Read KO E TOH TAPU KATOA TONGA KO SELEMAIA 26 Bible Online

KO SELEMAIA 26 - KO E TOH TAPU KATOA TONGA bible

KO SELEMAIA 26

¹HE kamata‘anga ‘o e pule ‘a Sihoiakimi foha ‘o Siosaia ko e Tu‘i Siuta, na‘e hoko mai ‘a e folofola ko eni meia Sihova, ‘o pehē, Ko e folofola eni ‘a Sihova.

²Ke ke tu‘u ‘i he loto‘ā ‘i he fale ‘o Sihova, pea ke ke tala ki he ngaahi kolo ‘o Siuta, ‘oku hū mai ke fai ‘enau lotu ‘i he fale ‘o Sihova, ‘a e ngaahi lea kotoa ‘oku ou tu‘utu‘uni atu ke ke fai kiate kinautolu; ‘oua te ke li‘aki ha fo‘i lea.

³Hei‘ilo te nau tali, ‘o foki takitaha mei hono ‘alunga kovi; ka u fakatomala ‘i he kovi ‘oku ou fakakaukau ke fai kiate kinautolu koe‘uhi ko e kovi ‘enau ngaahi fai anga.

⁴Pea te ke pehē kiate kinautolu, Ko e folofola eni ‘a Sihova: Kapau ‘e ‘ikai te mou fakaongo kiate au, ke fou ‘i he‘eku lao, ‘a ia kuo u tuku ‘i homou ‘ao,

⁵mo fakaongo ki he lea ‘a hoku kau sevāniti ko e kau palōfita, ‘a ia na‘a ku fekau atu kiate kimoutolu, ‘o u ‘ā hengihengi ‘o fekau atu, ka na‘e ‘ikai te mou fakaongo;

⁶pea te u ngaohi ‘a e fale ni ke hangē ko Sailo,[44] pea ko e kolo ko ena te u tuku ko e me‘a ke kape ki ai ‘a e ngaahi pule‘anga kotoa ‘o māmani.

⁷Pea na‘e fanongo ‘a e kau taula‘eiki mo e kau palōfita mo e kakai kotoa kia Selemaia, ‘ene fai ‘a e ngaahi lea ko ia ‘i he fale ‘o Sihova.

⁸Pea ‘i he ‘osi fai ‘e Selemaia ‘ene lea‘aki ‘a e lea kotoa kuo tu‘utu‘uni ‘e Sihova ke ne fai ki he kakai kotoa, na‘e puke ia ‘e he kau taula‘eiki mo e kau palōfita mo e kakai kotoa, ‘o nau pehē, Kuo pau te ke mate.

⁹Ko e hā ‘oku ke palofisai ai ‘i he huafa ‘o Sihova, ‘o pehē, ‘E hoko ‘a e fale ni ‘o hangē ko Sailo, pea ‘e lala ‘a e kolo ni ‘o ‘ikai ha nofo ai? Pea na‘e fakatefua mai ‘a e kakai kia Selemaia ki he fale ‘o Sihova.

¹⁰Pea ‘i he fanongo ‘a e hou‘eiki Siuta ki he ngaahi me‘a ko ia, na‘a nau me‘a hake mei he fale ‘o e tu‘i ki he fale ‘o Sihova; ‘o nau nofo ‘i he hū‘anga ‘o e matapā ‘o Sihova, ‘a e matapā fo‘ou.

¹¹Pea tali ‘a e kau taula‘eiki mo e kau palōfita ki he hou‘eiki mo e kakai kotoa, ‘o pehē, Ko e tautea totonu ‘o e tangata ni ko e mate; he kuo ne palofisai ‘a e ngaahi me‘a ki he kolo ni, hangē ko ia kuo fanongo ki ai homou telinga.

¹²Pea tali ‘e Selemaia ki he hou‘eiki kotoa mo e kakai kotoa, ‘o pehē, Na‘e fekau au ‘e Sihova ke palofisai ki he fale ni mo e kolo ni, ‘o fai‘aki ‘a e ngaahi lea kuo mou fanongo ki ai.

