Read KO E TOH TAPU KATOA TONGA KO SELEMAIA 30 Bible Online

KO SELEMAIA 30 - KO E TOH TAPU KATOA TONGA bible

KO SELEMAIA 30

¹KO E folofola na‘e hoko kia Selemaia meia Sihova, ‘o pehē,

²Ko e folofola eni ‘a Sihova ko e ‘Otua ‘o ‘Isileli, Ke ke hanga ‘o tohi ‘a e ngaahi me‘a kuo u lea‘aki kiate koe ‘i ha tohi.

³He vakai ‘oku hoko mai ha taimi — ko Sihova ia mei he Ta‘ehāmai — ‘a ia te u fakafoki ai ‘a e pōpula ‘o hoku kakai ‘Isileli mo Siuta — ko e folofola ia ‘a Sihova: pea te u fakafoki kinautolu ki he fonua na‘a ku ‘atu ki he‘enau ngaahi kui pea te nau ma‘u ia.

⁴Pea ko eni ia ‘a e ngaahi lea na‘e folofola‘aki ‘e Sihova, ‘o kau ki ‘Isileli mo Siuta.

⁵‘Io, ko eni ‘a e folofola ‘a Sihova: ‘Oku ongoonga‘a mai ‘a e fetete‘i, ‘a e ilifia, ‘o ‘ikai ha momo‘i fiemālie ai.

⁶Fehu‘i mu‘a ‘o vakai pe ‘oku fā‘ele ha tangata: pea ko e hā ē ‘oku ou sio ki he motu‘a kotoa pē ‘oku ne ala ki hono tapa‘i kete, ‘o hangē ha fefine fā‘ele, pea kuo liliu honau mata kotoa ‘o tea?

⁷‘Oiauē! he ko e ‘aho lahi ‘a e ‘aho ko ia, ‘o ‘ikai hano tatau: pea ko e taimi fakamamahi kia Sēkope; kae fakahaofi mai ia.

⁸Pea ‘i he taimi ko ia — ko Sihova Sāpaoti eni mei he Ta‘ehāmai — te u fesi‘i ‘ene ‘ioke mei ho kia, pea te u motuhi ho ngaahi ha‘i; pea ‘e ‘ikai toe fakafatongia‘i ia ‘eni muli:

⁹ka te nau tauhi kia Sihova ko honau ‘Otua, pea kia Tēvita ko honau tu‘i, ‘a ia te u fokotu‘u ma‘anautolu.

¹⁰Pea ‘oua te ke manavahē, ‘a koe Sēkope ko ‘eku tamaio‘eiki — ko Sihova ia mei he Ta‘ehāmai — pea ‘oua te ke mo‘utāfu‘ua, si‘i ‘Isileli: he ko au eni te u fakahaofi koe mei he potu mama‘o na, pea mo ho hako mei he fonua ‘oku nau pōpula ai; pea ‘e foki ‘a Sēkope ‘o nonga, ‘o nofo falala, ‘o ‘ikai ha taha ke ne ilifia ai.

¹¹He ‘oku ou ‘iate koe ‘e au — ko Sihova eni mei he Ta‘ehāmai — ke fakahaofi koe; pea te u faka‘osi ‘a e ngaahi pule‘anga na‘a ku veteki koe ki ai, kae ‘ikai te u faka‘osi koe; ka te u tautea koe ke fe‘unga, ‘o ‘ikai te u tuku koe ke ‘alu ta‘etautea ‘aupito.

¹²He ko e folofola eni ‘a Sihova, ‘Oku matamata kovi ho lavea, kuo o‘o ho tā.

¹³‘Oku ‘ikai ha taha ke fakamo‘ui ho‘o me‘a, ‘oku ‘ikai ha‘o faito‘o; hao ‘oposi ki he kafo.

¹⁴Kuo fakangalongalo‘i koe ‘e ho kau ‘ofa‘anga; ‘oku ‘ikai te nau kumi kiate koe; he kuo u taa‘i koe ‘aki ‘a e tā ‘a ha fili, ‘aki ‘a e tautea ‘a ha taha manako fakamamahi: koe‘uhi na‘e lahi ho‘o faikovi, na‘e fokotu‘uniu ho‘o ngaahi angahala.

¹⁵Ko e hā ‘oku ke tangi kaila ai ‘i ho lavea? Ko e matamatakovi ho kafo? Koe‘uhi ko e lahi ho‘o faikovi, ‘a e fokotu‘uniu ho‘o ngaahi angahala, ko ia ia kuo u fai pehē ai kiate koe.

¹⁶Ko ia ko kinautolu kotoa ‘oku keina koe, ‘e keina kinautolu; pea ko kinautolu ‘oku fakamamahi‘i koe, ‘e taki pōpula honau kotoa; pea ko kinautolu ‘oku kaiha‘a meiate koe, ‘e nofo kaiha‘asia; pea ko kinautolu na‘e vete koe, te u tuku ke vetea.

¹⁷He te u fakakili mai koe, pea te u faito‘o ho ngaahi lavea — ko Sihova ia mei he Ta‘ehāmai: kuo nau ui koe ko e kapusia, tokua ko Saione, ko e fefine ‘oku ‘ikai kumi ha taha ki ai.

¹⁸Ko e folofola eni ‘a Sihova, Ko au eni te u liliu ‘a e pōpula ‘a e ngaahi tēniti ‘o Sēkope, pea te u faka‘atu‘i hono ngaahi nofo‘anga; pea ‘e toe langa ‘a e kolo ‘i hono fo‘i mā‘olunga ‘o‘ona, pea ‘e nofo‘ia ‘a e palasi ‘i hono anga ‘o‘ona.

¹⁹Pea ‘e ‘alu atu meiate kinautolu ‘a e fakafeta‘i, mo e le‘o ‘o e kakai ‘oku kata; pea te u fakatokolahi kinautolu, pea ‘e ‘ikai te nau toko si‘i; pea te u fakalāngilangi‘i kinautolu, pea ‘e ‘ikai te nau ngali iiki.

²⁰Pea ko ‘enau fānau ‘e hangē ko e taimi mu‘a, pea ko ‘enau fakataha ‘e fokotu‘u ma‘u ‘i hoku ‘ao, pea te u tautea ‘a kinautolu kātoa ‘oku fakamamahi kinautolu.

²¹Pea ko hono ‘eiki ko e taha ‘iate kinautolu, pea ko hono pule ko e tupu mei honau lotolotonga; pea te u fakaofiofi ia, pea te ne ‘unu kiate au: ka ko hai tū ia ‘e falala pehē ki hono loto ke fie ‘unu‘unu kiate au? — ko Sihova ia mei he Ta‘ehāmai.

²²Pea te mou hoko ko hoku kakai, pea te u hoko au ko homou ‘Otua.

²³Sī! ko e ‘ahiohio ē ‘a Sihova — ko ‘ene tafulu ‘oku ‘alu atu! — ko ha ‘ahiohio feolo: ‘e tataha ‘aki ‘a e ‘ulu ‘o e kau faikovi.

²⁴‘Ē, ‘ikai foki ‘a e kakaha ‘o e houhau ‘o Sihova, kae‘oua ke ‘osi fai, pea ‘oua ke fakaai ‘a e ngaahi fakakaukau ‘a hono finangalo: ‘i he ngaahi ‘aho faka‘osi ‘e hā ki homou ‘atamai ‘a e ngaahi me‘a ko ia.