Read KO E TOH TAPU KATOA TONGA KO SELEMAIA 27 Bible Online

KO SELEMAIA 27 - KO E TOH TAPU KATOA TONGA bible

KO SELEMAIA 27

¹‘I HE taimi ki mu‘a ‘o e pule ‘a Setekaia[45] foha ‘o Siosaia, ko e Tu‘i Siuta, na‘e hoko ‘a e folofola ko eni kia Selemaia meia Sihova, ‘e pehē, Ko e folofola eni ‘a Sihova kiate au:

²Ngaohi ma‘au ‘ani kafa moni ‘ioke, ‘o ‘ai ki ho kia;

³pea tuku atu[46] foki ki he Tu‘i ‘Ītomi, mo e Tu‘i Moape, mo e Tu‘i Ha‘a ‘Āmoni, mo e Tu‘i Taia, mo e Tu‘i Saitoni, ‘o fakafai ‘i he kau talafekau kuo omi ki Selusalema kia Setekaia ko e Tu‘i Siuta;

⁴pea te ke pōpoaki ‘iate kinautolu ki honau ngaahi ‘eiki takitaha, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli: Ko eni ‘a e lea te mou fai ki homou ‘eiki;

⁵Ko au ia kuo u ngaohi ‘a māmani, ‘a e tangata mo e manu ‘oku ‘i he funga fonua, ‘aki hoku ivi lahi, mo hoku nima kuo mafao; pea ‘oku ou foaki ia kiate ia ‘oku hā totonu kiate au.

⁶Pea ko eni kuo u tuku ‘a e ngaahi fonua ni ki he nima ‘o ‘eku sevāniti ko Nepukanesa, ko e Tu‘i Pāpilone; pea kuo u tuku foki ‘a e manu ‘o e vao ke nau tauhi kiate ia.

⁷Pea ko e ngaahi pule‘anga kotoa te nau tauhi kiate ia, pea ki hono foha, pea ki he foha ‘o hono foha, kae‘oua ke hokosia ‘a e taimi ‘o hono fonua ‘o‘ona foki, pea ‘e toki fakafatongia‘i ia ‘eni pule‘anga lahi, moni tu‘i mā‘olunga.

⁸Pea ‘ilonga ha kakai pe ha pule‘anga, ‘a ia ‘e ‘ikai te nau nofo kiate ia, ‘a Nepukanesa ko e Tu‘i Pāpilone, ‘io, ‘o ‘ikai te ne ‘ai hono kia ki he ‘ioke ‘a e tu‘i Pāpilone, te u tautea ‘a e kakai ko ia ‘aki ‘a e heletā, mo e honge, mo e mahaki faka‘auha — ko Sihova ia mei he Ta‘ehāmai — kae‘oua ke u faka‘osi kinautolu ‘aki hono nima.

⁹Pea ko kimoutolu, ‘oua te mou fakaongo ki homou kau palōfita, mo homou kau tongafisi, mo ho‘omou ngaahi misi, mo homou kau fai sausau, mo kau faituki, ‘a e fa‘ahinga ‘oku lea kiate kimoutolu, ‘o pehē, ‘E ‘ikai te mou hopoate ki he Tu‘i Pāpilone:

¹⁰he ‘oku palofisai loi kiate kimoutolu ‘e he fa‘ahinga ko ia, kae iku ki he hiki kimoutolu ke mama‘o mei homou kelekele; ‘io, ki he‘eku fakateka atu kimoutolu, ka mou ‘auha.

¹¹Ka ko e kakai ‘oku ‘ai hono kia ki he ‘ioke ‘a e Tu‘i Pāpilone, ‘o nofo ki ai, te u tuku ia ke nofo ‘i hono kelekele — ko Sihova ia mei he Ta‘ehāmai — pea te nau ngāue‘i ia mo nofo ki ai.

