Read KO E TOH TAPU KATOA TONGA KO SELEMAIA 32 Bible Online

KO SELEMAIA 32 - KO E TOH TAPU KATOA TONGA bible

KO SELEMAIA 32

¹KO E folofola na‘e hoko kia Selemaia meia Sihova ‘i hono hongofulu ‘o e ta‘u ‘o Setekaia ko e Tu‘i Siuta, ‘a ia ko hono hongofulu mā valu ta‘u ‘o Nepukanesa.

²Pea ‘i he taimi ko ia na‘e kapui ‘a Selusalema ‘e he tau ‘a e Tu‘i Pāpilone: pea ko Selemaia ko e palōfita na‘e mo‘u tāpunia ‘i he loto‘ā ‘o e ka‘ate, ‘a ia na‘e ‘i he fale ‘o e Tu‘i Siuta.

³He kuo tāpuni ia ‘e Setekaia ko e Tu‘i Siuta, he‘ene pehē, Ko e hā ‘oku ke fai palofisai ai, ‘o ke pehē, Ko e folofola eni ‘a Sihova, Ko au ē te u ‘atu ‘a e kolo ni ki he nima ‘o e Tu‘i Pāpilone, pea te ne puke ia;

⁴pea ‘e ‘ikai hao ‘a Setekaia ko e Tu‘i Siuta mei he nima ‘o e kau Kalitia, ka kuo pau ke tuku ia ki he nima ‘o e Tu‘i Pāpilone, pea ko e ngutu ‘o ē ‘e lea ki he ngutu ‘o ē, pea ko e mata ‘o ē ‘e sio ki he mata ‘o ē;

⁵pea te ne taki ‘a Setekaia ki Pāpilone, pea te ne ‘i ai kae‘oua ke u ‘a‘ahi kiate ia — ko Sihova ia mei he Ta‘ehāmai, Neongo ho‘omou tau‘i ‘a e kau Kalitia, kae ‘ikai te mou lava?

⁶Pea pehē ‘e Selemaia, Na‘e hoko kiate au ha folofola ‘a Sihova, ‘o pehē,

⁷Sī ni, ‘oku ha‘u kiate koe ‘a ‘Anameli foha ‘o Sālumi ko e tokoua ‘o ho‘o tamai, ke fakahā, Fakatau mu‘a mo‘ou ‘a e konga vao ‘o‘oku ‘oku ‘i ‘Anatoti: he ko e koeli totonu koe ki he huhu‘i.

⁸Pea ha‘u kiate au ki he loto‘ā ‘o e ka‘ate ‘a ‘Anameli, ko e foha ‘o e tokoua ‘o ‘eku tamai, ‘o hangē ko e folofola ‘a Sihova, pea ne pehē mai kiate au, Fakatau mu‘a ‘a e konga vao ‘o‘oku, ‘a ia ‘oku ‘i ‘Anatoti ‘i he fonua ‘o Penisimani: he ko koe ‘a e hoko totonu, pea ko koe ‘a e koeli; fakatau ia mo‘ou. Pea u ‘ilo ko e folofola ‘a Sihova ia.

⁹Ko ia na‘a ku fakatau ai ‘a e konga vao ‘i ‘Anatoti meia ‘Anameli ko e foha ‘o e tokoua ‘o ‘eku tamai, pea na‘a ku fua kiate ia ‘a e pa‘anga, ko e sikeli ‘e fitu mo e hongofulu, ‘a e siliva na‘e lau.

¹⁰Pea na‘a ku tohi ‘a e me‘a ‘i he tohi, pea u sila‘i ke ma‘u, pea u kumi ha kau fakamo‘oni, pea na‘a ku fua kiate ia ‘a e pa‘anga ‘i he me‘afua.

¹¹Pea na‘a ku to‘o ‘a e tohi fakatau — ‘a ia na‘e sila‘i, ‘a ia ‘oku ‘i ai ‘a e fakamatala mo e ngaahi tu‘utu‘uni,[59]

¹²Pea mo ia na‘e ava — pea u ‘atu ‘a e tohi fakatau kia Paluki ko e foha ‘o Nelaia, foha ‘o Ma‘aseia, ‘oku sio ki ai ‘a ‘Anameli ko e tokoua ‘o ‘eku tamai, pea ‘oku sio ki ai ‘a e kau fakamo‘oni na‘e ‘ai honau hingoa ki he tohi fakatau; ‘oku sio ki ai foki ‘a e kau Siu kotoa na‘e nofo ‘i he loto‘ā ‘o e ka‘ate.

¹³Pea u na‘ina‘i kia Paluki ‘i honau ‘ao, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli:

¹⁴Ke ke to‘o ‘a e tohi fakatau ko eni, ‘a e tohi kuo sila‘i mo eni ‘oku ava, ‘o tuku ki ha ipu ‘umea, koe‘uhi ke tolonga fuoloa.

¹⁵He ko eni ‘a e folofola ‘a Sihova Sāpaoti, ko e ‘Otua ‘o ‘Isileli; ‘E toe fakatau fale, moni konga vao, moni ngoue vaine, ‘i he fonua ko eni.

