Read KO E TOH TAPU KATOA TONGA KO SELEMAIA 31 Bible Online

KO SELEMAIA 31 - KO E TOH TAPU KATOA TONGA bible

KO SELEMAIA 31

¹‘I HE taimi ko ia — ko Sihova eni mei he Ta‘ehāmai — te u hoko ko e ‘Otua ‘o e ngaahi fāmili kotoa ‘o ‘Isileli, pea ‘e hoko ‘e kinautolu ko hoku kakai.

²Ko e folofola eni ‘a Sihova, Ko e kakai na‘e hao mei he heletā kuo ta‘imālie ha ‘ofa ‘i he toafa; ka u ‘alu ‘o fakamālōlō ia, ‘io, ‘a si‘i ‘Isileli.

³Kuo hā ‘a Sihova kiate au[53] mei he potu mama‘o na, ‘o ne folofola mai, Tala atu, kuo u ‘ofa‘i koe ‘aki ha ‘ofa ta‘engata: ko ia, kuo u toloaki ma‘au ‘a e meesi.[54]

⁴Te u toe langa ‘aki koe, ‘io, ‘e langa koe, si‘i tāupo‘ou ko ‘Isileli: ‘e toe teu ‘aki koe ‘a e nafa fāngongo, pea te ke toe ‘alu atu ‘i he me‘e ‘a e kau fakafiefia.

⁵Te ke toe tō ngoue vaine ‘i he ngaahi mo‘unga ‘o Samēlia: ‘e tō ‘e he kau tō, pea te nau tokoni ‘aki.

⁶He ‘e ‘i ai ha ‘aho ‘e kalanga ‘a e kau le‘o ‘i Mo‘unga ‘Ifalemi, Tu‘u, ka tau ‘alu hake ki Saione, kia Sihova ko hotau ‘Otua.

⁷He ko e folofola eni ‘a Sihova, Hiki mavava ma‘a Sēkope, fiefia mo fākaulu, he ko e ‘uluaki ‘o e ngaahi kakai. ‘Ai ke maongo ho‘omou fakamālō, pea mou pehē, ‘E Sihova, fakahaofi ho[55] kakai, ‘a e toenga ‘o ‘Isileli.

⁸Ko au eni te u ‘omi kinautolu mei he fonua tokelau, pea te u tānaki kinautolu mei he ngaahi ngata‘anga ‘o māmani, ‘oku ‘iate kinautolu ‘a e kui, mo e heke; ‘e ai mo e fefine feitama mo e fefine fā‘ele fakatou‘osi: te nau foki ki heni ko e fononga tokolahi.

⁹Te nau omi tangi, pea te u taki kinautolu mo e hū fakamātoato: te u ‘ave kinautolu ki he ngaahi tafenga vai ‘i ha hala tokamālie, ‘a ia ‘e ‘ikai te nau humu ai, he kuo u hoko ko e tamai ki ‘Isileli, pea ko ‘Ifalemi ko hoku ‘uluaki.

¹⁰Fanongo ki he folofola ‘a Sihova, ‘a e ngaahi pule‘anga na, pea mou fanongonongo ‘i he ngaahi motu mama‘o; ‘o mou pehē, Ko ia na‘a ne veteki ‘a ‘Isileli te ne toe tānaki, ‘o tauhi ki ai, ‘o hangē ko e fai ‘e ha tauhi sipi ki he‘ene tākanga.

¹¹He kuo huhu‘i ‘e Sihova ‘a Sēkope, ‘o fakatau mai mei he nima ‘o ia na‘e mālohi ange ‘iate ia.

¹²Pea te nau omi, ‘o hiki mavava ‘i funga Saione, pea te nau matua mai ki he ‘ofa ‘a Sihova, ke kai ‘a e uite, mo e uaine, mo e lolo, mo e ‘uhiki‘i sipi mo e ‘uhiki‘i pulu: pea ko honau laumālie ‘e hangē ko ha ngouetapu vai‘ia; pea ‘e ‘ikai te nau toe faka‘au‘ausino.

¹³Toki fiefia ‘a e ta‘ahine ‘i he me‘e, pea fiefia ‘a e talavou mo e mātu‘a fakataha: pea te u liliu ‘enau tangi ko e nēkeneka, pea te u ‘ai ke nau fiemālie, pea te u ‘ai ke nau fiefia, ‘o tuku ‘a e mamahi.