¹³Pea ko eni, mou ngaohi ke lelei homou ngaahi ‘alunga mo ho‘omou ngaahi fai anga, pea fakaongo ki he le‘o ‘o Sihova ko homou ‘Otua; pea ‘e toki fakatomala ‘e Sihova ‘i he kovi na‘e tala ‘e hoko kiate kimoutolu.

¹⁴Pea ko e me‘a kiate au, vakai, ‘oku ou ‘i homou nima; mou fai kiate au ‘a e me‘a ‘oku hā lelei mo totonu kiate kimoutolu.

¹⁵Ka ke mou ‘ilo pau, kapau te mou hanga ‘o tāmate‘i au, ko ho‘omou fusi mai ‘a e mala ‘o e lingi toto tu‘unga‘a pē kiate kimoutolu, pea ki he kolo ni, mo e nofo ‘i ai: he kuo fekau mo‘oni au ‘e Sihova kiate kimoutolu, ke lea‘aki ‘i homou telinga ‘a e ngaahi lea kotoa ko ia.

¹⁶Pea tali ‘a e hou‘eiki mo e kakai kotoa ki he kau taula‘eiki mo e kau palōfita, ‘Oku ‘ikai totonu ke tautea ‘a e tangata ni ‘aki ‘a e mate; he kuo ne lea kiate kitautolu ‘i he huafa ‘o Sihova ko hotau ‘Otua.

¹⁷Pea tu‘u hake ha tu‘unga me‘a ko e ni‘ihi ‘i he kau mātu‘a ‘o e fonua, ‘o nau lea ki he fakataha kotoa ‘o e kakai, ‘o pehē,

¹⁸Ko Maika mei Molese na‘e fai palofisai ia ‘i he taimi ‘o Hesekaia ko e Tu‘i Siuta; pea na‘a ne lea ki he kau Siuta kotoa, ‘o pehē, Ko e folofola eni ‘a Sihova Sāpaoti: ‘E keli ‘a Saione hangē ha ngoue‘anga, pea ‘e hoko ‘a Selusalema koni ngaahi tuva maka, pea ko e mo‘unga ‘oku tu‘u ai ‘a e fale ‘e hoko ko e ngaahi mā‘olunga ‘i ha vao tātā.

¹⁹He na‘e momo‘i tāmate‘i ia ‘e Hesekaia ko e Tu‘i Siuta mo e kau Siuta? ‘Ikai na‘a ne ‘apasia kia Sihova, ‘o ne fai ke fakamokomoko ‘a e finangalo ‘o Sihova? pea na‘e fakatomala ai ‘e Sihova ‘i he kovi kuo ne tala ‘e hoko kiate kinautolu. Pea na‘a ‘iloange te tau fai ha fu‘u kovi ‘e tō ki he‘etau mo‘ui.

²⁰Pea na‘e ai mo ha tangata foki na‘e fai palofisai ‘i he huafa ‘o Sihova, ko ‘Ūlaia foha ‘o Sēmaia mei Kiliatisialimi; pea ko e palofisai na‘a ne fai ki he kolo ni pea ki he fonua ni na‘e tatau mātē mo e ngaahi lea ‘a Selemaia:

²¹pea ‘i he fanongo ‘e Kingi Sihoiakimi mo ‘ene kau helo mo e hou‘eiki ki he‘ene ngaahi lea, pea feinga ‘e he tu‘i ke tāmate‘i; ka ‘i he fanongo ki ai ‘a ‘Ūlaia, na‘a ne manavahē, ‘o ne hola ‘o ‘alu ki ‘Isipite.

²²Ka ka fekau atu ‘e Kingi Sihoiakimi ha tu‘unga tangata ki ‘Isipite, ‘a ‘Elinetane foha ‘o ‘Akepoa, pea ai mo e ni‘ihi na‘a nau ō mo ia ki ‘Isipite:

²³pea nau taki mai ‘a ‘Ūlaia mei ‘Isipite, ‘o ‘omi kia Kingi Sihoiakimi; ‘a ia na‘a ne taa‘i ia ‘aki ‘a e heletā, ‘o ne lī hono ‘anga‘anga ki he ngaahi fa‘itoka ‘o e kakai noa.

²⁴Ka na‘e kau mo Selemaia ‘a ‘Ahikami foha ‘o Sāfani, ke ‘oua te nau tuku ia ki he nima ‘o e kakai ke tāmate‘i.