¹²Pea na‘a ku lea kia Setekaia ko e Tu‘i Siuta, ‘o tatau mo e ngaahi me‘a ko ia, ‘o pehē, ‘Ai homou kia ki he ‘ioke ‘a e Tu‘i Pāpilone, pea tauhi kiate ia mo hono kakai, ka mou mo‘ui.

¹³Koe‘uma‘ā ho‘omou mate, ‘a koe mo ho‘o kakai, ‘i he heletā mo e honge mo e mahaki faka‘auha, ‘o hangē ā ko e folofola ‘a Sihova ‘e hoko ki he pule‘anga ‘e ‘ikai tauhi ki he Tu‘i Pāpilone.

¹⁴Pea ‘oua te mou fakaongo ki he lau ‘a e kau palōfita, ‘a kinautolu ‘oku lea kiate kimoutolu, ‘o pehē, ‘E ‘ikai te mou hopoate ki he Tu‘i Pāpilone: he ‘oku palofisai loi kiate kimoutolu ‘a e fa‘ahinga ko ia.

¹⁵He tala‘ehai kuo u fekau atu kinautolu ‘e au — ko Sihova ia mei he Ta‘ehāmai — ka ‘oku palofisai loi ‘i hoku hingoa ‘e he fa‘ahinga ko ia; kae iku ki he‘eku fakateka atu kimoutolu, ‘o mou ‘auha, ‘a kimoutolu mo e kau palōfita ‘oku palofisai kiate kimoutolu.

¹⁶Na‘a ku lea foki ki he kau taula‘eiki mo e kakai ni kotoa, ‘o pehē, Ko e folofola eni ‘a Sihova: ‘Oua te mou fakaongo ki he lau ‘a homou kau palōfita, ‘i kinautolu ‘oku palofisai kiate kimoutolu, ‘o pehē; Vakai, ‘oku toe si‘i pea fakafoki mei Pāpilone ‘a e nāunau ‘o e fale ‘o Sihova: he ‘oku palofisai loi kiate kimoutolu ‘a e fa‘ahinga ko ia.

¹⁷‘Oua ‘e fakaongo kiate kinautolu; nofo ki he Tu‘i Pāpilone, ka mou mo‘ui; koe‘uma‘ā ke hoko ‘a e kolo ni ko e lala?

¹⁸Pea kapau ko e kau palōfita kinautolu, pea kapau ‘oku nau ma‘u ha folofola ‘a Sihova, ke nau hū mu‘a kia Sihova Sāpaoti, ke ‘oua na‘a a‘u ki Pāpilone ‘a e nāunau ‘oku toe ‘i he fale ‘o Sihova, pea ‘i he fale ‘o e Tu‘i Siuta, pea ‘i Selusalema.

¹⁹He ko e folofola eni ‘a Sihova Sāpaoti ‘o kau ki he ngaahi pou, pea ki he Tahi, pea ki he ngaahi Tu‘unga fakasāliote, pea ki he toenga ‘o e nāunau ‘oku toe ‘i he kolo ni, ‘a ia na‘e ‘ikai ke to‘o ‘e Nepukanesa ko e Tu‘i Pāpilone,

²⁰‘i he‘ene taki pōpula ‘a Sekonaia foha ‘o Sihoiakimi ko e Tu‘i Siuta mei Selusalema ki Pāpilone, pea mo e hou‘eiki kotoa ‘o Siuta mo Selusalema;

²¹he ko e folofola eni ‘a Sihova Sāpaoti, ko e ‘Otua ‘o ‘Isileli, ‘o kau ki he nāunau ‘oku toe ‘i he fale ‘o Sihova, mo e fale ‘o e Tu‘i Siuta, pea ‘i Selusalema:

²²‘E ‘ave pē ki Pāpilone, pea te nau ‘i ai ‘o a‘u ki he ‘aho te u ‘a‘ahi ai kiate kinautolu — ko Sihova ia mei he Ta‘ehāmai; pea te u toki fakahā‘ele kinautolu, mo fakafoki ki he fonua.