¹⁴Pea te u fakatopono ‘a e kau taula‘eiki ‘i he kai ngako, pea ‘e mākona hoku kakai ‘i he me‘a‘ofa ‘a‘aku — ko Sihova ia mei he Ta‘ehāmai.

¹⁵Ko e folofola eni ‘a Sihova: Na‘e ongona ‘i Lama ha le‘o, ko e tangi mo e fu‘u tangilāulau, ko e tēngihia ‘e Lesieli ‘ene fānau: ‘oku ‘ikai te ne tali ha fakafiemālie koe‘uhi ko ‘ene fānau; he kuo nau mole.

¹⁶Ko e folofola eni ‘a Sihova: Ta‘ofi ho le‘o mei he tangi, mo ho mata mei he lo‘imata: he ai ha totongi ki ho‘o fakaongosia — ko Sihova ia mei he Ta‘ehāmai — he te nau foki mei he fonua ‘o e fili.

¹⁷Pea ‘oku ai ha‘o ‘amanaki ki he ‘amui — ko Sihova ia mei he Ta‘ehāmai — pea ‘e foki ho‘o fānau ki honau feitu‘u.

¹⁸Hangehangē na‘a ku ongo‘i ‘i ‘Ifalemi ‘oku ai ‘ene hanu, ‘o pehē, Na‘a ke kinisi au, pea u ongo‘i ho‘o kinisi, hangē ko e fai ki ha ki‘i pulu te‘eki maheni: fakatafoki au, pea te u lava ke tafoki; he ko Sihova koe ko hoku ‘Otua.

¹⁹Seuke, hili hoku fakatafoki na‘a ku fakatomala; pea hili hoku fakapoto‘i na‘a ku sī tenga: na‘a ku mā, ‘io, na‘a ku laea foki, he na‘e hilifaki kiate au hoku namukū he‘eku talavou.

²⁰Tā ‘apē ko e foha mahu‘inga kiate au ‘a ‘Ifalemi? tā ko e tamasi‘i pele? he ka u ka talatalaaki‘i ia, ‘oku ou kei manatu ‘aupito ki ai.[56] Ko ia ‘oku tokomohū hoku fatu ki ai; kuo pau ke u ‘ofa ki ai — ko Sihova ia mei he Ta‘ehāmai.

²¹Fokotu‘u hao ngaahi maka fakamanatu, ‘ai hao ngaahi pou faka‘ilonga: tokanga loto ki he hala tanu, ‘io, ‘a e hala na‘a ke fononga ai. Foki mai, si‘i tāupo‘ou ko ‘Isileli, foki ki ho ngaahi kolo ni.

²²‘E ngata ‘afē ho‘o fe‘alu‘alu‘aki, si‘i fefine fakaholomui, he kuo fakatupu ‘e Sihova ha me‘a fo‘ou ‘i māmani: ‘oku ‘a e fefine ke fā‘ofua ki he tangata.[57]

²³Ko e folofola eni ‘a Sihova Sāpaoti, ko e ‘Otua ‘o ‘Isileli: Te nau toe ngāue‘aki ‘a e lea ko eni ‘i he fonua ‘o Siuta, mo hono ngaahi kolo, ‘i he‘eku liliu ‘enau pōpula: Tauange mo Sihova ke ne tāpuaki‘i koe, si‘i nofo‘anga ‘o e faitotonu, Si‘i mo‘unga ‘o e mā‘oni‘oni![58]

²⁴Pea ‘e nofo fakataha ai ‘a Siuta mo hono ngaahi kolo; ‘a e kau fa‘a mo kinautolu ‘oku ‘alu fano mo e ngaahi tākanga.

²⁵He kuo u fakatopono ‘a e laumālie ongosia, pea kuo u fakamākona ‘a e laumālie kotoa ‘oku ‘alefa.

²⁶Na‘a ku ‘ā ‘i he me‘a ko ia, ‘o u vakai; tā kuo melie ‘eku mohe kiate au.

²⁷Vakai, ‘oku hoko ha taimi — ko Sihova eni mei he Ta‘ehāmai — ‘a ia te u tō ma‘ala ai ‘a e fale ‘o ‘Isileli mo e fale ‘o Siuta, ‘o fai‘aki ‘a e pulopula ‘o e tangata, mo e pulopula ‘o e manu.