¹⁶Pea hili ‘eku ‘atu ‘a e tohi fakatau kia Paluki foha ‘o Nelaia, na‘a ku fai ‘eku lotu kia Sihova, ‘o pehē,

¹⁷‘Oiauē ‘Ātonai Sihova! vakai ko koe na‘e ngaohi ‘a e langi mo e fonua ‘aki ho fu‘u ivi na, mo ho nima kuo mafao; ‘oku ‘ikai ha momo‘i me‘a ‘e faingata‘a ki he ‘Afiona:

¹⁸‘oku ke fai meesi ki he ngaahi toko afe, pea ‘oku ke totongi ‘a e kovi ‘a e mātu‘a ki he fatafata ‘o ‘enau fānau hili kinautolu: ko e ‘Otua lahi, ko e māfimafi, ‘a ia ko Sihova Sāpaoti hono huafa:

¹⁹ko e fungani ‘i he fai fakakaukau, pea kaukaua ‘i he fai ngāue: ‘a e ‘Afiona ‘oku ‘ā ho fofonga ki he ‘alunga fua pē ‘o e hako‘i tangata; ke ‘ange ki ai takitaha ‘o taau mo hono ‘alunga, mo e fua ‘o ‘ene ngaahi ngāue,

²⁰‘a e ‘Afiona na‘a ke ‘ai ha ngaahi faka‘ilonga mo me‘a fakaofo ‘i ‘Isipite, pea talu ai pē mo ho‘o fai pehē ‘i ‘Isileli foki, mo e kakai kehe; pea ke ma‘u ai ha ongoongo hangē ko ia ‘oku fai ni.

²¹Pea na‘a ke fakahao mai ho kakai mei ‘Isipite, ‘a ‘Isileli, ‘aki ha ngaahi faka‘ilonga, mo e ngaahi mana, pea ‘aki ha tā mamafa mo e nima kuo hiki tā, mo e fakangeingei lahi.

²²Pea na‘a ke ‘ange kiate kinautolu ‘a e fonua ni, ‘a ia na‘a ke fuakava ai ki he‘enau ngaahi kui, ke ‘ange mo‘onautolu, ko e fonua ‘oku mahutafea ‘i he hu‘akau mo e honi.

²³Pea nau hū mai ki ai ‘o tofi‘a ‘aki; ka na‘e ‘ikai te nau fakaongo ki ho le‘o, pea ko ho‘o lao na‘e ‘ikai te nau fou ai; ko e ngaahi me‘a na‘a ke tu‘utu‘uni ke nau fai kuo ‘ikai te nau fai: ko ia kuo ke fakahoko kiate kinautolu ‘a e fu‘u kovi ni.

²⁴Vakai, ko e ngaahi puke ena ‘oku nga‘unu mai ki he kolo, kae hamu ia; pea ko e kolo kuo tuku ia ke fa‘iteliha ai ‘a e kau Kalitia ‘oku tau‘i ia, ko e me‘a ‘i he heletā, mo e honge, mo e mahaki faka‘auha. ‘Io, ko e me‘a na‘a ke folofola ki ai kuo hoko; pea seuke, ‘oku ke ‘afio‘i pē.

²⁵Ka kuo ke folofola mai, ‘Ātonai Sihova ē, Fakatau mo‘ou ‘a e konga vao ‘aki ha pa‘anga, pea kumi fakamo‘oni ki ai: ‘osi, kuo tuku ‘a e kolo ki he nima ‘o e kau Kalitia.

²⁶Pea na‘e hoko ‘a e folofola ‘a Sihova kia Selemaia, ‘o pehē,

²⁷Sī ni, ko Sihova au, ko e ‘Otua ‘o e kakano kotoa: hono ai ha me‘a ‘e faingata‘a kiate au?

²⁸Ko ia, ko eni ‘a e folofola ‘a Sihova, Ko au eni ‘oku ou tuku ‘a e kolo ni ki he nima ‘o e kau Kalitia, pea ki he nima ‘o Nepukanesa ko e Tu‘i Pāpilone, pea te ne hamu ia.

²⁹Pea ‘e hū mai ‘a e kau Kalitia ‘oku fai tau ki he kolo ni, pea te nau ‘ai ha afi ki he kolo ni, ‘o fakamomofi ia, mo e ngaahi fale ‘a ia kuo mou tutu ‘inisēnisi ‘i hono tu‘a fale kia Peali, mo fakatau ‘a e ngaahi feilaulau — kava ki he ngaahi ‘otua kehe, ke faka‘ita ‘aki au.

³⁰He ko ha‘a ‘Isileli mo ha‘a Siuta, ko e me‘a pē kuo nau fai talu ‘enau talavou, ko e fai ‘o e me‘a ‘oku tau kovi kiate au; ‘io, ko e me‘a pē ‘a ha‘a ‘Isileli kuo fai ko e fakamamahi au ‘aki ‘a e ngāue ‘a honau nima — ko Sihova ia mei he Ta‘ehāmai.

