Read KO E TOH TAPU KATOA TONGA KO SELEMAIA 3 Bible Online

KO SELEMAIA 3 - KO E TOH TAPU KATOA TONGA bible

KO SELEMAIA 3

¹HE‘ENE pehē, Kapau ‘e vete ‘e ha tangata hono uaifi, pea ‘alu ‘a e fefine meiate ia, ‘o nonofo mo ha tangata kehe, ‘e ngofua koā ke ne toe nofo mo e fefine ko ia? ‘Ikai ‘e mātu‘aki ‘uli‘i ha fonua ‘oku pehē? Ka ko koe, kuo ke fe‘auaki mo e kau fe‘iloaki tokolahi; pea ko e pehē ke ke foki kiate au? — ko Sihova ia mei he Ta‘ehāmai.

²Tāngaki hake ho mata ki he ngaahi funga mo‘unga molemole, pea vakai; ko e potu fē kuo ‘ikai te ke mohe ai mo ha taha? Na ke nofo talitali ki he fa‘ahinga ko ia ‘i he ngaahi ve‘ehala, hangē ko ha ‘Ālepea ‘i he toafa; pea na‘a ke ‘uli‘i ‘a e fonua ‘aki ho‘o fa‘a fe‘auaki, mo ho‘o pau‘u.

³Ko ia na‘e ta‘ofi ai ‘a e ‘uha lahi, pea na‘e ‘ikai tō ‘a Vai-mui; ka na‘e ‘iate koe ‘a e la‘e ‘o ha fefine pa‘umutu, ke ta‘emangoi.

⁴‘Ikai te ke kamata eni ke ui mai, ‘o pehē, ‘Alā tamai, ko koe ko e to‘utakanga ‘o ‘eku finemui?

⁵Te ne ‘ita ma‘u pē? Te ne tauhi ia ‘o ta‘engata? ‘Ā, kuo ke lea pehē, ka ‘oku ke fai ‘a e ngaahi kovi, ‘o kavekavehoko foki.

⁶Pea folofola ‘a Sihova kiate au ‘i he taimi ‘o Kingi Siosaia, Kuo ke mamata ki he me‘a kuo fai ‘e he holomui ko ‘Isileli? Na‘a ne ‘alu hake ki he funga mo‘unga mā‘olunga fua pē, pea ki he lolo ‘akau mata kotoa pē, pea na‘a ne fai fe‘auaki ai.

⁷Pea u pehē, Ka ‘osi ‘ene fai ‘a e fu‘u me‘a ko ia, te ne foki mai kiate au; ka na‘e ‘ikai te ne foki mai: pea na‘e sio ki ai ‘e hono tokoua kākā ko Siuta.

⁸Pea u vakai, neongo kuo u tukuange ‘a e holomui ko ‘Isileli, koe‘uhi ko e ngaahi me‘a kuo ne maumau alafianga ai, pea kuo u tuku kiate ia ‘a e tohi vete, kae ‘ikai ke manavahē ai ‘a hono tokoua kākā ko Siuta;

⁹‘alu ‘o pa‘umutu pē mo ia. Pea ‘i he taimi ko ia na‘e ‘uli‘i ‘a e fonua ‘i he ongoonga‘a mai ‘ene pa‘umutu; he na‘a ne fai kovi mo e maka mo e ‘akau.

¹⁰Kae tala atu, neongo e fu‘u me‘a ko ia, ka na‘e ‘ikai foki kiate au hono tokoua kākā ko Siuta ‘aki hono loto kotoa, kae fiofio loi pē — ko Sihova ia mei he Ta‘ehāmai.

¹¹Pea folofola ‘a Sihova kiate au, ‘Oku tonuhia ange ‘a e laumālie ‘o e holomui ni ko ‘Isileli ‘i he kākā ko Siuta.

¹²‘Alu, ‘o fanongonongo ‘a e ngaahi me‘a ni ki he potu tokelau, pea ke pehē, Foki mai ‘a si‘i holomui ko ‘Isileli — ko Sihova ia mei he Ta‘ehāmai — ‘e ‘ikai te u fakafulofula atu: he ko e taha ‘ofa au — ko Sihova ia mei he Ta‘ehāmai — ‘e ‘ikai te u ‘ita ma‘u pē.

