Read KO E TOH TAPU KATOA TONGA KO SELEMAIA 28 Bible Online

KO SELEMAIA 28 - KO E TOH TAPU KATOA TONGA bible

KO SELEMAIA 28

¹PEA na‘e ai ha me‘a na‘e hoko ‘i he ta‘u ko ia, ‘i he taimi kimu‘a ‘o e pule ‘a Setekaia ko e Tu‘i Siuta,[47] ‘io, ‘i hono fā ta‘u mo hono nima māhina; ko ‘Ananaia ko e foha ‘o e palōfita ko ‘Āsuli, ‘a ia ko e tangata Kipione, na‘a ne lea mai kiate au ‘i he fale ‘o Sihova, ‘i he ‘ao ‘o e kau taula‘eiki mo e kakai kotoa, ‘o pehē,

²Ko e folofola eni ‘a Sihova Sāpaoti, ko e ‘Otua ‘o ‘Isileli: Kuo u fesi‘i ‘a e ‘ioke ‘a e Tu‘i Pāpilone.

³‘Oku toe pē ha ta‘u ‘e ua mālō, pea te u fakafoki ki he potu ni ‘a e nāunau kotoa ‘o e fale ‘o Sihova, ‘a ia na‘e to‘o ‘e Nepukanesa ko e Tu‘i Pāpilone mei he potu ni, ‘o ‘ave ki Pāpilone:

⁴pea ko Sekonaia foha ‘o Sihoiakimi, ko e Tu‘i Siuta, mo e kau pōpula kotoa ‘o Siuta na‘e ‘alu ki Pāpilone, te u fakafoki kinautolu ‘e au ki he potu ni — ko Sihova ia mei he Ta‘ehāmai — he te u fesi‘i ‘a e ‘ioke ‘a e Tu‘i Pāpilone.

⁵Pea tali ‘a e palōfita ko Selemaia ki he palōfita ko ‘Ananaia ‘i he ‘ao ‘o e kau taula‘eiki, pea ‘i he ‘ao ‘o e kakai kātoa na‘e tu‘u ‘i he fale ‘o Sihova,

⁶‘io, na‘e pehē ‘e he palōfita ko Selemaia, ‘Ēmeni: tauange mo Sihova ke ne fakaai ‘a e ngaahi lea kuo ke palofisai ‘aki, ‘o fakafoki ‘a e nāunau ‘a Sihova, mo e kau pōpula kotoa mei Pāpilone ki he potu ni.

⁷Ka ko eni, ke ke fanongo mu‘a ki he lea ni ‘oku ou ‘ai ki ho telinga, mo e telinga ‘o e kakai kotoa:

⁸Ko e kau palōfita na‘e holomu‘a ‘iate au mo koe, talu mei mu‘a, na‘a nau fai ‘enau palofisai ki he ngaahi fonua lahi, pea ki he ngaahi pule‘anga mā‘olunga, ‘o lau ki he tau mo e kovi mo e mahaki faka‘auha.

⁹Ka ai ha palōfita ‘oku palofisai ki he melino, ka toki hokosia ‘a e lea ‘a e palōfita ko ia, pea mahino ai ko e palōfita ia kuo fekau mo‘oni mai ‘e Sihova.

¹⁰Toki to‘o ‘e he palōfita ko ‘Ananaia ‘a e ‘akau ‘o e ‘ioke mei he kia ‘o e palōfita ko Selemaia, ‘o ne fesi‘i ia.

¹¹Pea lea ‘a ‘Ananaia ‘i he ‘ao ‘o e kakai kotoa, ‘o pehē, Ko e folofola eni ‘a Sihova: ‘E pehē ‘eku fesi‘i ‘a e ‘ioke ‘a Nepukanesa ko e Tu‘i Pāpilone mei he kia ‘o e ngaahi pule‘anga kotoa pē, ‘i he ‘osi ‘a e ta‘u ‘e ua mālō. Pea laka atu ai ki tu‘a ‘a e palōfita ko Selemaia, ‘o ‘alu.

¹²Pea hoko ‘a e folofola ‘a Sihova kia Selemaia, hili ‘a e fesi‘i ‘e he palōfita ko ‘Ananaia ‘a e ‘ioke mei he kia ‘o e palōfita ko Selemaia, ‘o pehē,

¹³‘Alu, ‘o lea kia ‘Ananaia, ‘o pehē, Ko e folofola ‘a Sihova eni: Ko e ‘ioke ‘akau na‘a ke fesi‘i; ka te ke[48] fetongi ‘aki ‘a e ‘ioke ‘aione.

¹⁴He ko e folofola eni ‘a Sihova Sāpaoti, ko e ‘Otua ‘o ‘Isileli: Ko e ‘ioke ‘aione kuo u ‘ai ki he kia ‘o e ngaahi pule‘anga kotoa, ke nau ngāue kia Nepukanesa ko e Tu‘i Pāpilone; ‘io, te nau hopoate ki ai: pea na‘a mo e manu ‘o e vao kuo u tuku kiate ia.

¹⁵Pea na‘e toki lea ‘a e palōfita ko Selemaia ki he palōfita ko ‘Ananaia, Fanongo mai, ‘Ananaia; kuo ‘ikai fekau koe ‘e Sihova; ka ‘oku ke ngaohi ‘a e kakai ni ke tui ki ha loi.

¹⁶Ko ia ko e folofola eni ‘a Sihova, Ko au eni ‘oku ou fekau ke ke ‘alu mei he funga ‘o e kelekele: ko e ta‘u ni te ke mate ai, koe‘uhi kuo ke fai angatu‘u kia Sihova.

¹⁷Pea na‘e pekia ‘a e palōfita ko ‘Ananaia ‘i he ta‘u ko ia, ‘i hono māhina fitu.