³¹He talu ‘a e taimi na‘a nau langa ia, ‘o a‘u ki he ‘aho ni, mo e nofo mai ‘a e kolo ni ko e me‘a ke langa ai ‘eku ‘ita mo hono kakaha; ko hono ālonga ai pē ko ‘eku hiki kinautolu mei he fe‘ao kovi mo au.

³²Ko e ‘ātunga ia ‘o e fu‘u kovi ‘a ha‘a ‘Isileli mo ha‘a Siuta, ‘a ia kuo nau fai ke faka‘ita ‘aki au, ‘e kinautolu, ‘a honau ngaahi tu‘i, ‘a honau hou‘eiki, ‘a honau kau taula‘eiki, mo honau kau palōfita, mo e tangata Siuta fua pē, mo e nofo Selusalema.

³³Pea nau fuli mai honau tu‘a ‘o ‘ikai ko honau mata: pea neongo na‘a ku ako‘i kinautolu, ‘o u ‘ā hengihengi ke fai honau ako, ka na‘e ‘ikai te nau fakaongo ke tali akonaki.

³⁴Pea kuo nau ‘ai ‘enau ngaahi fakalielia ‘i he fale ‘oku ui‘aki hoku hingoa, ke ‘uli‘i ia.

³⁵Pea kuo nau tanu ‘a e ngaahi ‘esi ‘o Peali, ‘a ‘ena ‘i he Tele‘a ‘o e foha ‘o Hīnomi, ke fakalaka ai ‘enau fānau tangata mo fānau fefine kia Moloke; ‘a ia ko e me‘a na‘e ‘ikai te u tu‘utu‘uni kiate kinautolu, pea na‘e ‘ikai ke ake ‘i hoku loto ‘a e ai ha fakalielia pehē, ke fakahalaia ‘a Siuta.

³⁶Pea koe‘uhi ko e me‘a ko ia, ko eni ‘oku folofola ‘a Sihova ko e ‘Otua ‘o ‘Isileli, ‘o pehē, Ko e me‘a ki he kolo ni, ‘a ia ‘oku mou pehē kuo tuku ki he nima ‘o e Tu‘i Pāpilone, ko e me‘a ‘i he heletā, mo e honge, mo e mahaki faka‘auha:

³⁷ko au eni te u tānaki kinautolu mei he ngaahi fonua kehekehe kuo u sese‘e kinautolu ki ai, ‘i he‘eku ‘ita, mo ‘eku houhau, mo e tuputāmaki lahi; pea te u toe ‘omi kinautolu ki he potu ni, pea te u ‘ai ke nau nofo nonga:

³⁸pea te nau nofo mai ko hoku kakai, pea te u nofo au ko honau ‘Otua.

³⁹Pea te u ‘atu kiate kinautolu ha taha‘i loto, mo ha taha‘i ‘alunga, ko e ‘apasia kiate au ma‘u ai pē; ma‘anau lelei, pea ma‘a e lelei ‘a ‘enau fānau ‘oka hili kinautolu.

⁴⁰Pea te u fai mo kinautolu ha kovinānite ta‘engata, ko e pehē ‘e ‘ikai te u tuku ‘eku muimui kiate kinautolu ke fai ha lelei; pea te u tuku ‘i honau loto ‘a e ‘apasia kiate au, ke ‘oua te nau afe meiate au.

⁴¹Pea te u fiefia ‘iate kinautolu ke fai ha‘anau lelei, pea te u hunuki kinautolu ‘i he fonua ni, ‘o fai mo‘oni ‘aki hoku loto kotoa mo hoku laumālie kotoa.

⁴²He ko e folofola eni ‘a Sihova: Hangē ko ‘eku ‘omi ki he kakai ni ‘a e ngaahi fu‘u kovi ko eni, pehē te u ‘omi ‘e au kiate kinautolu ‘a e lelei kotoa ‘oku ou lea ki ai ma‘anautolu.

⁴³Pea ‘e fefakatau‘aki ‘a e ngaahi konga vao ‘i he fonua ko eni, ‘a ia ‘oku mou pehē, Ko e lala ia, ta‘e‘i ai ha tangata pē manu; kuo tuku ki he nima ‘o e kau Kalitia.

⁴⁴Te nau fakatau ha ngaahi konga vao ‘aki ‘a e pa‘anga, pea te nau fai ‘a e ngaahi tohi fakatau, ‘o sila‘i ke ma‘u, pea te nau kumi fakamo‘oni ki ai, ‘i he fonua ‘o Penisimani, pea ‘i he ngaahi tua‘ā ‘o Selusalema, pea ‘i he ngaahi kolo ‘o Siuta, pea ‘i he ngaahi kolo ‘o e mo‘unga, pea ‘i he ngaahi kolo ‘i Sēfela‘a, pea ‘i he ngaahi kolo ‘o e Tonga: he te u fakafoki ‘enau pōpula — ko Sihova ia mei he Ta‘ehāmai.