangē ha laione: seuke, kuo hoko honau fonua ko e me‘a ke fai ai ha ofo, ko e me‘a ‘i he kakaha ‘o e malaki na‘e fai, ‘io, ko e me‘a ‘i he kakaha hono houhau.