¹³Kehe pē ke ke ‘ilo ho‘o kovi, he kuo ke angatu‘u kia Sihova ko ho ‘Otua, pea kuo ke ‘alu ki hē mo ‘alu ki hē ki ha kau muli, ‘i he lolo ‘akau mata fua pē, ka ko hoku le‘o na‘e ‘ikai te ke fakaongo ki ai — ko Sihova ia mei he Ta‘ehāmai.

¹⁴Foki mai, fānau kuo fakaholomui — ko Sihova ia mei he Ta‘ehāmai — he ko au pē ko homou husepāniti: pea te u to‘o kimoutolu, ko e toko taha mei ha kolo pea ko e toko ua mei ha fa‘ahinga, pea te u ‘omi kimoutolu ki Saione.

¹⁵Pea te u ‘atu kiate kimoutolu ha kau tauhi ‘oku hoa mo hoku loto, pea te nau fai ‘ilo mo fakapotopoto ‘enau fafanga kimoutolu.

¹⁶Pea ka mou ka fakatokolahi mo tupu ‘i he fonua — ko Sihova ia mei he Ta‘ehāmai — ‘i he taimi ko ia, ‘e ‘ikai te nau kei lau “Ko e ‘A‘ake ‘o e Kovinānite ‘o Sihova,” ‘io ‘e ‘ikai ake ia ‘i honau loto; pea ‘e ‘ikai te nau manatu ki ai; pea ‘e ‘ikai te nau ongo‘i ‘ene ta‘e‘i ai; pea ‘e ‘ikai toe ngaohi ia.

¹⁷‘I he kuonga ko ia te nau ui ‘a Selusalema ko e Taloni ‘o Sihova; pea ‘e tānaki ki ai ‘a e ngaahi kakai kotoa pē, ki he huafa ‘o Sihova, ‘a ia ‘oku ‘i Selusalema: ‘o ‘ikai te nau muimui ki he ta‘emīngao ‘o honau loto kovi.

¹⁸‘I he taimi ko ia ‘e fononga ‘a e fale ‘o Siuta mo e fale ‘o ‘Isileli, pea te nau omi fakataha mei ha fonua ‘i tokelau ki he fonua na‘a ku ‘atu ki ho‘omou ngaahi tamai mōnau ngaahi tofi‘a.

¹⁹Pea u lau ‘e au, Hono ‘ikai te u velo koe ki he tu‘unga ‘o e ngaahi foha? Pea te u ‘atu ha fonua mamana, ko e teunga ‘o e teunga ‘o e ngaahi pule‘anga mo‘ao tofi‘a? Pea u pehē, Kuo pau te mou ui au ‘Alā Tamai; pea ‘e ‘ikai te mou tafoki meiate au.

²⁰‘Ā, hangē ‘oku li‘aki ‘e he fefine kākā hono hoa, pehē ho‘omou li‘aki au, ‘a e fale ‘o ‘Isileli — ko Sihova ia mei he Ta‘ehāmai.

²¹‘Oku ongoongo mai ha lea mei he ngaahi funga mo‘unga molemole, ko e tangi mo e kole ‘a ha‘a ‘Isileli; koe‘uhi kuo nau ngaohi honau hala ke piko, kuo nau fakangalongalo‘i ‘a Sihova ko honau ‘Otua.

²²Foki mai, si‘i fānau kuo holomui, ka u faito‘o homou ngaahi holomui‘anga. Ko kimautolu eni ‘oku ‘alu atu; he ko koe ‘a Sihova, ko homau ‘Otua.

²³Tā ‘oku iku loi pē ‘a e me‘a mei he ngaahi mā‘olunga, ‘a e uōuō tu‘u ‘o e ngaahi mo‘unga; tā ko Sihova pē ko hotau ‘Otua, ‘oku mei ai ‘a e fakamo‘ui ‘o ‘Isileli,

²⁴pea kuo keina ‘e he Me‘a Fakamā ‘a e me‘a kuo ngāue ki ai ‘etau mātu‘a talu ‘etau talavou; ‘enau fanga sipi, mo ‘enau fanga pulu, ‘a ‘enau fānau tangata mo ‘enau fānau fefine.

²⁵Tau tākoto ‘i hotau fakamā ko ia, pea ke ‘ufi‘ufi kitautolu ‘e he‘etau fakalielia; he kuo tau hia kia Sihova ko hotau ‘Otua, ‘a kitautolu mo ‘etau ngaahi kui; talu ‘etau talavou, ‘o fai mai ki he ‘aho ni: pea kuo ‘ikai te tau fakaongo ki he le‘o ‘o Sihova ko hotau ‘Otua.