²⁸Pea hangē ko ‘eku lamasi kinautolu ke ta‘aki mo holoki, pea ke hae mo maumau mo ngaohikovi‘i; pehē te u lamasi kinautolu ke langa hake mo tōkaki — ko Sihova ia mei he Ta‘ehāmai.

²⁹‘I he taimi ko ia ‘e ‘ikai te nau kei lau, ‘o pehē, Mātu‘a ne kai ‘a e kālepi mahi, ka ko e nifo ‘o e fānau ‘oku maninia.

³⁰Kaekehe, ‘e mate takitaha ‘i he‘ene kovi ‘a‘ana. ‘Ilonga ha tangata ‘oku ne kai ‘a e kālepi mahi, ko ho‘ona pē nifo ‘e maninia.

³¹Vakai, ‘oku hoko mai ha taimi — ko Sihova ia mei he Ta‘ehāmai — ‘a ia te u fai ai mo e fale ‘o ‘Isileli mo e fale ‘o Siuta ha fuakava fo‘ou —

³²taha kehe ‘a e fuakava ne u fai mo ‘enau ngaahi kui ‘i he taimi na‘a ku puke honau nima ke taki mai mei ‘Isipite; ‘a e kovinānite ko ia ‘a‘aku na‘a nau maumau‘i; ‘osi, na‘a ku nofo ‘e au ko honau husepāniti — ko Sihova ia mei he Ta‘ehāmai.

³³Ka ko eni ‘a e kovinānite te u fai mo e fale ‘o ‘Isileli hili ‘a e taimi ko ē — ko Sihova eni mei he Ta‘ehāmai — te u ‘ai ki loto ‘eku lao, ‘io, te u tongi ia ki honau loto; pea te u nofo ko honau ‘Otua, pea te nau nofo ko hoku kakai.

³⁴Pea ‘e ‘ikai kei ako ‘e ha taha ki hono kaungā‘api, pe ki hono kāinga, ‘o pehē, Mou ‘ilo ‘a Sihova: he te nau ‘ilo au kotoa pē, ‘o fai mei he si‘i ki he lahi — ko Sihova ia mei he Ta‘ehāmai. He te u fakamolemole ‘enau kovi, pea ko ‘enau ngaahi angahala ‘e ‘ikai te u toe manatua.

³⁵Ko e folofola eni ‘a Sihova, ‘a ‘Ene ‘Afio ‘oku ne tuku mai ha la‘ā ke fakamaama, ‘aho, mo e ngaahi fāliunga ‘o e māhina mo e ngaahi fetu‘u ke fakamaama ‘i he pō, ‘a e ‘Afio ‘oku ne ue‘i ‘a e tahi ke ‘u‘ulu hono peau; ko Sihova Sāpaoti hono huafa:

³⁶Kapau ‘e lava ke hiki ‘a e ngaahi fāliunga ko ia ha taimi mei he fe‘ao mo au — ko Sihova eni mei he Ta‘ehāmai — ‘e toki tuku foki ‘a e hako ‘o ‘Isileli ‘enau fe‘ao mo au ko e kakai.

³⁷Ko e folofola eni ‘a Sihova: Kapau ‘e lava ke fua ‘a e langi ‘i ‘olunga, pea ke hakule ‘a e ngaahi tu‘unga ‘o māmani ‘i lalo, te u toki li‘aki ‘a e hako kotoa ‘o ‘Isileli, koe‘uhi ko e ngaahi me‘a kehekehe kuo nau fai — ko Sihova ia mei he Ta‘ehāmai.

³⁸Vakai, ‘oku hoko mai ha taimi — ko Sihova eni mei he Ta‘ehāmai — ‘a ia ‘e langa ai ‘a e kolo mo‘o Sihova, mei he taua ‘o Hananeli, ‘o a‘u ki he matanikolo ‘o e tuliki.

³⁹Pea ‘e toe ‘alu atu ‘a e kafa fua fakahangatonu ‘i he funga mā‘olunga ko Kālepi, pea afe hifo ki Koa.

⁴⁰Pea ko e tele‘a kotoa ‘o e ngaahi ‘anga‘anga mo e efuefu, pea mo e ngaahi ngoue‘anga kotoa ‘o a‘u ki Vai Kitiloni, ‘o a‘u ki he tuliki ‘o e matapā hoosi mei hahake, ‘e tāpuhā ia kia Sihova; ‘e ‘ikai toe ta‘aki, pea ‘e ‘ikai toe holoki, ‘o ta‘engata.